उद्योग वाणिज्य महासंघ कोशीको नेतृत्वमा पुन: राजेन्द्र राउत निर्वाचित

विराटनगर । नेपाल उद्योग वाणिज्य महासंघ कोशी प्रदेशको अध्यक्ष पदमा राजेन्द्र राउत दोस्रो कार्यकालका लागि भारी मतले विजयी भएका छन् ।

विराटनगरमा आइतबार राति सम्पन्न महासंघको आठौँ प्रदेशसभाले राउतलाई पुन: नेतृत्वको जिम्मेवारी सुम्पेको हो ।

निर्वाचनको परिणाम र मतान्तर राउतले आफ्ना निकटतम प्रतिद्वन्द्वी नवीन रिजाललाई ८४ मतान्तरले पराजित गरे । कुल खसेको मतमध्ये राउतले १४२ मत प्राप्त गर्दा रिजालले ५८ मत मात्रै पाए ।

मत परिणामको विस्तृत विवरण अनुसार राउतले वस्तुगत तर्फ ११, जिल्ला–नगरतर्फ २४ र एसोसिएटतर्फ १०७ मत प्राप्त गरेका थिए । उनका प्रतिस्पर्धी रिजालले भने ती क्षेत्रहरूमा क्रमश: ६, १३ र ३९ मत प्राप्त गरे । यसअघि तीन वर्ष अगाडि झापामा भएको निर्वाचनमा राउत निर्विरोध निर्वाचित भएका थिए ।

निर्विरोध निर्वाचित पदाधिकारीहरू अध्यक्ष पदमा निर्वाचन भए तापनि अन्य मुख्य चार पदाधिकारीहरू भने निर्विरोध चयन भएका छन् ।
निर्विरोध निर्वाचित
उपाध्यक्ष (जिल्ला–नगर): ऋषिराज तिम्सिना
उपाध्यक्ष (वस्तुगत): राजन श्रेष्ठ
उपाध्यक्ष (एसोसिएट्स): रविनकुमार दाहाल
कोषाध्यक्ष: श्रवणकुमार अग्रवाल
यी सबै पदाधिकारीहरू राउत प्यानलकै हुन् । यसका साथै, एसोसिएट्स सदस्यमा देवकीनन्दन अग्रवाल र भविशकुमार श्रेष्ठ पनि निर्विरोध निर्वाचित भएका छन् ।

जिल्ला–नगर सदस्यतर्फ कृष्णप्रसाद रिजाल, राजु ढुंगाना ’राजीव’, जयप्रकाश शर्मा, हर्कबहादुर श्रेष्ठ र नवीनकुमार चौधरी विजयी भएका छन् भने वस्तुगततर्फ सुवास आचार्य र दीपक पाण्डे निर्वाचित भएका छन् ।

नेतृत्वको पृष्ठभूमि शिवम् अर्गनाइजेसनका अध्यक्ष समेत रहेका राउत महासंघ कोशी प्रदेशका संस्थापक सदस्य हुन्। उनको पहिलो कार्यकालमा प्रदेश कार्यालय भवनको निर्माण कार्य सुरु भएको थियो जुन हाल जारी छ । उनीसँग प्रतिस्पर्धामा उत्रिएका नवीन रिजाल महासंघका केन्द्रीय सदस्य हुन् ।