अझै अब्बल बन्दै मुक्तिनाथ: शाइन रेसुङ्गाको लोभलाग्दो प्रगति, यस्तो देखियो विकास बैंकहरुबीच प्रतिस्पर्धा (तथ्याङ्कसहित)

काठमाडौं । सूचीकृत आठ वटै राष्ट्रिय स्तरका विकास बैंकहरुले चालु आर्थिक वर्ष २०७९/८० को दोस्रो त्रैमासिक वित्तीय विवरण प्रकाशित गरेका छन् ।

बैंकहरुको वित्तीय विवरण अनुसार चालु आवको ६ महिनामा २ अर्ब ५३ करोड २३ लाख ६३ हजार रुपैयाँ खुद नाफा गरेका छन् । तर, गत वर्षको पुस मसान्तसम्मको तुलनामा भने बैंकहरुको २०.९० प्रतिशतले कमी हो । गत वर्षको सोही अवधिमा ३ अर्ब २० करोड १७ लाख ४४ हजार रुपैयाँ नाफा कमाएका थिए ।

पुँजी, नाफा, खुद ब्याज आम्दानी लगायतको प्रमुख सूचकमा मुक्तिनाथ विकास बैंकले अग्र स्थान बनाएको छ । अन्य विकास बैंकहरुको तुलनामा मुक्तिनाथले विगत केही वर्षदेखि नै निरन्तर आफ्नो स्थान पहिलो बनाउँदै आएको छ ।

यस्तै, शाइन रेसुङ्गा डेभलपमेन्ट बैंकले पनि अधिकांश सूचकमा आफूलाई अब्बल बनाउँदै आएको छ । गत वर्षको तुलनामा अधिकांश सूचकहरु शाइन रेसुङ्गा डेभलपमेन्ट बैंकले लोभलाग्दो प्रगति गरेको तथ्याङ्कले देखाउँछ । केही सूचकमा शाइन रेसुङ्गा नै अग्रता लिएको छ । व्यवासय विस्तारमा बैंक आक्रामक रुपमा देखिएको छ ।

यता, प्राय सूचकमा ज्योति विकास बैंक कमजोर देखिएको छ । सो अवधिमा बैंकको वितरण योग्य नाफा ऋणात्मक छ ।

मुक्तिनाथले कमायो धेरै नाफा, शाइन रेसुङ्गा बन्यो धेरै नाफा बढाउने बैंक

सो अवधिमा सबैभन्दा धेरै नाफा कमाउनेमा मुक्तिनाथ विकास बैंक रहेको छ । बैंकको सो अवधिमा ६२ करोड ६२ लाख ३३ हजार रुपैयाँ खुद नाफा गरेको छ । यो गत वर्षको पुस मसान्तसम्मको तुलनामा भने ३.९५ प्रतिशतले बढी हो । गत वर्षको सोही अवधिमा बैंकले ६० करोड २४ लाख रुपैयाँ खुद नाफा गरेको थियो ।

दोस्रो स्थानमा रहेको गरिमा विकास बैंकले भने ५० करोड २१ लाख ४६ हजार रुपैयाँ नाफा गरेको छ । तर, गत वर्षको पुस मसान्तसम्मको तुलनामा भने १.८६ प्रतिशतले मात्र बढी हो । चालु आवको दोस्रो त्रैमासमा सबैभन्दा धेरै नाफा बढाउनेमा भने शाइन रेसुङ्ग डेभलपमेन्ट बैंक रहेको छ । शाइनले चालु आवको ६ महिनामा २३.१७ प्रतिशतले नाफा वृद्धि गरि ४२ करोड ९६ लाख ७८ हजार रुपैयाँ पुर्याएको छ ।

सो अवधिमा सबैभन्दा कम नाफा ज्योति विकास बैंकको देखिएको छ । चालु आवको दोस्रो त्रैमासमा बैंकले ३ करोड ४७ लाख ५९ हजार रुपैयाँ मात्र नाफा गरेको हो । बैंकको नाफा गत वर्षको सोही अवधिको तुलनामा ८९.८९ प्रतिशतले घटेको हो ।
सो अवधिमा कामना सेवा विकास बैंकको ४३ प्रतिशत, महालक्ष्मी विकास बैंकको नाफा ३०.७३ प्रतिशत, सांग्रिला डेभलपमेन्ट बैंकको ३६.३८ प्रतिशत, लुम्बिनीको २५.७७ प्रतिशतले नाफा गिरावट आएको हो ।

