एआईको चपेटामा रोजगारीः १६ हजार कर्मचारी निकाल्दै विश्वकै सबैभन्दा ठूलो ई-कमर्स अमेजन
काठमाडाैं । अमेजनले बुधबार विश्वभरबाट १६,००० कर्मचारी कटौती गर्ने घोषणा गरेको छ।
महामारीको समयमा अत्यधिक भर्ना गरिएका कर्मचारीहरूको पुनर्संरचना गर्ने र आर्टिफिसियल इन्टेलिजेन्स (एआई) उपकरणहरूको प्रयोगलाई विस्तार गर्ने योजनाअन्तर्गत तीन महिनाभित्रै कम्पनीले गरेको यो दोस्रो ठूलो कटौती हो।
रोयटर्सले गत हप्ता नै रिपोर्ट गरेअनुसार अमेजनले करिब ३० हजार कर्पोरेट पदहरू हटाउने बृहत्तर लक्ष्यको हिस्सा स्वरूप यो दोस्रो चरणको कटौतीको योजना बनाएको थियो। यस कटौतीले विशेष गरी अमेजन वेब सर्भिस, रिटेल, प्राइम भिडियो र मानव संशाधन (एचआर) विभागका कर्मचारीहरूलाई असर गर्ने अपेक्षा गरिएको छ।
अमेजनले गत अक्टोबरको अन्त्यमा १४ हजार ह्वाइट-कलर (बौद्धिक कार्य गर्ने) पदहरू कटौती गरेको थियो। त्यस समयमा सीईओ एन्डी जसीले कम्पनीको सञ्चालन तहलाई घटाएर र व्यवस्थापकहरूको संख्या कम गरेर अनावश्यक नोकरशाही हटाउनुपर्ने आवश्यकतामा जोड दिएका थिए।
एआईको बढ्दो प्रयोग यो कर्मचारी कटौतीले आर्टिफिसियल इन्टेलिजेन्सले कसरी कर्पोरेट कार्यबलको गतिशीलतालाई परिवर्तन गर्दैछ भन्ने कुरालाई पनि प्रष्ट पारेको छ। एआई सहायकहरूमा भएको महत्वपूर्ण सुधारले कम्पनीहरूलाई सामान्य प्रशासनिक कार्यदेखि जटिल कोडिङ समस्याहरूसम्म तीव्र गति र सटिकताका साथ सम्पन्न गर्न मद्दत गरिरहेको छ, जसले यसको व्यापक प्रयोगलाई बढावा दिएको छ।
सीईओ जसीले गत वर्षको ग्रीष्मकालमा एआई उपकरणहरूको बढ्दो प्रयोगले धेरै कार्यहरू स्वचालित हुने र यसले कर्पोरेट जागिरहरू गुम्न सक्ने बताउनुभएको थियो।
यसै महिनाको सुरुमा विश्व आर्थिक मञ्चको वार्षिक बैठकमा शीर्ष अधिकारीहरूले केही जागिरहरू हराए पनि नयाँ अवसरहरू सिर्जना हुने बताएका थिए। यद्यपि, दुई अधिकारीले रोयटर्सलाई बताएअनुसार पहिले नै कर्मचारी कटौती गर्ने योजना बनाएका कम्पनीहरूले एआईलाई एउटा बहानाको रूपमा मात्र प्रयोग गरिरहेका छन्।
अमेजनका कुल १५.८ लाख कर्मचारीमध्ये यो ३० हजारको कटौती सानो हिस्सा भए तापनि यसले कम्पनीको कर्पोरेट कार्यबलको झण्डै १० प्रतिशत प्रतिनिधित्व गर्दछ। अमेजनका अधिकांश कामदारहरू भने सामान प्याकिङ गर्ने केन्द्र र गोदामहरूमा कार्यरत छन्।
अमेजन र फेसबुकको मातृ कम्पनी मेटा प्ल्याटफर्म्स जस्ता प्रविधि क्षेत्रका दिग्गजहरू अहिले यस्तै पुनर्संरचनाको प्रक्रियामा रहेका छन्।
