क्षेत्रीय निर्वाचनमा लज्जास्पद पराजयपछि जर्मनीका चान्सलर मर्जमाथि सत्ता जाेगाउनै दबाब

जनताको निराशा र दक्षिणपन्थी दलको उभारबीच जर्मनीका चान्सलर फ्रेडरिक मर्जको राजनीतिक भविष्य सङ्कटमा परेको छ।

काठमाडाैँ । सोमबार जर्मनीका चान्सलर फ्रेडरिक मर्ज सत्तामा टिकिरहनका लागि कडा संघर्ष गरिरहेका छन्। दाेस्राे विश्वयुध्द पश्चात् जर्मनीको इतिहासमा उनले नेतृत्व गरेको कन्जरभेटिभ पार्टीले क्षेत्रीय निर्वाचनमा अहिलेसम्मकै नराम्रो हार व्यहोरेपछि उनको राजनीतिक भविष्य संकटमा परेको हो।

यसका साथै उनको अलोकप्रिय सुधार एजेन्डालाई लिएर गठबन्धनका साझेदार दलहरूबीच पनि तीब्र विवाद चुलिएको छ।

मर्च स्वयंले उत्तरपूर्वी राज्य मेक्लेनबर्ग-वेस्टर्न पोमेरेनियामा आइतबार भएको पराजयलाई ‘आपत्तिजनक विपत्ति’ भनेका छन्। इतिहासमा पहिलो पटक उनको पार्टीले राज्यको संसदमा प्रवेशका लागि चाहिने ५ प्रतिशतको न्यूनतम सीमासमेत पार गर्न सकेन।

निर्वाचनमा दक्षिणपन्थी अतिवादी दल ‘अल्टरनेटिभ फर जर्मनी’ (एएफडी) पहिलो स्थान हासिल गर्न सफल भयो। यद्यपि यो दल बहुमतभन्दा धेरै पछाडि छ, तर एक महिनाभित्रै राज्यको निर्वाचनमा यो दलले दोस्रो पटक पहिलो स्थान ओगटेको छ। यसलाई एएफडीले राष्ट्रिय सत्ताको नजिक पुग्ने सिँढीको रूपमा लिएको छ।

यसैगरी बर्लिन राज्यमा भएको अर्को निर्वाचनमा पनि मर्जको पार्टीले ठूलो संख्यामा भोट गुमायो। त्यहाँ कुनै समय पूर्व जर्मनीमा शासन गर्ने कम्युनिस्ट पार्टीको उत्तराधिकारी मानिने अति वामपन्थी दल ‘डी लिङ्के’ले अधिकांश सिट जित्दै गठबन्धन सरकार बनाउने सम्भावना बढेको छ।

गठबन्धनमा खटपट

आइतबारको चुनावी परिणाम चान्सलर मर्जका लागि पूर्ण रूपमा पतन नै नभए पनि उनका घट्दो लोकप्रियता, अलोकप्रिय सुधारका कदमहरू र एएफडीको तीव्र उभारले उनको आगामी राजनीतिक यात्रालाई अनिश्चित बनाइदिएको छ।

गत हप्ता खुला पत्रमार्फत सार्वजनिक रूपमा मर्जलाई समर्थन गरेका कन्जरभेटिभ राज्यका केही प्रमुख मन्त्रीहरूले अवस्थाको समीक्षा गर्न आइतबार भेटघाट गरे। छलफलमा सहभागी एक व्यक्तिले रोयटर्सलाई बताए अनुसार उक्त बैठक चान्सलर मर्जविरुद्धको कुनै विद्रोह वा षड्यन्त्र थिएन।

तर, राज्यको निर्वाचनमा कन्जरभेटिभ पार्टी (सिडियु) को निराशाजनक नतिजा आएपछि चान्सलरले अब अझ धेरै ठोस काम गरेर देखाउनुपर्छ भन्नेमा सबै एकमत थिए।

आइतबार निर्वाचन परिणाम आउनासाथ टेलिभिजनमार्फत सम्बोधन गर्दै मर्जले युरोपको सबैभन्दा ठूलो अर्थतन्त्रलाई गति दिन र विश्वबजारमा प्रतिस्पर्धात्मक बनाउन आफ्ना सुधारका एजेन्डालाई जसरी पनि अगाडि बढाउने दृढता व्यक्त गरे। तर, उनका केन्द्र-वाम गठबन्धनका साझेदार दल, विशेष गरी सोसल डेमोक्रेटिक पार्टीका सदस्यहरूले यसको प्रतिवाद गरेका छन्।