खुद ब्याज आम्दानी २६ प्रतिशतले बढ्यो, सबैभन्दा अगाडि मुक्तिनाथ विकास बैंक

चालु आवको ६ महिनामा सबैभन्दा धेरै खुुद ब्याज आम्दानी गर्नेमा पनि मुक्तिनाथ विकास बैंक देखिएको छ । सो अवधिका बैंकको यस्तो आम्दानी ३३.३६ प्रतिशतले बढेर २ अर्ब ४ करोड ४४ लाख ३४ हजार रुपैयाँ पुगेको छ ।

चालु आवको ६ महिनामा ५ वटा विकास बैंकको खुद ब्याज आम्दानी १ अर्ब माथि देखिएको छ । सो अवधिमा गरिमा विकास बैंकले पनि ३४.२६ प्रतिशत बढाएर १ अर्ब ५७ करोड ७७ लाख ६९ हजार रुपैयाँ खुद ब्याज आम्दानी गर्न सफल भएको छ ।

यस्तै, ज्योति विकास बैंकको खुद ब्याज आम्दानी १ अर्ब १५ करोड १३ लाख ९८ हजार, शाइन रेसुङ्गाको १ अर्ब ५ करोड ४५ लाख, महालक्ष्मीको १ अर्ब ४ करोड ४१ लाख र कामना सेवाको १ अर्ब २ करोड २६ लाख रुपैयाँ रहेको छ ।

सो अवधिमा लुम्बिनी विकास बैंकको खुद ब्याज आम्दानी ९२ करोड ९१ लाख रुपैयाँ, र सांग्रिला डेभलपमेन्टको ९१ करोड ३५ लाख रुपैयाँ रहेको छ ।

संचालन नाफामा पनि मुक्तिनाथकै अग्रता, गरिमा र शाइन रेसुङ्गा अघि-पछि

चालु आवका ६ महिनामा सबैभन्दा धेरै संचालन नाफा गर्नेमा पनि मुक्तिनाथ विकास बैंकको अग्रता देखिएको छ । सो अवधिमा बैंकले ८९ करोड ४६ लाख १९ हजार रुपैयाँ संचालन नाफा गरेको छ ।

यस्तै, गरिमा विकास बैंकको ७१ करोड ६७ लाख र शाइन रेसुङ्गको ६१ करोड ७९ लाख रुपैया देखिएको छ । तर, गत वर्षको पुस मसान्तसम्मको तुलनामा शाइन रेसुङ्गाले भने संचालन नाफा २३.९९ प्रतिशतले बढाएको छ । यो अन्यको बैंकको भन्दा उच्च हो ।

सो अवधिमा ज्योति विकास बैंकको यस्तो नाफामा सबैभन्दा धेरै गिरावट आएको छ । बैंकको संचालन नाफा ८९.८९ प्रतिशतले घटेर ४ करोड ९६ लाख ५६ हजार रुपैयाँ कायम भएको छ ।

वितरण योग्य नाफा गरिमा विकासको धेरै, ज्योतिको ऋणात्मक

चालु आवको ६ महिनामा सबैभन्दा धेरै वितरण योग्य नाफा सांग्रिला डेभलपमेन्ट बैंकको २७ करोड ८२ लाख २९ हजार रुपैयाँ देखिएको छ । सो अवधिमा ज्योति विकासको भने ३३ करोड ३ लाख रुपैयाँ ऋणात्मक देखिएको छ ।

यस्तै, गरिमा विकास बैंकको २१ करोड ४९ लाख, कामना सेवाको १९ करोड ८१ लाख, मुक्तिनाथको १६ करोड ३ लाख, महालक्ष्मीको १० करोड ७८ लाख र लुम्बिनीको १० करोड रुपैयाँ देखिएको छ ।

चुक्ता पुँजीमा मुक्तिनाथ बलियो

चुक्ता पुँजीको आधारमा पनि मुक्तिनाथ विकास बैंक बलियो देखिएको छ । बैंकको चुक्ता पुँजी ६ अर्ब ४२ करोड ९ लाख रुपैयाँ रहेको छ ।

दोस्रो स्थानमा रहेको गरिमा विकास बैंकको चुक्ता पुँजी ५ अर्ब १८ करोड ८७ लाख रुपैयाँ रहेको छ । यस्तै, शाइन रेसुङ्गाको ४ अर्ब २८ करोड ३८ लाख, ज्योति विकास बैंकको ४ अर्ब २६ करोड ७७ लाख रुपैयाँ रहेको छ ।

२२ प्रतिशतले बढ्यो जगेडा कोषको आकार, लुम्बिनी विकास बलियो

सो अवधिमा बैंकहरुको जगेडा कोषको आकार २२ प्रतिशतले बढेर १३ अर्ब ४२ करोड ४२ लाख रुपैयाँ पुगेको छ । जगेडाको कोषको आधारमा भने लुम्बिनी विकास बैंक बलियो देखिएको छ । बैंकले जगेडा कोषमा २ अर्ब २५ करोड ७३ लाख रुपैयाँ राखेको छ ।

