४५ लाख मूल्यमा लिपमोटर बीओ-थ्री-एक्स सार्वजनिक: कस्तो छ यसको रेन्ज र विशेषता?

काठमाडौं । नाइमा नेपाल मोबिलिटी एक्स्पोको अवसर पारेर नेपाली बजारमा नयाँ विद्युतीय सवारीसाधन ‘लिपमोटर बीओ-थ्री-एक्स’ सार्वजनिक भएको छ।

नेपालका लागि यस गाडीको आधिकारिक वितरक सांग्रिला मोटर्स प्रालिले एक्स्पोको मञ्चबाट यस गाडीलाई सार्वजनिक गर्दै बुकिङ प्रक्रियासमेत सुरु गरेको छ।

‘इन्टेलिजेन्ट अर्बन मोबिलिटी’ अर्थात् सहरी आवागमनलाई थप बुद्धिमानी बनाउने अवधारणामा आधारित यो एसयूभी नेपाली उपभोक्ताका लागि नयाँ विकल्पका रूपमा आएको हो।

सडकको अवस्थालाई मध्यनजर गर्दै यस गाडीमा १९० मिलिमिटरको ग्राउन्ड क्लियरेन्स दिइएको छ, जसले नेपाली बाटोमा ढुक्कसँग यात्रा गर्न सघाउँछ। पाँचवटा फरक रङको विकल्पमा उपलब्ध यस गाडीमा ५१० लिटरको विशाल बुट स्पेस र फराकिलो भित्री भाग (केबिन) छ, जसले गर्दा यात्रुहरूले आरामदायी महसुस गर्नेछन्।

प्राविधिक पक्षमा निकै बलियो देखिएको यो गाडीमा १४५ किलोवाट क्षमताको शक्तिशाली मोटर र ५३ किलोवाट आवरको ब्याट्री जडान गरिएको छ। कम्पनीको दाबी अनुसार, एक पटकको पूर्ण चार्जमा यसले ५०५ किलोमिटरसम्मको लामो यात्रा तय गर्न सक्छ। सुरक्षाको हकमा यसमा लेभल-२ स्तरको चालक सहायता प्रणाली राखिएको छ, जसले चालकलाई सुरक्षित र भरपर्दो अनुभव प्रदान गर्ने अपेक्षा गरिएको छ।

विश्वप्रसिद्ध अटोमोबाइल समूह स्टेलान्टिसको सहकार्यमा निर्मित यो गाडीले अन्तर्राष्ट्रिय बजारमा आफ्नो छुट्टै पहिचान बनाइसकेको छ। चिनियाँ विद्युतीय सवारी ब्रान्ड लिपमोटरले विश्वभर १६ लाखभन्दा बढी सवारीसाधन बिक्री गरिसकेको र हाल ४० भन्दा बढी देशमा आफ्नो सेवा विस्तार गरिसकेको छ।

सांग्रिला मोटर्सका अनुसार, यो गाडी खरिद गर्ने पहिलो एक सय जना ग्राहकका लागि कम्पनीले ४४ लाख ९९ हजार रुपैयाँको विशेष मूल्य तोकेको छ। आधुनिक प्रविधि, उत्कृष्ट रेन्ज र किफायती मूल्यका कारण लिपमोटर बीओ-थ्री-एक्सले नेपाली विद्युतीय सवारीको बजारमा नयाँ हलचल ल्याउने अनुमान गरिएको छ।