पूर्वअर्थमन्त्री डा. प्रकाश शरण महतले नुवाकोटबाट गरे मतदान
नुवाकोट । नेपाली कांग्रेसका नेता एवं पूर्वअर्थमन्त्री डा. प्रकाश शरण महतले प्रतिनिधि सभा सदस्य निर्वाचन २०८२ का लागि आफ्नो मताधिकार प्रयोग गरेका छन्।
नुवाकोट निर्वाचन क्षेत्र नम्बर १ का प्रत्यक्षतर्फका उम्मेदवार समेत रहेका महतले पञ्चकन्या गाउँपालिका–२ स्थित राष्ट्रिय माध्यमिक विद्यालयको मतदान केन्द्रमा पुगेर मतदान गरेका हुन्।
आफ्नै गृहक्षेत्रमा मतदान गरेपछि संक्षिप्त प्रतिक्रिया दिँदै डा. महतले मतदानलाई नागरिकको अधिकार मात्र नभई लोकतन्त्रप्रतिको महत्वपूर्ण कर्तव्यको रूपमा व्याख्या गरे।
“आज आफ्नो अमूल्य मताधिकार प्रयोग गरेँ। मतदान केवल अधिकार मात्र होइन, यो हाम्रो लोकतन्त्रप्रतिको कर्तव्य पनि हो,” उनले भने, “सचेत नागरिकका रूपमा सबैले मतदान गरेर आफ्नो आवाज व्यक्त गरौँ।”
नुवाकोटमा उनी र विपक्षी दलका उम्मेदवारहरूबीच कडा प्रतिस्पर्धा देखिएको छ। डा. महतले बिहानै मतदान केन्द्र पुगेर स्थानीय मतदाताहरूसँग भेटघाट समेत गरेका थिए। जिल्लाका अन्य क्षेत्रमा पनि मतदान कार्य उत्साहजनक र शान्तिपूर्ण रूपमा अघि बढिरहेको छ।
