करदाता प्रोत्साहन उपहार कार्यक्रम : २ जनाले जिते १०/१० लाख, ३१ जनालाई १/१ लाख रुपैयाँ

काठमाडौं । करदातालाई नियमित रूपमा करसम्बन्धी दायित्व पूरा गर्न प्रोत्साहित गर्ने उद्देश्यले सञ्चालन गरिएको करदाता प्रोत्साहन उपहार कार्यक्रमअन्तर्गत भदौ महिनाका ३३ जना विजेताको नतिजा सार्वजनिक गरिएको छ।

आन्तरिक राजस्व विभाग, लाजिम्पाटमा आयोजित कार्यक्रममा भदौ महिनाका घोषणा हुन बाँकी रहेका सबै विजेताको नतिजा एकैपटक सार्वजनिक गरिएको हो।

सार्वजनिक विवरणअनुसार नियमिततर्फ छनोट भएका ३१ जना विजेताले जनही १ लाख ३३ हजार ३३४ रुपैयाँ पुरस्कार प्राप्त गर्नेछन्। यस्तै, बम्पर पुरस्कारका लागि छनोट भएका दुई जनाले प्रतिव्यक्ति १० लाख रुपैयाँ पाउनेछन्।

विभागका अनुसार भदौ १ देखि १५ गतेसम्म भएको कारोबारका आधारमा १५ जना नियमित विजेता छनोट भएका छन्। सोही अवधिबाट एक जना बम्पर विजेता पनि चयन गरिएको छ।

त्यसैगरी, भदौ १६ देखि ३१ गतेसम्मको कारोबारलाई आधार बनाएर थप १६ जना नियमित विजेता छनोट गरिएको छ। उक्त अवधिबाट अर्को एक जना बम्पर विजेता पनि चयन गरिएको विभागले जनाएको हो।

यसरी भदौ महिनामा कुल ३१ जना नियमित र दुई जना बम्पर गरी ३३ जना विजेता छनोट भएका हुन्।

भदौ १६ गतेका लागि तय गरिएको उपहार विजेता छनोट तथा घोषणा कार्यक्रम भने रसुवास्थित भोटेकोशी नदीमा आएको भीषण बाढीका कारण स्थगित भएको थियो। कार्यक्रम स्थगित भएपछि त्यस दिन सार्वजनिक हुनुपर्ने नतिजासमेत रोकिएको थियो। स्थगित कार्यक्रमबाट घोषणा हुन बाँकी रहेका विजेतासहित भदौ महिनाका सबै विजेताको नतिजा आज असोज १ गते आयोजित कार्यक्रममा सार्वजनिक गरिएको विभागले जनाएको छ।

विजेता बनेका करदाताले आफूलाई उपलब्ध गराइएको कुपन नम्बरमार्फत पुरस्कारको नतिजा जाँच गर्न सक्नेछन्। मोबाइल बैंकिङ सेवा वा डिजिटल वालेटमा प्राप्त कुपन नम्बर हेरेर विभागले तोकेको सम्बन्धित माध्यमबाट आफ्नो नाम तथा पुरस्कारबारे जानकारी लिन सकिने व्यवस्था गरिएको छ।

आन्तरिक राजस्व विभागले चालु आर्थिक वर्ष २०८३/८४ देखि करदाता प्रोत्साहन उपहार कार्यक्रम कार्यान्वयनमा ल्याएको हो। कार्यक्रमको नियमित कार्यतालिकाअनुसार प्रत्येक महिनाको १ गते र १६ गते उपहार विजेता छनोट तथा घोषणा गर्ने व्यवस्था गरिएको छ। सोहीअनुसार भदौ १६ गते पनि विजेता घोषणा गर्ने तयारी भए पनि प्राकृतिक विपद्का कारण कार्यक्रम रोकिएको थियो।

विभागले स्थगित कार्यक्रमबाट घोषणा हुन बाँकी रहेका विजेताको नतिजालाई समेत असोज १ गतेको कार्यक्रममा समेटेर सार्वजनिक गरेको हो।