ट्रम्पले क्रिप्टोसम्बन्धी विधेयक पारित गर्न आग्रह गरेपछि बिटक्वाइन र इथरको मूल्यमा उछाल

काठमाडौँ। अमेरिकी राष्ट्रपति डोनाल्ड ट्रम्पले क्रिप्टोकरेन्सी उद्योगलाई थप प्रोत्साहन गर्ने अपेक्षा गरिएको विधेयक पारित गर्न कंग्रेसलाई आग्रह गरेपछि प्रमुख डिजिटल मुद्राको मूल्यमा उल्लेख्य वृद्धि देखिएको छ। बिटक्वाइन र इथरसहितका क्रिप्टोकरेन्सीमा लगानीकर्ताको आकर्षण बढ्दा बजारमा सकारात्मक प्रभाव परेको हो।

बिटक्वाइनको मूल्य करिब ५.२ प्रतिशतले उकालो लाग्दै ७१ हजार ८८० अमेरिकी डलरको आसपास पुगेको छ। यस्तै, बजार पुँजीकरणका आधारमा दोस्रो स्थानमा रहेको इथरको मूल्य ९ प्रतिशतभन्दा बढी बढेर २ हजार २८८.९१ डलर पुगेको छ।

यद्यपि, हालको बिटक्वाइन मूल्य सन् २०२६ को जनवरीमा पुगेको करिब ९४ हजार ८२० डलरको उच्चस्तरभन्दा अझै निकै तल छ। त्यस्तै, गत वर्ष अक्टोबर ६ मा कायम भएको १ लाख २६ हजार १९८ डलरको सर्वकालीन उच्च मूल्यको तुलनामा पनि बिटक्वाइन ठूलो अन्तरमा पछाडि छ।

यसैबीच, ट्रम्प प्रशासनले ‘पर्पेचुअल फ्युचर्स’ कारोबारका लागि चर्चित विकेन्द्रीकृत एक्सचेन्ज हाइपरलिक्विडमाथि नियमन लागू गर्न सक्ने संकेत दिएको छ। उक्त समाचारपछि हाइपरलिक्विडको टोकनको मूल्य २४ घण्टाको अवधिमा करिब २५ प्रतिशतले बढेको कोइनगेको तथ्यांकले देखाएको छ।

अमेरिकी ट्रेजरी बन्डको प्रतिफलमा आएको गिरावटले पनि बिटक्वाइनसँग सम्बन्धित लगानी साधनमा कारोबार बढाएको छ। समाचार सार्वजनिक हुनुअघि नै आई सेयर्स बिट्क्वाइन ट्रस्टको कारोबार ३० दिनको औसतभन्दा ४.५ गुणाभन्दा बढी पुगेको थियो।

अमेरिकी ट्रेजरीले २० वर्षे र ३० वर्षे सरकारी बन्डको बाइब्याक बढाउने निर्णय गरेपछि दीर्घकालीन बन्डको यिल्ड घटेको हो। बजार विश्लेषकहरूका अनुसार यस्तो अवस्थामा लगानीकर्ताले तुलनात्मक रूपमा उच्च प्रतिफलको सम्भावना भएका बिटक्वाइनजस्ता जोखिमयुक्त सम्पत्तितर्फ ध्यान बढाउन सक्छन्।

स्ट्यान्डर्ड चार्टर्डका डिजिटल एसेट्स अनुसन्धान प्रमुख जेफ्री केन्ड्रिकले अमेरिकी ट्रेजरीको दीर्घकालीन ऋण व्यवस्थापनसम्बन्धी पछिल्लो कदमलाई बिटक्वाइनका लागि सकारात्मक संकेतका रूपमा व्याख्या गरेका छन्। उनका अनुसार सन् २०२६ को अन्त्यसम्म बिटक्वाइन १ लाख डलरको स्तरमा पुग्न सक्ने सम्भावनालाई लगानीकर्ताले ध्यानमा राख्नुपर्नेछ।

फन्डस्ट्राटका सहसंस्थापक तथा अनुसन्धान प्रमुख थोमस लीले पछिल्ला दिनमा क्रिप्टोकरेन्सी बजारमा देखिएको तीव्र उतारचढावले ठूलो परिमाणमा ‘सर्ट लिक्विडेसन’ गराएको बताएका छन्। उनका अनुसार यो इतिहासकै दोस्रो ठूलो सर्ट लिक्विडेसनमध्ये एक हो। मूल्यमा आएको तीव्र सुधारसँगै इथर पनि पछिल्लो तीन महिनाकै उच्च स्तरमा पुगेको उनको भनाइ छ।