ट्रम्पद्वारा इरानसँगको युद्धविराम लम्ब्याउने घोषणा, तर नाकाबन्दी भने कायमै
काठमाडाैं । अमेरिकी राष्ट्रपति डोनाल्ड ट्रम्पले इरानसँगको युद्धविरामको समयसीमा थप गर्ने घोषणा गरेका छन्।
इरानी नेताहरूले युद्ध अन्त्यका लागि ‘एकीकृत प्रस्ताव’ नल्याएसम्म अमेरिकी सेनाले आफ्नो नियोजित आक्रमण रोक्ने उनले बताएका हुन्।
पाकिस्तानी मध्यस्थकर्ताहरूको अनुरोधमा यो निर्णय लिइएको ट्रम्पले जानकारी दिएका छन्। बुधबार समाप्त हुन लागेको उक्त युद्धविरामलाई लम्ब्याउँदै ट्रम्पले सामाजिक सञ्जालमा लेखेका छन्, “मैले हाम्रो सेनालाई नाकाबन्दी जारी राख्न र अन्य सबै हिसाबले तयार रहन निर्देशन दिएको छु। प्रस्ताव पेश नभएसम्म र छलफल निष्कर्षमा नपुगेसम्म युद्धविराम जारी रहनेछ।”
ट्रम्पको यो घोषणा इरानप्रतिको उनको कठोर अडानमा आएको पछिल्लो परिवर्तन हो। यसअघि उनले युद्धविराम थप्न अस्वीकार गर्दै इरानका पूर्वाधारहरूमा ठुलो आक्रमण गर्ने चेतावनी दिएका थिए। ट्रम्पका अनुसार इरानी नेतृत्वभित्रको आन्तरिक विभाजनले गर्दा कूटनीतिक प्रयासहरू सुस्त भएका हुन्।
यद्यपि, इरानले यसबारे आधिकारिक प्रतिक्रिया दिएको छैन। इरानको अर्ध-आधिकारिक समाचार एजेन्सी ‘तस्निम’ ले तेहरानको धारणा पछि सार्वजनिक गरिने जनाएको छ।
उता, इरानी विदेशमन्त्री अब्बास अराघ्चीले अमेरिकी नौसैनिक नाकाबन्दीलाई ‘युद्धको कार्य’ भन्दै यसले युद्धविरामको उल्लंघन गरेको बताएका छन्।
पाकिस्तानका प्रधानमन्त्री शहबाज शरीफले युद्धविराम लम्ब्याउने ट्रम्पको निर्णयको स्वागत गरेका छन्। उनले इस्लामाबादमा हुने दोस्रो चरणको वार्तामार्फत दुवै पक्षले स्थायी शान्ति सम्झौता गर्नेमा आशा व्यक्त गरेका छन्।
फेब्रुअरी २८ मा अमेरिका र इजरायलले इरानमाथि आक्रमण गरेयता सर्वोच्च नेता अली खामेनीसहित धेरै उच्च अधिकारीहरूको मृत्यु भइसकेको छ। खामेनीको स्थानमा उनका छोरा मोज्तबा आएका छन्, जसले अहिलेसम्म सार्वजनिक रूपमा कुनै प्रतिक्रिया दिएका छैनन्।
अमेरिकाले इरानको आणविक कार्यक्रम पूर्ण रूपमा बन्द गर्नुपर्ने, मिसाइल उत्पादनमा रोक लगाउनुपर्ने र हेजबुल्लाह तथा हमासजस्ता क्षेत्रीय सहयोगीहरूलाई सहयोग बन्द गर्नुपर्ने माग राखेको छ। तर, इरानले आफ्नो नागरिक आणविक कार्यक्रम र सैन्य क्षमतामा सम्झौता नगर्ने अडान राख्दै आएको छ।
विशेषज्ञहरूका अनुसार यो युद्ध ट्रम्पले सोचेजस्तो सहज नभएकाले र इरानले ‘स्ट्रेट अफ हर्मोज’ मा आफ्नो नियन्त्रणमार्फत नयाँ दबाब सिर्जना गरेकाले अमेरिकाले रणनीतिक रूपमा युद्धविराम लम्ब्याएको हुनसक्छ।
