नाडाको अध्यक्षमा करण चौधरीलाई बनाउने सहमती, गोल्छा बाहिरिए
अर्थ पथ
प्रकाशित मिति : ३ पुस २०८०, मंगलबार १८ : ३१ बजे
काडमाडौं । नाडा अटोमोवाइल एशोसिएसन अफ नेपालको नयाँ नेतृत्व सहमतिबाट टुङ्ग्याउने सहमती भएकाे छ । नाडाको आगामी कार्यकालका लागि अध्यक्षमा करण चौधरी चयन हुने भएका छन् ।
अगामी नेतृत्वका लागि मैदानमा रहेको आकाश गोल्छाले सहमतिमा चौधरीलाई अध्यक्ष बन्न राजि भएका हुन् । सहमतिको लामो प्रयासपछि आगामी कार्यकालकाे लागी अध्यक्ष चौधरीलाई सर्वसम्मत बनाउने सहमती भएको नाडा महासचिव सुरेन्द्र उप्रेतिले अर्थपथलाई बताए । उनका अनुसार बाँकी अन्य पदमा पनि छलफल जारी रहेको छ । नाडा सर्वसम्मत रुपमा नै टिम खडा गर्न प्रयासरत छ ।
नाडाको नेतृत्वका लागि सिजी होल्डिङ्सका चौधरी र जिओ अटोबालइल्सका प्रबन्ध निर्देशक आकाश गोल्छा मैदानमा थिए । नाडाकाे वर्तमान अध्यक्ष तथा पूर्वअध्यक्ष सबैको चाहाना पनि सहमतिबाटै नेतृत्व चयन गर्ने थियो ।
सोही अनुसार नै मंगलबार लामो छलफल र प्रयासबाट अगामी कार्यकालका लागि चौधरी सर्वसम्मत अध्यक्ष हुने भएका हुन् । चौधरी यसअघि पनि नाडाको अध्यक्ष पदमा उम्मेदवार दिए । उनी हालका अध्यक्ष ध्रुव थापासँग प्यानल बनाएर चुनाव लडेका थिए । तर, उनी थापासँग चुनावमा पराजय व्यहोरेका थिए ।
नाडाले आगामी पुस २० र २१ गते साधारण सभा गर्दैछ । तर, सभा अघि नै सहमतिको आधारमा नेतृत्व चयन गरिएको हो ।
