नेपालमा ‘कनेक्टेड भेहिकल’को युग सुरु, एनसेल र साइमेक्सबीच ऐतिहासिक साझेदारी

नेपालमा ईभी यात्रा अब थप स्मार्ट र डिजिटल बन्दैछ, जहाँ एनसेलको आईओटी प्रविधिमार्फत बीवाईडीका सवारी साधनहरू प्रत्यक्ष रूपमा इन्टरनेटसँग जोडिएका छन्।

काठमाडाैँ । नेपालको अटोमोबाइल र दूरसञ्चार क्षेत्रमा एउटा नयाँ र दूरगामी महत्त्वको अध्यायको थालनी भएको छ। विद्युतीय सवारी साधनको बजारमा तहल्का मच्चाइरहेको ब्रान्ड बीवाईडी र दूरसञ्चार सेवा प्रदायक एनसेलबीच एक विशेष साझेदारी भएको छ, जसले नेपाली सडकमा गुड्ने गाडीहरूलाई पूर्ण रूपमा ‘स्मार्ट’ र कनेक्टेड बनाउनेछ।

यो सहकार्यमार्फत अब नेपालमा बिक्री हुने प्रत्येक नयाँ बीवाईडी गाडीमा एनसेलको इन्टरनेट अफ थिंक्स अर्थात आईओटी सिम स्वतः जडान भएर आउने भएको छ। यसले गर्दा चालक तथा यात्रीहरूले गाडीभित्रैबाट अनलाइन दुनियाँको अनुपम आभास गर्न सक्नेछन्।

राजधानीको काठमाडौँमा आयोजित एक भव्य कार्यक्रमका बीच दुई कम्पनीबीच यो सम्झौतामा हस्ताक्षर भएको हो। पछिल्लो समय प्रविधिको विकाससँगै विश्वभर कनेक्टेड कारको अवधारणा तीव्र रूपमा अगाडि बढिरहेको छ। नेपालमा पनि यसको प्रवर्द्धन गर्ने उद्देश्यले चालिएको यो कदमले डिजिटल इनोभेसनको क्षेत्रमा ठूलो फड्को मारेको छ।

गाडीमा छुट्टै बाह्य उपकरण जडान गर्नुपर्ने वा मोबाइलको वाई-फाई हटस्पट खोज्नुपर्ने झन्झट अब पूर्ण रूपमा अन्त्य भएको छ।

सहज मनोरञ्जन र भरपर्दो नेभिगेसन

यो प्रविधिको मुख्य विशेषता भनेको सवारी साधनको आफ्नै सिस्टमबाटै विभिन्न डिजिटल मनोरञ्जनका साधनहरू प्रयोग गर्न पाउनु हो। प्रयोगकर्ताले अब कुनै पनि झन्झटबिना गाडीको स्क्रिनबाटै युट्युब भिडियोहरू हेर्न, स्पोटिफाइमार्फत मनपर्ने संगीत सुन्न तथा लामो यात्रालाई रमाइलो बनाउन काराओकेको आनन्द लिन सक्नेछन्।

बीवाईडीको आफ्नै एप इकोसिस्टम र आधुनिक इन्फोटेनमेन्ट सुविधाहरूलाई यसले थप प्रभावकारी रूपमा सपोर्ट गर्नेछ।

सहरको अत्यधिक ट्रिफिक जाममा बस्नुपर्दा होस् वा लामो दूरीको यात्रा तय गर्दा, स्थानीय नेटवर्कमा आधारित यो प्रविधिले उत्कृष्ट र भरपर्दो नेभिगेसन सेवा प्रदान गर्छ। एनसेलको देशव्यापी रूपमा फैलिएको बलियो मोबाइल नेटवर्क कभरेजका कारण ग्राहकहरूले नेपालका जुनसुकै कुनामा पनि निर्बाध रूपमा यो सेवा उपभोग गर्न सक्नेछन्। यद्यपि, नेटवर्कको पहुँच, भौगोलिक बनावट र गाडीको मोडल अनुसार प्रयोगकर्ताको अनुभव केही फरक भने हुन सक्नेछ।

पुरानो गाडीधनीलाई पनि विशेष सुविधा

यो सहकार्यको अर्को रोचक पक्ष के छ भने, यसबाट केवल नयाँ गाडी खरिद गर्नेहरू मात्र लाभान्वित हुनेछैनन्। यसअघि नै बजारमा आइसकेका र बीवाईडीका पुराना सवारी साधन चलाइरहेका ग्राहकहरूले पनि यो अत्याधुनिक सुविधाको लाभ लिन सक्नेछन्। त्यसका लागि नेपालभर फैलिएका १३ वटा आधिकारिक सर्भिस सेन्टरहरूमा गएर आफ्नो हालको गाडीमा एनसेलको आईओटी सिम जडान गराउन सकिने व्यवस्था मिलाइएको छ।

कार्यक्रममा बोल्दै एनसेलका चिफ कन्ज्युमर बिजनेस अफिसर उपाङ्ग दत्ताले यो साझेदारीले सवारी साधनहरूमा स्मार्ट कनेक्टिभिटी, इन्फोटेनमेन्ट र सुरक्षाको नयाँ आयाम थप्ने बताए। उनले ग्राहकहरूलाई बाह्य डेटा वा हटस्पटमा भर पर्नुपर्ने बाध्यता हटाएर सहज र सुरक्षित ड्राइभिङ अनुभव दिन यो प्रविधि कोसेढुङ्गा साबित हुने विश्वास व्यक्त गरे।

त्यस्तै, साइमेक्स इन्क प्राइभेट लिमिटेडका प्रमुख कार्यकारी अधिकृत साहिल श्रेष्ठले बीवाईडी सधैँ प्राविधिक नवप्रवर्तनमा अग्रपङ्क्तिमा रहेको उल्लेख गर्दै एनसेलसँगको सहकार्यले गाडीको स्वामित्व लिने अनुभवलाई थप उचाइमा पुर्याउने धारणा राखे।

गाडीको मोडल, सफ्टवेयर भर्जन र आवश्यकता अनुसार कनेक्टिभिटी प्लान, त्यसको वैधता र शुल्कसम्बन्धी अन्य विवरणहरू भने सम्बन्धित सेवा प्याकेजमा निर्भर हुनेछन्। समग्रमा, यो सहकार्यले नेपालको यातायात क्षेत्रलाई केवल विद्युतीय मात्र होइन, बौद्धिक र प्रविधिमैत्री बनाउन ऐतिहासिक भूमिका खेल्ने निश्चित जस्तै देखिएको छ।