ट्युनिसियाको ६९औँ स्वतन्त्रता दिवस काठमाडाैँमा मनाइयो

काठमाडौं । ट्युनिसियाको ६९औँ स्वतन्त्रता दिवस नेपालमा पनि मनाइएको छ । नेपालको राजधानी काठमाडौंस्थित अवैतनिक वाणिज्यदूतको कार्यालय प्राङ्गणमा कार्यक्रम आयोजना गरी स्वतन्त्रता दिवस मनाइएको छ ।

नेपालका लागि ट्युनिसियाकी अवैतनिक वाणिज्यदूत भवानी राणाको सभापतित्वमा भएको कार्यक्रममा नेपाल ट्युनिसिया चेम्बर अफ कमर्सका अध्यक्ष ईश्वर जीसीलगायत नेपाल उद्योग वाणिज्य महासंघका पदाधिकारीहरूको बाक्लो सहभागिता थियो । यस्तै, नेपाल उद्योग वाणिज्य महासंघका पूर्व उपाध्यक्ष किशोर प्रधान, सिटिजन्स बैंक इन्टरनेशनलका अध्यक्ष प्रवलजंग पाण्डेलगायत नेपालका प्रतिष्ठित उद्योगी व्यवसायीहरू, पत्रकार र वाणिज्यदूतको कार्यालयका कर्मचारीहरूको कार्यक्रममा उपस्थिति रहेको थियो ।

कार्यक्रममा वाणिज्यदूत राणाले ट्युनिसियाको स्वतन्त्रता दिवसको अवसरमा शुभकामना व्यक्त गर्दै दुई देशबीचको मित्रता अझ प्रगाढ बनाउँदै अघि बढ्ने प्रतिवद्धता व्यक्त गरिन् । द्विपक्षीय पर्यटन प्रवर्द्धन र आर्थिक तथा सामाजिक सम्बन्ध विस्तारमा आफूले पहल गर्दै आएको जानकारी दिँदै उनले ट्युनिसिया युरोपेली मुलुकसँग जोडिएको भएर नेपाललाई युरोपतर्फ व्यापार विस्तार गर्न सहज हुने धारणा व्यक्त गरिन् ।

यसैगरी, नेपाल–ट्युनिसिया चेम्बर अफ कमर्सका अध्यक्ष ईश्वर जीसीलगायत वक्ताहरूले वाणिज्यदूत राणाको पहलकदमीबाट दुई देशबीच व्यापारिक कारोबार वृद्धि गर्न सहज भएको धारणा व्यक्त गरे । वक्ताहरूका अनुसार नेपालबाट गलैँचा र हस्तकलाका सामान ट्युनिसिया निकासी हुने गरेको छ भने ओलिभ आयल र हेलिकोप्टरका मेसिनरीपार्टसहरु ट्युनिसियाबाट आयात हुने गरेको छ ।

कार्यक्रममा ट्युनिसियाको उद्योग वाणिज्य तथा पर्यटन क्षेत्र, आयात–निर्यातको अवस्था तथा नेपालसँगको सम्बन्धलगायत विषयमा तयार पारिएको श्रव्यदृश्य सामाग्री पनि प्रस्तुत गरिएको छ। वाणिज्यदूत राणा नेपाल उद्योग वाणिज्य महासंघ ९एफएनसीसीआई की पूर्वध्यक्ष हुन् । ट्युनिसियाले उनलाई २०७९ सालमा वाणिज्यदूत नियुक्त गरेको थियो ।

सन् १९५६ को मार्च २० मा फ्रान्सेली औपनिवेशिक शासनबाट मुक्त भएको सम्झनामा ट्युनिसियाले हरेक वर्षको मार्च २० लाई स्वतन्त्रता दिवसका रूपमा मनाउँदै आएको छ । औपनिवेशिक शासनबाट मुक्त गराउन ट्युनिसियाली जनताले वर्षौँको सङ्घर्ष र बलिदानी समेत गर्नुपरेको थियो । स्वतन्त्रता दिवसको अवसरमा स्वतन्त्रता सङ्घर्षमा योगदान दिने राष्ट्रसेवकहरूलाई सम्मान गरिएको छ ।

सो अवसरमा ट्युनिसियामा देशभर राष्ट्रिय झण्डा फहराइनुका साथै आतिशबाजी देखाइएको थियो भने परेड आयोजना समेत गरिएको थियो ।