माधव नेपालले ठूलो भाग खोज्दा गठबन्धन फुट्न सक्ने प्रचण्डको संकेत

काठमाडौं । नेकपा माओवादी केन्द्रका अध्यक्ष पुष्पकमल दाहाल प्रचण्डले गठबन्धन फुट्न सक्ने संकेत गरेका छन् । उनले आगामी स्थानीय तह निर्वाचनमा तालमेलको विषय निकै पेचिलो र असहज रहेको स्वीकार गर्दै कांग्रेसँग पनि चुनावमा प्रतिस्पर्धा गर्नपर्ने स्थिति आउन सक्ने बताएका हुन् ।

अध्यक्ष प्रचण्डले पूर्व स्थायी समिति सदस्य र प्रदेश इन्चार्जहरुहको बैठकमा चुनावी तालमेलको अवस्थाबारे ब्रिफिङ गर्दै वर्तमान सत्ता गठबन्धनमा एकीकृत समाजवादीले ठूलो भाग खोज्दा समस्या आएको बताएका हुन् । यद्यपि गठबन्धनमा विवाद भए पनि ५ वटै दल मिलेर जानुपर्ने उनको जोड छ ।

एकीकृत समाजवादीका अध्यक्ष माधव नेपालले एमालेमा हुँदाको जसरी ठूलो भाग खोज्दा भागबण्डा मिलाउन समस्या हुने गरेको उनको भनाइ थियो । आफूलाई अझै पनि एमाले नै देख्ने र सानो पार्टीको अध्यक्ष हुँ भन्ने कुरा हेक्का नराख्ने प्रवृत्तिमा माधव नेपालमा रहेको संकेत गर्दै प्रचण्डले भने, ‘उहाँले आफूलाई अझै पनि एमाले नै सम्झिएर धेरै भाग माग्नुहुन्छ ।’

अध्यक्ष प्रचण्डले ठूलो दल कांग्रेससँग माओवादीले पनि सकेसम्म बार्गेनिङ गरेर धेरै भाग माग्नुपर्ने, नभए जतिमा हुन्छ त्ययतिमा तालमेल गरेर जानुपर्ने समेत बताए । तालमेल नभएको खण्डमा कांग्रेससँग पनि प्रतिस्पर्धा गर्न सकिने उनले बताए ।