साढे ६ हजार बढीले बुझाएनन् सम्पत्ति विवरण

काठमाडौं । गत आर्थि वर्ष २०७९/८१ मा साढे ६ हजार बढीले सम्पत्ति विवरवण नबुझाएको पाइएको छ । राष्ट्रिय सतकर्ता केन्द्रले अख्तियार दुरुपयोग अनुसन्धान आयोग समक्ष पेस गरेको गत आवको सम्पत्ति विवरण अनुगमन प्रतिवेदनले यस्तो देखाएको हो ।

गत वर्ष ६ हजार ७०५ जना सार्वजनिक पद धारण गरेका व्यक्ति आफ्नो सम्पत्ति विवरण नबुझाएका हुन् । गत आवमा कुल ९९.१० प्रतिशत अर्थात ७ लाख ३९ हजार ७५८ जनाले भने विवरण बुझाएको प्रतिवेदनले देखाउँछ । तर, नबुझाउने प्रतिशत भने ०.९० प्रतिशत रहेको छ। जुन सुखद मानिएको छ । अघिल्लो आवमा भने ९ हजार ५९० जनाले सम्पत्ति विवरण बुझाएका थिएनन् ।

सार्वजनिक पदमा बहाल रहेको व्यक्तिले भ्रष्टाचार निवारण ऐन, २०५९को दफा ५०(१) बमोजिम सार्वजनिक पद धारण गरेको मितिले साठी दिनभित्र र त्यसपछि हरेक आर्थिक वर्ष समाप्त भएको साठी दिनभित्र कानुन बमोजिम आफ्नो सम्पतिको स्रोत वा निस्सा सहितको अध्यावधिक विवरण पेस गर्नुपर्ने व्यवस्था रहेको छ ।

तोकिएको म्यादभित्र सम्पत्तिको विवरण पेस नगर्ने सार्वजनिक पद धारण गरेको व्यक्तिलाई सोही ऐनको दफा ५०(३) बमोजिम कारबाही गर्ने व्यवस्था पनि रहेको छ ।

गत वर्ष सम्पत्ति विवरण नबुझाउनेमा संघीय तहका सबैभन्दा धेरै ५ हजार १८५, प्रदेशका ६६५ र स्थानीय तहका ८५५ जना रहेका छन् । तर, यी तीनै तहका क्रमशः ४ लाख ६१ हजार १९६, १७ हजार ७४७ र २ लाख ६० हजार ८१५ जनाले भने सम्पत्ति विवरण बुझाएका छन् ।

केन्द्रका अनुसार विवरण नबुझाउने संघीय तहका निजामती कर्मचारीहरु बढी छन् । गत वर्ष ७५ हजार ७८९ जनाले बुझाएको देखिएता पनि ३ हजार ३८६ जना संघीय निजामति कर्मचारीले आफ्नो सम्पत्ति विवरण बुझाएका छैनन् । यस्तै, नेपाल प्रहरी र सशस्त्र प्रहरी बल, नेपाल र राष्ट्रिय अनुसन्धान विभागका ७९ जना बुझाएका छैन । यता, नेपाली सेनाले भने सबै बुझाएको छ ।
यस्तै, सम्पत्ति विवरण नबुझाउने विद्यालय शिक्षकको संखया ८३१ र अन्य राजनीतिक नियुक्ति तथा करार तर्फ पनि ८८९ जना छन् ।

प्रदेश तह अन्तर्गत भने बागमतीको धेरै देखिएको छ । बागमतीका २७६ जनाले सम्पत्ति विवरवण बुझाएका छैनन् । यस्तै, मधेशका १९९, कोशीका ४९, कर्णालीका ४८, गण्डकीका ४४, लुम्बिनीका २८, सुदुरपश्चितका २१ जनाले नबुझाएको देखिन्छ ।

गत आवमा सम्पत्ति विवरण निर्धारित समय भित्र बुझाउने र नबुझाउने संख्या, कहाँ कति ?