भारत भ्रमणको दोस्रो दिन अर्थमन्त्री वाग्लेको व्यस्तता, यस्तो छ आजको कार्यतालिका

काठमाडौँ। अर्थमन्त्री डा. स्वर्णिम वाग्लेको भारत भ्रमणको दोस्रो दिन आज महत्त्वपूर्ण कूटनीतिक र द्विपक्षीय भेटघाटमा उनी व्यस्त छन्। तीनदिने भ्रमणका लागि बिहीबार भारत वाग्ले भारत प्रस्थान गरेका थिए।

बिहीबार नै उनले भारतीय समकक्षी निर्मला सीतारमणसँग द्विपक्षीय भेटघाट गरेका थिए। भ्रमणको दोस्रो दिन आज (शुक्रबार) अर्थमन्त्री वाग्ले विभिन्न कार्यक्रममा सहभागी हुँने उनको सचिवालयले जानकारी दिएको छ।

आज बिहान ९ बजेदेखि नै उनको भेटघाटको व्यस्तता सुरु भएको थियो। बिहान पूर्वविदेशसचिव श्याम शरणले आयोजना गरेको उच्चस्तरीय कूटनीतिक संवाद कार्यक्रममा प्रमुख अतिथिका रूपमा सहभागीता जनाउने वाग्लेको समयतालिकामा उल्लेख छ।

आजै, अर्थमन्त्री वाग्लेले भारतीय विदेशमन्त्री डा. एस. जयशङ्करसँग भेटवार्ता गर्ने कार्यक्रम छ। भेटवार्ताको समय साँझ ५ बजेका लागि निर्धारण गरिएको छ। आजै अर्थमन्त्री वाग्ले भारत व्यापार संवर्धन सङ्गठनका अध्यक्ष जावेद अशरफले आयोजना गर्ने बृहत् भेटघाट कार्यक्रममा पनि सहभागी जनाउँदै छन्।

भारत मण्डपममा आयोजना हुने कार्यक्रममा नेपाल भारत आर्थिक सहकार्यका विभिन्न आयामबारे बृहत् र उच्चस्तरीय छलफल हुनेछ। अर्थमन्त्रीको उच्चस्तरीय तीनदिने भारत भ्रमणमा अर्थ मन्त्रालयका सहसचिव अमृत लम्साल, परराष्ट्र मन्त्रालयका सहसचिव गेहेन्द्र राजभण्डारी, नेपाली दूतावास नयाँ दिल्लीका उपनियोग प्रमुख डा. सुरेन्द्र थापा, इकोनोमिक मिनिस्टर तारानाथ अधिकारी र अर्थमन्त्रीका निजी उपसचिव कञ्चन बस्नेत सहभागी छन्।

भ्रमणको तेस्रो दिन शनिबार निजी क्षेत्र र अन्य उच्चस्तरीय भेटघाट गरेर अर्थमन्त्री नेतृत्वको प्रतिनिधि मण्डल नेपाल फर्कने कार्यक्रम छ ।