चीन–नेपालबीच चिकित्सा तथा सार्वजनिक स्वास्थ्यमा सहकार्य विस्तारको प्रतिवद्धता

काठमाडाैं । नेपाल र चीनबीचको ७० वर्षे कूटनीतिक मित्रताको अवसरमा ‘चाइना–नेपाल एकेडेमिक कन्फरेन्स’ नामक विशेष शैक्षिक सम्मेलन सम्पन्न भएको छ।

चिकित्सा र सार्वजनिक स्वास्थ्य क्षेत्रमा दुई देशबीचको सहकार्यलाई सुदृढ बनाउने उद्देश्यले आयोजित उक्त सम्मेलनले आपसी सम्बन्धको ऐतिहासिक महत्वलाई पनि उजागर गर्‍यो।

यस सम्मेलनले चीन र नेपालका अनुसन्धानकर्ता, चिकित्सक तथा प्राज्ञिक व्यक्तित्वहरूलाई एकै थलोमा ल्याएर अनुभव आदान–प्रदान गर्ने, वर्तमान अनुसन्धान प्रस्तुत गर्ने र भविष्यका सहकार्यका सम्भावनाहरूमा छलफल गर्ने अवसर प्रदान गर्‍यो।

सम्मेलनको अध्यक्षता चिनियाँ प्रख्यात शैक्षिक अगुवा प्रोफेसर फु योंग जियाओले गरेका थिए। उनले स्वास्थ्यसम्बन्धी विश्वव्यापी चुनौतीहरूसँग लड्न सीमा पारका शैक्षिक सहकार्यहरू अपरिहार्य भएको उल्लेख गर्दै द्विपक्षीय अनुसन्धान र ज्ञान सञ्जाल विस्तारमा जोड दिए।

सम्मेलनको प्रमुख प्रस्तुति सान्सी प्रान्तीय जन अस्पतालका उपाध्यक्ष प्रोफेसर डुआन जियाङलोंगले प्रस्तुत गरेका थिए। “चिनियाँ स्वास्थ्य सेवाको ८० वर्षे विकास र नवप्रवर्तन” विषयमा बोल्दै उनले चीनमा हालसम्म भएका स्वास्थ्य पूर्वाधार सुधार, नवप्रवर्तन र सार्वजनिक स्वास्थ्यमा गरिएको दीर्घकालीन प्रतिबद्धता विषयमा जानकारी दिए।

नेपालबाट डा। रामहरी चापागाईंले डेंगु र चिकनगुनिया जस्ता सङ्क्रमणजन्य रोगहरूबारे अद्यावधिक जानकारी प्रस्तुत गरे। उनले यी रोगहरू दुवै मुलुकको साझा चुनौती भएको बताउँदै निगरानी प्रणाली, संयुक्त अनुसन्धान र सहकार्यमा आधारित रोकथाम रणनीति आवश्यक रहेको धारणा व्यक्त गरे।

विश्व स्तनपान सप्ताह २०२५ सँग मेल खाने गरी डा। सन्तोष अधिकारीले नेपालमा बाल आहारसम्बन्धी ज्ञान र व्यवहारबारे गरिएको अध्ययन प्रस्तुत गरे। मातृ तथा शिशु स्वास्थ्य शिक्षाको आवश्यकता औंल्याउँदै उनले नेपाल–चीन संयुक्त अनुसन्धान परियोजनाहरूबाट बाल पोषण क्षेत्रमा महत्वपूर्ण उपलब्धि हासिल गर्न सकिने सम्भावना प्रस्तुत गरे।

सम्मेलनमा करिब ५० जना वरिष्ठ चिकित्सक, अनुसन्धानकर्ता र सार्वजनिक स्वास्थ्यविद्हरूको उपस्थिति थियो। अन्तरक्रियात्मक सत्रहरूले चिकित्सा शिक्षा, अनुसन्धान र सीप आदान–प्रदानमा दुई देशको साझा प्रतिबद्धता झल्काएको थियो।

यो शैक्षिक सम्मेलनले चीन र नेपालबीचको कूटनीतिक सम्बन्धलाई मात्र नभई, चिकित्सा विज्ञान, नवप्रवर्तन र स्वास्थ्य शिक्षाका साझा लक्ष्यमार्फत थप सुदृढ गर्ने जग बसाएको छ। भविष्यमा अझ घनिष्ठ द्विपक्षीय स्वास्थ्य सहकार्यका ढोका खोल्ने आधार यस सम्मेलनमार्फत तयार भएको छ।