काठमाडौँमा ‘ईएफएस फाइट नाइट ८’ को आयोजना हुँदै

काठमाडौं । डब्लुबीसी मुवाँथाई नेपालले आगामी मे १६, २०२६ (जेठ २ गते) काठमाडौँमा आठौँ डब्लुबीसी मुवाँथाई राष्ट्रिय च्याम्पियनसिप ईएफएस फाइट नाइट ८’ आयोजना गर्ने घोषणा गरेको छ । मुवाँथाई खेलको विकास, खेलाडीको व्यावसायिकता र अन्तर्राष्ट्रिय एक्सपोजरका लागि यो प्रतियोगिता आयोजना गर्न लागिएको हो ।

यस प्रतियोगितामा कूल ५२ खेलाडीहरूले २६ वटा फाइटहरूमा प्रतिस्पर्धा गर्नेछन्, जसमा ६ वटा व्यावसायिक (प्रोफेशनल) र अन्य एमेच्योर तथा प्रो-एमेच्योर भिडन्तहरू हुनेछन् । कार्यक्रमको मुख्य स्पर्धा ५८ केजी सुपर फेदरवेट विधामा एरावन मुवाँथाईका कर्ण बहादुर मगरती र जिमखानाका गुमान घर्ती मगर बीच हुनेछ । विजेताले डब्लुबीसी मुवाँथाई राष्ट्रिय च्याम्पियनसिप बेल्टका साथै १ लाख नेपाली रुपैयाँ नगद पुरस्कार प्राप्त गर्नेछन् । यस्तै, सह-मुख्य स्पर्धामा ४८ केजी विधामा नेपालकी करिश्मा कार्की र भारतकी पुष्पा आर.बीच अन्तर्राष्ट्रिय भिडन्त हुने तय भएको छ ।

संस्थाका अध्यक्ष राजु राईले नेपाली फाइटरहरूलाई अन्तर्राष्ट्रिय स्तरको अनुभव प्रदान गर्न यो प्रतियोगिता महत्वपूर्ण रहेको बताए। उनका अनुसार धेरै खेलाडीहरूले उचित अवसर र फाइट नपाउँदा प्रशिक्षणमै आफ्नो करियर सिध्याउनुपर्ने र निराश हुनुपर्ने अवस्था छ। “हाम्रो मुख्य उद्देश्य नेपाली फाइटरहरूलाई विश्वव्यापी मञ्चमा प्रतिस्पर्धा गर्न सक्षम बनाउनु हो ताकि उनीहरूले अन्तर्राष्ट्रिय प्रतियोगिताहरूमा अनुभवको कमीले हार्न नपरोस्,” अध्यक्ष राईले भने।

सन् २०२१ मा स्थापित यस संस्थाले वर्षमा तीनवटा इभेन्ट गर्ने लक्ष्य राखेको छ । थाइल्यान्डको डब्लुबीसी मुवाँथाई अर्गनाइजेसनसँग आवद्ध यस संस्थाले अन्तर्राष्ट्रिय मापदण्डका ग्लभ्स र नियमहरू प्रयोग गरी नेपाली खेलाडीलाई विश्व च्याम्पियन बन्ने बाटो खोल्ने लक्ष्य लिएको छ । यो कार्यक्रमलाई बागमती युवा तथा खेलकुद परिषद् र बुढानीलकण्ठ नगरपालिकाले सहयोग गरेका छन् ।