पेट्रोलियम पदार्थ आयात ठप्प हुन सक्ने निगमको चेतावनी, यस्ता छन् १० बुँदे सुझाव « Artha Path
२० असार २०७९, सोमबार

पेट्रोलियम पदार्थ आयात ठप्प हुन सक्ने निगमको चेतावनी, यस्ता छन् १० बुँदे सुझाव



काठमाडौं । नेपाल आयल निगमले पेट्रोलियम पदार्थको खपत घाटउन सरकारलाई सुझाव पेश गरेको छ । आयल निगमको घाटा अत्यधिक बढ्दै गएपछि सरकारलाई विभिन्न सुझावहरु पेश गरेको हो । नेपाल आयल निगमले घाटा चुलिएर थेग्नै नसक्ने अवस्था भएको भन्दै प्रधानमन्त्री र उद्योग वाणिज्य तथा आपूर्ति मन्त्रीको ध्यानकर्षणसहित १० बुँदे सुझाव पनि पेश गरेको हो ।

निगमले सोमबार दुवै निकायलाई पत्राचार गर्दै निगमले आर्थिक स्रोतको जोहो नभए निकट भविष्यमै इन्धन आपूर्ति प्रभावित हुन सक्ने समेत चेतावनी दिएको छ ।

‘विषम परिस्थितिमा निगमलाई कुनै स्रोतबाट आवश्यक रकम उपलब्ध हुन सकेन, मूल्य समायोजन पनि हुन नसकेको हुँदा निकट भविष्यमा नै पेट्रोलियम पदार्थको आपूर्तिमा समस्या हुनसक्छ’ निगमले लेखेको पत्रमा उल्लेख गरिएको छ ।

घाटा धान्नै नसकिने अवस्थामा रहेकाले स्वदेशमा इन्धन खपत कम गर्न विकल्प खोज्न समेत आग्रह गरेको छ । चालु आर्थिक वर्षको अन्त्यसम्म निगम ५५ अर्ब रुपैयाँ नोक्सानीमा जाने देखिएको जनाएको छ । भारतलाई इन्धन खरिदको भुक्तानी गर्नुपर्ने रकम ३० अर्ब भन्दा बढी रहेको छ ।

नेपाल आयल निगम पेट्रोलियम पदार्थ

१. सार्वजनिक तथा अत्यावश्यक सेवाका सवारी साधनहरू बाहेक सरकारी तथा निजी सवारी साधन जोर बिजोर प्रणालीमा सञ्चालन गर्ने ।
२. देशका प्रमुख सहरहरूमा प्रत्येक शनिवार गाडी रहित सार्वजनिक बिदाको घोषणा गर्ने ।
३. खाना पकाउने एलपी ग्यासको खपत कम गर्न विद्युतीय चुलो सहुलियत दरमा बिक्री गर्ने घरायसी प्रयोजनको लागि विद्युतीय शुल्क कम गर्ने ।
४. विद्युतीय सवारी साधनको प्रयोगमा वृद्धि गर्न प्रमुख सहरहरू र राष्ट्रिय राजमार्गहरूमा निः शुल्क चार्जिङ्ग स्टेशन निर्माण गर्ने तथा सार्वजनिकरनिजी पार्किङ्ग स्थलमा विद्युतीय सवारीका लागि अलग्गै निः शुल्क पार्किङ्ग स्थल तोकिदिने ।
५. पेट्रोल पम्पहरूले मोटर साइकललाई एक–पटकमा ५ लिटर र कार तथा जीप लगायतका साना सवारी साधनलाई २० लिटर मात्र इन्धन बिक्री गर्ने ।
६. छोटो दुरीमा सवारी साधनको सकभर प्रयोग नगरी पैदल यात्रा गर्न आव्हान गर्ने ।
७. ढुवानी कार्यमा प्रयोग हुने मालवाहक सवारी साधनहरू पूर्ण क्षमतामा चलाउने ।
८. मोटरसाइकल, कार, सरकारी सवारी साधन आदिमा सिट अनुरूप नै यात्रु रहने गरी सञ्चालन
गर्ने व्यवस्था मिलाउने ।
९. पेट्रोलियम पदार्थबाट चल्ने सवारी साधन लगायतका अन्य उपकरणहरूको आयात बन्द गर्ने ।
१०.ठूला उद्योग, परियोजना, होटेल आदिले डिजेल तथा एलपीग्यासको खपत नगरी विद्युतको खपत गर्न आव्हान गर्ने ।


प्रतिक्रिया दिनुहोस्