मेक्लेनबर्ग-वेस्टर्न पोमेरेनियाकी लोकप्रिय बहालवाला राज्य प्रमुख म्यानुएला श्वेसिगले संघीय सरकारको पेन्सन सुधारका योजनाहरूको तीब्र आलोचना गरेकी छिन्।

चान्सलरको भनाइप्रति आफू निकै चिढिएको बताउँदै श्वेसिगले एआरडी ब्रोडकास्टरसँग भनिन् कि चान्सलरको तर्फबाट अब अझ बढी नम्रताको अपेक्षा गरिएको छ।

आप्रवासी समुदायमा चिन्ता

एएफडी पार्टी राष्ट्रिय जनमत सर्वेक्षणमा अगाडि छ, तर अन्य मुख्य दलहरूले यससँग सहकार्य गर्न अस्वीकार गर्दै आएका कारण यो दल अहिलेसम्म सत्ता बाहिरै छ। यसलाई ‘फायरवाल’ नीति भनिन्छ, तर एएफडीको शक्ति बढ्दै जाँदा यो नीतिमाथि पनि प्रश्न उठ्न थालेको छ।

आप्रवासनप्रतिको यसको कडा अडानले जर्मनीमा बसोबास गर्ने आप्रवासी पृष्ठभूमीका मानिसहरूलाई उनीहरूको भविष्यप्रति सशंकित बनाएको छ।

मेक्लेनबर्ग-वेस्टर्न पोमेरेनियाको राजधानी स्वेरिनमा आप्रवासी संगठनले आयोजना गरेको एक चुनावी कार्यक्रममा सहभागी शिक्षाविद् यास्मिन गौडार्जीले भनिन् कि एएफडीको यो अग्रता जर्मनीका लागि एक तीतो सत्य हो जसलाई पचाउन निकै गाह्रो भइरहेको छ।

बर्लिनमा भने न्युयोर्कका मेयर जोहरान मामदानीको उदयसँग मिल्दोजुल्दो शैलीमा कर्पोरेट घरधनीहरूबाट आवासहरूलाई राष्ट्रियकरण गर्ने र भाडामा सीमा लगाउने एजेन्डासहित चुनावी मैदानमा उत्रिएको ‘डी लिङ्के’ पार्टीले पहिलो पटक राज्य निर्वाचनमा जित हासिल गरेको छ।

सन् १९८० मा टर्कीमा भएको कु सैनिक विद्रोहबाट भागेका बामपन्थी टर्कीली बाबुआमाकी ४५ वर्षीया छोरी तथा डी लिङ्केकी मुख्य उम्मेदवार एलिफ इरालपले जितपछि भनिन् कि आजदेखि हामी सँगै बर्लिनलाई बदल्दैछौं।

मतदाताको असन्तुष्टि

जर्मनीको सुस्त अर्थतन्त्रलाई पुनः विकासको गतिमा फर्काउने वाचाका साथ गत वर्ष निर्वाचित भएका मर्जले मतदाताहरूको विश्वास जित्न कठिन संघर्ष गरिरहेका छन्। सञ्चार क्षेत्रमा भएका केही कमजोरी र पेन्सन, कर तथा स्वास्थ्य क्षेत्रमा गरिएका अलोकप्रिय सुधारका कारण जनतामा सरकारप्रति वितृष्णा बढेको छ।

मेक्लेनबर्ग-वेस्टर्न पोमेरेनिया र बर्लिन दुवै ठाउँका चुनावी अभियानहरूमा जनताको मुख्य चासो बढ्दो उर्जा र आवासको लागतमा केन्द्रित थियो, जसले सरकारप्रतिको असन्तुष्टिलाई थप प्रष्ट्याएको छ। यद्यपि, भविष्यमा एसपीडीको राष्ट्रिय नेता बन्ने सम्भावना देखिएकी श्वेसिग भने आफ्नो राज्यको सत्तामा कायम रहने सम्भावना बलियो छ।

स्वेरिनमा भेटिएका डेट्लेफ स्पेल्कर नामक एक स्थानीय नागरिकले भने कि इतिहासको कक्षामा ध्यान नदिएका कारण नै एएफडीलाई भोट दिने विद्रोहीहरू जन्डिएको जस्तो लाग्छ र यसको परिणाम अर्कै होला भन्ने सोचेको थिएँ।

उनले थपे कि हामी करिब १०० वर्षअघि पनि यस्तै अवस्थाबाट गुज्रिसकेका छौँ जहाँ महँगी थियो, रोजगारीको समस्या थियो र कसैसँग पैसा थिएन, अब यसले के परिणाम ल्याउँछ त्यो हेर्न बाँकी नै छ र उनीहरूले जनताको अपेक्षा पूरा गर्न सक्छन् वा सक्दैनन् भन्नेमा शंका छ।