न्यूयोर्कमा नेपालको सन्देश– प्रविधिको दुरुपयोग रोक्न वैश्विक सहकार्य
साइबर अपराध र अन्तरदेशीय संगठित अपराधजस्ता आधुनिक सुरक्षा चुनौती सामना गर्न विश्वभरका प्रहरीबीच बलियो र एकीकृत सहकार्य अनिवार्य भएको नेपाल प्रहरीका प्रमुखले औंल्याए।
काठमाडौँ । संयुक्त राज्य अमेरिकामा आयोजित संयुक्त राष्ट्रसंघीय प्रहरी शिखर सम्मेलनमा नेपालले विश्वव्यापी शान्ति र सुरक्षाका लागि अन्तर्राष्ट्रिय प्रहरी नेटवर्कलाई अझ मजबुत बनाउनुपर्ने धारणा राखेको छ।
सम्मेलनलाई सम्बोधन गर्दै नेपाल प्रहरीका महानिरीक्षक दानबहादुर कार्कीले बदलिँदो सुरक्षा चुनौतीलाई कुनै एउटा देशको एकल प्रयासले मात्रै परास्त गर्न नसक्ने स्पष्ट पारे।
खासगरी साइबर अपराध, मानव बेचबिखन, र प्रविधिको दुरुपयोग गरेर फैलाइने अन्तरदेशीय संगठित अपराध अहिलेको विश्वका साझा सत्रु भएको उनको भनाइ थियो।
यस्ता जटिल चुनौतीहरू सामना गर्न विश्वभरका सुरक्षा निकायहरूबीच सूचनाको आदान-प्रदान र संयुक्त तालिम अपरिहार्य भइसकेको तर्फ उनले सबैको ध्यानाकर्षण गराए।
शान्ति मिसनको गौरव
नेपाल प्रहरीले विगत लामो समयदेखि राष्ट्रसंघीय शान्ति मिसनहरूमा प्रदर्शन गर्दै आएको उच्च व्यावसायिकता र अनुशासनको विरासतलाई महानिरीक्षक कार्कीले विश्वमञ्चमा पुनः स्मरण गराए।
उनले विश्वमा न्याय र शान्ति स्थापनाका लागि नेपाल सधैं अग्रपंक्तिमा उभिने दृढता व्यक्त गरे। नेपाल प्रहरीलाई आधुनिक र समयानुकूल बनाउने प्रयास भइरहेको जानकारी दिँदै उनले सुरक्षा संगठनमा महिलाहरूको सहभागिता बढाउने र मानव अधिकारको उच्च सम्मान गर्ने विषयलाई प्राथमिकतामा राखिएको बताए।
समुदाय र प्रहरीबीचको साझेदारीलाई बलियो बनाउँदै विधिको शासन कायम राख्न नेपाल प्रहरी कटिबद्ध रहेको उनले उल्लेख गरे।
सुरक्षित विश्वका लागि साझा आह्वान
परम्परागत सुरक्षा रणनीतिले मात्रै आधुनिक अपराधको सञ्जाल तोड्न नसकिने भएकाले सदस्य राष्ट्रहरूबीच बलियो आपसी विश्वास र समन्वय हुनुपर्नेमा नेपालको जोड थियो।
महानिरीक्षक कार्कीले आर्थिक अपराध र आतंकवाद जस्ता चुनौतीले विश्वका कुनै पनि कुना सुरक्षित नरहेको संकेत गर्दै सुरक्षित र न्यायपूर्ण संसार निर्माणका लागि सबै मुलुकहरू एकजुट हुनुपर्ने समय आएको बताए।
आपसी साझेदारीलाई अझ बढी प्रभावकारी बनाएरमात्रै आगामी पुस्ताका लागि शान्तिपूर्ण धर्ती छाड्न सकिने धारणाका साथ उनले वैश्विक ऐक्यबद्धताका लागि आह्वान गरे।
