‘बीमा सूचना केन्द्र’ स्थापनाका लागि प्रारम्भिक चरणको छलफल सुरु « Arthapath.com
२४ जेष्ठ २०८१, बिहीबार

‘बीमा सूचना केन्द्र’ स्थापनाका लागि प्रारम्भिक चरणको छलफल सुरु



काठमाडौं । बीमा सूचना केन्द्र स्थापनाका लागि प्रारम्भिक चरणको छलफल सुरु भएको छ । नेपाल बीमा प्राधिकरणले केन्द्र स्थापनाका लागि छलफल तथा अन्तरक्रिया कार्यक्रम गरेको हो ।

बीमा ऐन, २०७९ मा बीमा सूचना केन्द्र स्थापनाको व्यवस्था छ । सोही बमोजिम प्राधिकरणले प्रारम्भिक चरणमा छलफल एवम् अन्तक्र्रिया कार्यक्रम आयोजना गरिएको हो ।

बीमा सूचना केन्द्रको सम्भावित स्वरुपका बारेमा सम्बन्धित मन्त्रालय, सरकारी निकाय, नेपालस्थित अन्तर्राष्ट्रिय निकाय, विश्वविद्यालय, बीमक, पेशागत बीमा अभिकर्ता सङ्घ र नेपाल बीमा सर्भेयर सङ्घबाट राय सुझावहरू लिने उद्देश्यले कार्यक्रम आयोजना गरिएको हो ।

कार्यक्रममा प्राधिकरणका अध्यक्ष सूर्यप्रसाद सिलवालले बीमा सूचना केन्द्र स्थापनाका लागि प्रारम्भिक चरणको छलफल शुरु भएको जानकारी गराए । सुझाव सङ्कलनलाई सघनताका साथ निरन्तररूपमा अगाडि बढाइने उनको भनाई छ ।

‘नागरिकको जीवन, सम्पत्ति र राष्ट्रिय सम्पत्तिको सुरक्षण गर्न आवश्यक सूचना प्राप्त गर्ने किसिमले बीमा सूचना केन्द्र स्थापनाका लागि सुझावहरू सङ्कलन गर्न शुरु गरिएको छ, केन्द्रको स्थापनाबाट सरकारी निकाय, समग्र बीमा बजार र नागरिकलाई फाइदा पुग्नेछ’,अध्यक्ष सिलवालले भने ।

केन्द्रले सम्बोधन गर्नुपर्ने क्षेत्र, केन्द्रित हुनुपर्ने विषय र सरकारी निकायहरुसँगको आवद्धता लगायतका विषयमा कार्यक्रमबाट ठोस सुझावहरू प्राप्त हुने अध्यक्ष सिलवालले अपेक्षा व्यक्त गरे । उनले भने,‘कार्यक्रमहरूबाट प्राप्त हुने सुझावहरूका आधारमा केन्द्रको स्थापनाको कार्य अगाडि बढाइनेछ, विपद् व्यवस्थापनलाई समेत अङ्गकै रुपमा लिइनेछ, स्वदेशी विज्ञलाई प्रोत्साहित गरिनेछ।’

सोही अवसरमा प्राधिकरण संचालक समितिका सदस्य कपिल देव ओलीले बीमा सूचना केन्द्रको स्थापनाबाट बीमा सम्बन्धी सूचनालाई व्यवस्थित, सुरक्षित र पारदर्शी बनाउन तथा बीमाका समग्र गतिविधिलाई सक्रिय रूपले अगाडि बढाउन सहयोग पुग्ने विश्वास व्यक्त गरे ।

यता, राष्ट्रिय विपद् जोखिम न्यूनीकरण तथा व्यवस्थापन प्राधिकरणका कार्यकारी प्रमुख अनिल पोखरेलले जोखिम र बीमा एउटै सिक्काका दुई पाटा भएका बताए। बीमा सूचना केन्द्र स्थापना गर्दा जोखिमको पाटोलाई पनि सँगसँगै लानुपर्ने र केन्द्र नेपाली मोडेलको हुनुपर्ने बताए ।

यस्तै, बीमा प्राधिकरणका निर्देशक कमल प्रसाद रेग्मीले बीमा सूचना केन्द्रको स्थापनालाई सहयोग पुग्ने गरी अन्तर्राष्ट्रियस्तरको सफ्टवेयर कार्यान्वयनमा ल्याउनुपर्ने धारणा राखे । त्यसैगरि निर्देशक सुशीलदेव सुवेदीले बीमा सूचना केन्द्रको प्रारम्भिक खाका प्रस्तुत गरेका थिए । उनले बीमामा हुने बदमासी, जालसाजी, कीर्ते र दोहोरोपनालाई नियन्त्रण गर्न केन्द्रको स्थापना आवश्यक भएको बताए ।

अर्का निर्देशक दिनेश कुमार लालले सरकारबाट बीमा नियमावली स्वीकृत भई कार्यान्वयनमा आएपछि बीमा सूचना केन्द्र स्थापनाको कार्य अगाडि बढाउन प्रारम्भिक खाका तयार गरी सुझावहरू सङ्कन गर्न शुरु गरिएको बताए ।

कार्यक्रममा सहभागीहरूले स्थापना हुनलागेको बीमा सूचना केन्द्रमा अनलाइन माध्यमबाट सूचना सङ्कलन गर्ने र बीमकहरूका सूचनालाई एकीकृत गर्ने व्यवस्था हुनुपर्ने, सूचना प्रमाणीकरणका लागि प्राविधिक समितिको व्यवस्था गर्नुपर्ने सुझाव दिएका थिए । यस्तै सरकारी सूचना प्रणालीसँग आवद्ध गर्नुपर्ने, मुलुकको सङ्घीय संरचना अनुरुपको हुनुपर्ने, सूचनाको दायरा निक्र्यौल गर्नुपर्ने, बीमामा सुशासन, ग्राहक पहिचान र सूचना प्रविधिको प्रयोगलाई समेट्नुपर्ने उनीहरुको सुझाव छ ।

कार्यक्रममा कानून, न्याय तथा संसदीय मामिला मन्त्रालय, राष्ट्रिय योजना आयोग, राष्ट्रिय तथ्याङ्क कार्यालय, नेपाल राष्ट्र बैङ्क, राष्ट्रिय विपद् जोखिम न्यूनीकरण तथा व्यवस्थापन प्राधिकरण, त्रिभुवन विश्वविद्यालयको केन्द्रीय तथ्याङ्क विभाग र कर्जा सूचना केन्द्रका पदाधिकारीहरू, बीमा कम्पनीका प्रमुख कार्यकारी अधिकृतहरू तथा पेशागत बीमा अभिकर्ता सङ्घ र नेपाल बीमा सर्भेयर सङ्घका प्रतिनिधिहरूको सहभागिता रहेको थियो ।


प्रतिक्रिया दिनुहोस्