४२ वर्षीय भारतीय नागरिक गोविन्थनले युएईमा जिते ५० लाख दिरामकाे लट्री
काठमाडाैं । सन् २०२५ डिसेम्बरमा सुरु भएको नयाँ संरचनाको युएई लट्री अन्तर्गत ‘लक्की डे’ ड्रको पहिलो ५० लाख दिराम (झण्डै १८ करोड नेपाली रुपैयाँ) को दोस्रो पुरस्कार विजेताको नाम सार्वजनिक गरिएको छ।
युएई लट्री सञ्चालक ‘गेम एलएलसी’ का अनुसार यो ऐतिहासिक पुरस्कार ४२ वर्षीय भारतीय नागरिक मुरुगनानथ गोविन्थनले जितेका हुन्।
मुरुगनानथले आफ्नो जीवनकै पहिलो लट्री टिकटबाट यो ठूलो राशि जित्न सफल भएका हुन्। उनले उक्त टिकट आफ्नो एक नजिकको साथीसँग मिलेर किनेका थिए, जसका कारण अहिले ५० लाख दिरामको उक्त पुरस्कार दुई जनाबीच आधा-आधा बाँडिनेछ। फेब्रुअरी १४ मा भएको ड्र नम्बर २६०२१४ मा उनले ‘डेज’ सेक्सनका ६ वटै नम्बर (११, १९, २८, १५, ३१ र ७) मिलाउन सफल भएका थिए।
विगत तीन वर्षदेखि युएईमा कार्यरत मुरुगनानथले यो जीतपछि आफ्नो खुसी व्यक्त गर्दै भने, “म अझै पनि भाडाको घरमा बस्छु, मेरा छोराछोरी र मेरो सधैं आफ्नै घर बनाउने सपना थियो। आर्थिक अवस्थाले गर्दा अहिलेसम्म सम्भव भएको थिएन, तर अब मेरा सबै संघर्षहरू अन्त्य हुने बाटोमा छन् जस्तो लाग्छ।”
उनले यो जीतलाई भगवानको ठूलो आशिष् मानेका छन्। आफ्नो विवाह, सन्तानको शिक्षा र परिवारको जिम्मेवारी पुरा गर्नकै लागि उनी युएई आएका थिए।
यसअघि दोस्रो पुरस्कार १० लाख दिराम मात्र रहेकोमा नयाँ ढाँचा अन्तर्गत यसलाई बढाएर ५० लाख दिराम पुर्याइएको छ। यस वृद्धिले युएईभरका खेलाडीहरूमा नयाँ उत्साह र आशा जगाएको कम्पनीले जनाएको छ। नोभेम्बर २०२५ मा आफ्नो पहिलो वार्षिकोत्सव मनाएको युएई लट्रीले यसअघि नै एक जनालाई १० करोड दिरामको ‘ग्रान्ड प्राइज’ र सयौंलाई अन्य साना ठूला पुरस्कारहरू प्रदान गरिसकेको छ।
