कर्मचारीमा जीवन बीमाहरुले ५ अर्ब १७ करोड खर्चिए: हिमालयन र नेपाल लाइफ शीर्षमा
काठमाडौं । नेपालका जीवन बीमा कम्पनीहरू पछिल्लो समय व्यवसाय विस्तारसँगै आफ्ना जनशक्ति व्यवस्थापन र सेवा सुविधामा आक्रामक बन्न थालेका छन् । चालू आर्थिक वर्षको चैत मसान्तसम्मको वित्तीय विवरणलाई नियाल्दा बीमा बजारमा कर्मचारीको तलब, भत्ता र सुविधामा अर्बौँ रुपैयाँ खर्च भइरहेको देखिन्छ ।
बजारमा बलियो उपस्थिति जनाउन र दक्ष जनशक्ति टिकाइराख्न कम्पनीहरूबीच सेवा सुविधा बढाउने प्रतिस्पर्धा नै चलेको छ । यसैको परिणामस्वरुप जीवन बीमा कम्पनीहरूको कुल कर्मचारी खर्च गत वर्षको तुलनामा साढे ११ प्रतिशतभन्दा बढीले वृद्धि भई ५ अर्ब १७ करोड ९८ लाख रुपैयाँ नाघेको छ । गत वर्षको सोही अवधिमा यस्तो खर्च ४ अर्ब ६४ करोड ६५ लाख रुपैयाँ मात्रै थियो ।
कर्मचारीका लागि सबैभन्दा धेरै खर्च गर्ने मामलामा यसपटक पनि हिमालयन लाइफ इन्स्योरेन्स अग्रपंक्तिमा देखिएको छ । मर्जरपछि ठूलो संजाल बनाएको हिमालयन लाइफले चैत मसान्तसम्ममा ७० करोड १ लाख ३२ हजार रुपैयाँ कर्मचारीको सेवा सुविधामा खर्चिसकेको छ । जुन गत वर्षको तुलनामा २.६० प्रतिशतको सामान्य वृद्धि हो ।
हिमालयन लाइफलाई पछ्याउँदै नेपाल लाइफ इन्स्योरेन्सले आफ्नो खर्चमा १७.६९ प्रतिशतको ठूलो बढोत्तरी गर्दै ६७ करोड ४१ लाख ३६ हजार रुपैयाँ पुर्याएको छ । यी दुई ठूला कम्पनीहरूबीच बजारमा मात्र नभई जनशक्तिमा गरिने लगानीमा पनि मुख्य टक्कर देखिन्छ ।
त्यस्तै, तेस्रो स्थानमा रहेको सूर्यज्योति लाइफ इन्स्योरेन्सले ४९ करोड ९७ लाख ७५ हजार रुपैयाँ कर्मचारीको तलब भत्तामा खर्च गरेको छ ।
पछिल्लो तथ्याङ्क अनुसार मध्यम र साना भनिएका कम्पनीहरूले पनि कर्मचारी खर्चमा मनग्ये वृद्धि गरेका छन् । नेशनल लाइफले ३९ करोड ७९ लाख, सानिमा रिलायन्सले ३७ करोड २ लाख र आईएमई लाइफले ३३ करोड ८ लाख रुपैयाँ खर्च गरेका छन्। आईएमई लाइफले गत वर्षको तुलनामा आफ्नो खर्च १९.२१ प्रतिशतले बढाएको देखिन्छ ।
अर्कोतर्फ, प्रतिशतका आधारमा सबैभन्दा आश्चर्यलाग्दो वृद्धि सरकारी स्वामित्वको राष्ट्रिय जीवन बीमा कम्पनीमा देखिएको छ । यस कम्पनीले गत वर्ष ७ करोड ६ लाख रुपैयाँ मात्रै खर्च गरेकोमा यस वर्ष ९३.३० प्रतिशतको छलाङ मार्दै १३ करोड ६५ लाख ३५ हजार रुपैयाँ कर्मचारीमा खर्च गरेको छ, जसले सरकारी कम्पनी पनि अब निजी क्षेत्रसँग प्रतिस्पर्धा गर्न आक्रामक बन्दै गएको संकेत गर्छ ।
त्यसैगरी, रिलायबल नेपाल लाइफले पनि २८.६८ प्रतिशतको उच्च वृद्धि सहित ३१ करोड ९९ लाख रुपैयाँ खर्च गरेको छ । बजारमा लाइफ इन्स्योरेन्स कर्पोरेसन (नेपाल), प्रभु महालक्ष्मी लाइफ, सन नेपाल लाइफ, मेट लाइफ र सिटिजन लाइफले पनि आफ्नो क्षमता अनुसार कर्मचारी खर्च ६ देखि १४ प्रतिशतसम्म बढाएका छन्। एशियन लाइफले ११.४४ प्रतिशतले खर्च बढाएर २६ करोड ९० लाख रुपैयाँ पुर्याएको छ ।
मर्जरको प्रभाव र बजारमा नयाँ प्रविधिको भित्र्याउने होडका कारण बीमा क्षेत्रमा दक्ष कर्मचारीको माग र तानातान सधैँ उच्च रहने गर्छ । वित्तीय सूचकहरूले के देखाउँछन् भने, जसरी बीमा व्यवसायमा जोखिम र अवसरहरू थपिँदै छन्, त्यसरी नै कम्पनीहरूले व्यवसाय टिकाउने मुख्य मेरुदण्डका रूपमा रहेका कर्मचारीहरूलाई खुसी राख्न आफ्नो ढुकुटी खुकुलो पार्दै लगेका छन् । बीमा क्षेत्रको यो खर्चिलो दौड आगामी दिनमा व्यवसाय वृद्धिमा कसरी रूपान्तरण हुन्छ, त्यो भने हेर्न बाँकी नै छ ।
