मुर्माटपमा नेपाल टेलिकमको फोरजी सेवा सञ्चालन
काठमाडौं। नेपाल टेलिकमले मुगु जिल्लाको प्रसिद्ध पर्यटकीय स्थल राराताल नजिक रहेको मुर्माटपमा फोरजी सेवा सञ्चालनमा ल्याएको छ। कम्पनीका अनुसार उक्त सेवा असार १५ गतेदेखि औपचारिक रूपमा सुरु गरिएको हो।
रारा राष्ट्रिय निकुञ्जभित्र रहेको मुर्माटप रारातालको मनोरम दृश्यावलोकनका लागि लोकप्रिय गन्तव्य मानिन्छ। रारातालबाट केही घण्टाको पदयात्रापछि पुग्न सकिने यस स्थानबाट राराताल, विभिन्न हिमशृंखला तथा कर्णाली र सुदूरपश्चिम प्रदेशका प्राकृतिक दृश्य अवलोकन गर्न सकिन्छ।
फोरजी सेवा विस्तारसँगै पर्यटक, स्थानीय बासिन्दा तथा पदयात्रीहरूले उच्च गतिको मोबाइल इन्टरनेट सेवा सहज रूपमा प्रयोग गर्न सक्ने नेपाल टेलिकमले जनाएको छ। यस सेवाले मुर्माटप क्षेत्रसँगै ट्रेकिङ मार्गमा समेत भरपर्दो सञ्चार सुविधा उपलब्ध गराउने कम्पनीको विश्वास छ। अब पर्यटकहरूले आफ्नो यात्रा अनुभव, तस्बिर, भिडियो तथा प्रत्यक्ष प्रसारण (लाइभ अपडेट) सामाजिक सञ्जालमार्फत सहज रूपमा साझा गर्न सक्नेछन्।
कम्पनीका अनुसार आधुनिक दूरसञ्चार सेवाको पहुँच विस्तारले रारा क्षेत्रको पर्यटन प्रवर्द्धनमा समेत टेवा पुग्ने अपेक्षा गरिएको छ। साथै, स्थानीय होटल, होमस्टे, व्यवसायी तथा सेवाग्राहीहरूले विभिन्न डिजिटल सेवाको उपयोग सहज रूपमा गर्न सक्ने भएकाले स्थानीय आर्थिक गतिविधिमा पनि सकारात्मक प्रभाव पर्ने विश्वास गरिएको छ।
फोरजी सेवा सञ्चालनका लागि जडान गरिएको टावरले मुर्माटप क्षेत्रमा मात्र नभई हुम्ला, बाजुरा लगायतका दुर्गम हिमाली क्षेत्रमा दूरसञ्चार सेवा विस्तारका लागि रिपिटर स्टेशनको रूपमा समेत काम गर्नेछ। यसबाट कर्णाली तथा सुदूरपश्चिम प्रदेशमा नेपाल टेलिकमका मोबाइल तथा डाटा सेवाको गुणस्तर र पहुँच थप सुदृढ हुने कम्पनीले जनाएको छ।
नेपाल टेलिकमले देशका सुगमदेखि अति दुर्गम क्षेत्रसम्म आधुनिक दूरसञ्चार सेवा तथा सूचना प्रविधिको पहुँच विस्तार गर्ने अभियानलाई निरन्तरता दिँदै आएको जनाएको छ। कम्पनीले आगामी दिनमा पनि सेवाको पहुँच, गुणस्तर र विश्वसनीयता अभिवृद्धि गर्दै डिजिटल नेपालको परिकल्पना साकार बनाउन प्रतिबद्ध रहने उल्लेख गरेको छ।
