रुकुमपूर्वमा प्रचण्ड १ हजारभन्दा बढी मतान्तरले अगाडि
रुकुमपूर्व । प्रतिनिधिसभा सदस्य निर्वाचनको प्रारम्भिक मतगणनामा रुकुम पूर्व–१ बाट नेपाली कम्युनिष्ट पार्टीका अध्यक्ष पुष्पकमल दाहाल ‘प्रचण्ड’ ले आफ्नो पकड बलियो बनाएका छन्।
सुरुवाती चरणदेखि नै अग्रस्थानमा रहेका प्रचण्डले आफ्ना निकटतम प्रतिस्पर्धीहरूलाई निकै पछाडि छाड्दै बलियो अग्रता हासिल गरेका हुन्।
पछिल्लो मत परिणाम अनुसार प्रचण्डले १ हजार ४ सय ९५ मत प्राप्त गरी शीर्ष स्थान सुरक्षित बनाएका छन्। उनले नेकपा (एमाले) का उम्मेदवार लिलामणि गौतमलाई १ हजार ६४ मतको फराकिलो अन्तरले पछि पारेका हुन्। एमालेका गौतमले हालसम्म ४ सय ३१ मत मात्र प्राप्त गर्न सकेका छन्।
यसैगरी, प्रतिस्पर्धाको तेस्रो स्थानमा नेपाली कांग्रेसकी उम्मेदवार कुसुम देवी थापा रहेकी छन्। थापाले हालसम्म ४ सय १७ मत प्राप्त गरी आफ्नो उपस्थिति कायम बनाएकी छन्।
