दक्षिण कोरिया कसरी बन्यो मेडिकल टुरिजमको नयाँ ग्लोबल हब?

काठमाडौं । दक्षिण कोरिया अहिले विश्वकै आकर्षक स्वास्थ्य पर्यटन गन्तव्यमध्ये एकका रूपमा स्थापित हुँदै गएको छ। घुमघामका लागि कोरिया पुग्ने विदेशी पर्यटकहरू अहिले यात्रा योजनामै स्वास्थ्य परीक्षणसमेत समावेश गर्न थालेका छन्।

पहिले दक्षिण कोरिया पुगेका पर्यटकहरूको प्राथमिकता ऐतिहासिक स्थल, किनमेल र खानपान हुन्थ्यो। अहिले भने रगत परीक्षण, अल्ट्रासाउन्ड, एमआरआई, एन्डोस्कोपीदेखि पूर्ण शरीर परीक्षणसम्मका सेवा लिन विदेशबाटै हजारौं मानिस कोरिया पुग्न थालेका छन्। केही घण्टामै विस्तृत स्वास्थ्य परीक्षण सम्पन्न हुने र अंग्रेजी भाषामा सहज सेवा उपलब्ध हुने भएकाले यस्तो आकर्षण बढेको हो।

दक्षिण कोरियाको स्वास्थ्य तथा कल्याण मन्त्रालयका अनुसार सन् २०२५ मा २० लाखभन्दा बढी विदेशी बिरामी उपचार तथा स्वास्थ्य परीक्षणका लागि कोरिया पुगेका थिए। यो अघिल्लो वर्षको तुलनामा करिब ७२ प्रतिशतले बढी हो। चीन, जापान, ताइवान र अमेरिकाबाट सबैभन्दा धेरै मानिस स्वास्थ्य सेवाका लागि कोरिया पुगेका छन्।

विशेषज्ञहरूका अनुसार कोरियाको स्वास्थ्य प्रणालीको सबैभन्दा ठूलो विशेषता कम खर्च, छिटो सेवा र उच्च गुणस्तर हो। धेरै देशमा एउटा एमआरआई गर्नसमेत महँगो शुल्क लाग्ने र लामो समय कुर्नुपर्ने अवस्था हुन्छ। तर कोरियामा सोही रकममा सम्पूर्ण शरीरको विस्तृत स्वास्थ्य परीक्षण गर्न सकिने भएकाले विदेशीहरू आकर्षित भएका हुन्। सरकारी नियमनका कारण उपचार शुल्क पनि तुलनात्मक रूपमा कम रहेको बताइन्छ।

कोरियामा रोग लागेपछि उपचार गर्नेभन्दा पनि रोगलाई सुरुमै पहिचान गर्ने प्रणालीलाई प्राथमिकता दिइन्छ। नियमित स्वास्थ्य परीक्षणमार्फत जटिल रोग समयमै पत्ता लगाउने अभ्यास विकसित भएकाले पनि विदेशीहरूले कोरियाको स्वास्थ्य प्रणालीप्रति विश्वास बढाएको विशेषज्ञहरूको भनाइ छ।

स्वास्थ्य परीक्षणका लागि कोरिया पुगेका धेरै विदेशीले आफ्नो अनुभव सकारात्मक रहेको बताउँछन्। केही घण्टाभित्र सम्पूर्ण परीक्षण सम्पन्न हुने, प्रत्येक चरणमा धेरै समय कुर्नु नपर्ने र चिकित्सक तथा स्वास्थ्यकर्मीको व्यवहार व्यावसायिक र सहयोगी रहेको उनीहरूको अनुभव छ। परीक्षण सकिएपछि उनीहरूले सोही दिन घुमघाम, किनमेल वा अन्य गतिविधि पनि सहज रूपमा गर्न सकेका छन्।

विदेशी बिरामीलाई भाषा समस्या नहोस् भनेर धेरै अस्पतालले अंग्रेजी सेवा, दोभाषे र मेडिकल कन्सियर्ज सुविधा उपलब्ध गराएका छन्। परीक्षणको रिपोर्ट पनि अंग्रेजीमै उपलब्ध गराइने भएकाले बिरामीले आफ्नै देशका चिकित्सकसँग थप परामर्श गर्न सजिलो हुने गरेको छ। आवश्यक परे थप उपचारका लागि ठूला अस्पतालमा रेफर गर्ने व्यवस्था पनि रहेको छ।

यही कारणले दक्षिण कोरिया अहिले केवल के-ब्युटी र के-पपको गन्तव्य मात्र नभई आधुनिक, सुलभ र विश्वसनीय स्वास्थ्य सेवाको केन्द्रका रूपमा पनि अन्तर्राष्ट्रिय स्तरमा तीव्र रूपमा परिचित बन्दै गएको छ।