अमेरिका-इरानबीच दुई हप्ताका लागि युद्धविराम, वार्ताका लागि पाकिस्तानी प्रधानमन्त्रीले दिए निम्तो

काठमाडौँ । संयुक्त राज्य अमेरिका र इरानबीच दुई हप्ताका लागि युद्धविराम गर्ने सहमति भएको छ।

अमेरिकी राष्ट्रपति डोनाल्ड ट्रम्पले इरानसँग १४ दिनका लागि सैन्य कारबाही रोक्ने सम्झौता भएको घोषणा गरेका हुन्। यस सहमतिसँगै मध्यपूर्वमा बढ्दै गएको तनाव केही कम हुने अपेक्षा गरिएको छ।

युद्धविरामको घोषणा भएलगत्तै खाडी क्षेत्र र इजरायलमा मिसाइल आक्रमणका घटनाहरू सार्वजनिक भएका छन्। अमेरिकी अधिकारीहरूले इरानमाथिको सैन्य आक्रमण तत्कालका लागि स्थगित गरिएको बताए पनि इजरायली सेनाका प्रवक्ताले भने इजरायलले आफ्ना स्ट्राइकहरू जारी राखेको जानकारी दिएका छन्। यसले युद्धविरामको पूर्ण पालनामा केही चुनौती थपेको छ।

यस सम्झौताको मुख्य सर्तका रूपमा विश्वकै व्यापारिक मार्ग मानिने ‘स्ट्रेट अफ हर्मुज’ खुला गर्ने विषय रहेको छ। इरानका विदेश मन्त्रीले युद्धविरामको अवधिभर इरानी सेनाले उक्त स्ट्रेट भएर जाने जहाजहरूको मार्ग समन्वय गर्ने बताएका छन्।

राष्ट्रपति ट्रम्पले स्ट्रेट अफ हर्मुज पुनः सञ्चालनमा ल्याउनु नै यो युद्धविराम सम्झौताको प्रमुख आधार रहेको स्पष्ट पारेका छन्।

यो कुटनीतिक सफलतामा पाकिस्तानको महत्वपूर्ण भूमिका देखिएको छ। मंगलबार पाकिस्तानले नै वार्ताका लागि दुई हप्ताको युद्धविराम प्रस्ताव गरेको थियो। सोही पहल स्वरूप पाकिस्तानका प्रधानमन्त्रीले दुवै देशका प्रतिनिधिमण्डललाई आउँदो शुक्रबार इस्लामावादमा हुने वार्ताका लागि निमन्त्रणा दिएका छन्।