यस्तै, मुक्तिनाथ विकास बैंकको जगेडा कोषमा २ अर्ब १८ करोड ४० लाख, महालक्ष्मी विकास बैंकको २ अर्ब २ करोड ५५ लाख रुपैयाँ रहेको छ ।

प्रतिसेयर आम्दानी शाइन रेसुङ्गा बढी, अन्य ७ वटा इपिएस घट्यो

दोस्रो त्रैमासमा शाइन रेसुङ्गाको प्रतिसेयर आम्दानी सबैभन्दा धेरै देखिएको छ । गत वर्षको तुलनामा १ रुपैयाँ ६१ पैसा वृद्धि भई कम्पनीको यो आम्दानी २० रुपैयाँ ६ पैसा कायम भएको छ ।

गत वर्षको तुलनामा शाइन रेसुङ्गा बाहेकका अन्य बैंकको प्रतिसेयर आम्दानी घटेको हो । चालु आवको ६ महिनामा सबैभन्दा कम प्रतिसेयर आम्दानी ज्योति विकास बैंकको देखिएको छ। सो अवधिमा बैंकको यस्तो आम्दानी १४ रुपैयाँ ४९ पैसाले घटेर १ रुपैयाँ ६३ पैसा कायम भएको छ ।

सो अवधिमा मुक्तिनाथ विकास बैंकको प्रतिसेयर आम्दानी १९ रुपैयाँ ५१ पैसा, गरिमाको १९ रुपैयाँ ३९ पैसा रहेको छ । यस्तै, महालक्ष्मीको १५ रुपैयाँ ७६ पैसा, लुम्बिनीको १५ रुपैयाँ ४३ पैसा, कामना सेवाको १२ रुपैयाँ ४७ पैसा, सांग्रिलाको ११ रुपैयाँ ६ पैसा रहेको छ ।

नेटवर्थमा लुम्बिनी अगाडि, ज्योति विकास कमजोर

प्रतिसेयर नेटवर्थमा लुम्बिनी विकास बैंकले पछि पारेको छ । सो अवधिमा बैंकको प्रतिसेयर नेटवर्थ १६९ रुपैयाँ ६९ पैसा देखिएको छ । नेटवर्थको आधारमा पनि ज्योति विकास बैंक कमजोर देखिएको छ ।

बैंकको प्रतिसेयर नेटवर्थ १२२ रुपेयाँ ३ पैसा रहेको छ । यता, गत वर्षको तुलनामा महालक्ष्मी विकास बैंकको प्रतिसेयर नेटवर्थ २० रुपैयाँ ४६ पैसाले घटेर १५७ रुपैयाँ ९४ पैसा कायम भएको छ ।

निक्षेप संकलन र कर्जा प्रवाहमा मुक्तिनाथ विकास नै अग्रस्थानमा

चालु आवको ६ महिनामा निक्षेप संकलन र कर्जा प्रवाहमा पनि मुक्तिनाथ विकास बैंक पहिलो स्थानमा देखिएको छ । सो अवधिमा बैंकले १ खर्ब ९ अर्ब ३१ करोड ४९ लाख रुपैयाँ निक्षेप संकलन गरि ९२ अर्ब १९ करोड ८६ लाख रुपैयाँ कर्जा लगानी गरेको छ ।

सो अवधिमा गरिमाले ७१ अर्ब ९६ करोड १८ लाख रुपैयाँ निक्षेप संकलन गरि ५९ अर्ब ५८ करोड २४ लाख रुपैयाँ कर्जा प्रवाह गरेको छ ।

महालक्ष्मीको खराब कर्जा सबैभन्दा धेरै, मुक्तिनाथको कम

चालु आवको ६ महिनामा सबैभन्दा धेरै खराब कर्जा महालक्ष्म विकास बैंकको देखिएको छ । सो अवधिमा बैंकको खराब कर्जा ४.५७ प्रतिशत पुगेको छ । गत वर्षको सोही अवधिमा भने बैंकको यो कर्जा २.८९ प्रतिशत रहेको थियो ।

दोस्रो त्रैमासिक वित्तीय रिपोर्टको आधारमा सबैभन्दा कम खराब कर्जा मुक्तिनाथ विकास बैंकको देखिएको छ । सो अवधिमा बैंकसंग ०.९८ प्रतिशत मात्रै यस्तो कर्जा रहेको छ ।