देशको ऊर्जा खपतमा उत्साहजनक छलाङ, प्रतिव्यक्ति बिजुली प्रयोग ४१८ युनिट पुग्यो

काठमाडाैँ । नेपालमा ऊर्जाको प्रयोग र पहुँच निरन्तर फैलिँदै गएको छ। पछिल्लो एक वर्षको अवधिमा देशका नागरिकहरूको विद्युत् उपभोग गर्ने बानी र क्षमतामा उल्लेख्य वृद्धि देखिएको छ।

सरकारी तथ्यांक अनुसार गत आर्थिक वर्षमा नेपालको प्रतिव्यक्ति विद्युत् खपत ५.९८ प्रतिशतले बढेर ४१८.३१ युनिटमा पुगेको छ। यसअघि आर्थिक वर्षको आरम्भमा यो आँकडा ३९४.६९ युनिटमा सीमित रहेको थियो।

एक वर्षको अन्तरालमा औसतमा प्रत्येक नेपालीको भागमा करिब २४ युनिट बिजुलीको खपत थपिएको देखिन्छ।देशको ऊर्जा खपतमा उत्साहजनक छलाङ, प्रतिव्यक्ति बिजुली प्रयोग ४१८ युनिट पुग्यो

बिजुली बाल्ने र घरायसी तथा व्यावसायिक प्रयोजनमा ऊर्जा प्रयोग गर्नेहरूको संख्या फैलिँदै जानु नै प्रतिव्यक्ति खपत बढ्नुको प्रमुख कारण मानिएको छ। ऊर्जा विवरण अनुसार गत वर्ष मात्रै देशमा विद्युत उपभोक्ताको संख्या ३.३२ प्रतिशतले बढेको छ। एक वर्षको अवधिमा थप भएका २ लाखभन्दा बढी नयाँ प्रयोगकर्ताहरूसँगै कुल ग्राहक संख्या ६३ लाख ८३ हजार नाघेको छ। अघिल्लो वर्ष यो संख्या ६१ लाख ७८ हजारको हाराहारीमा रहेको थियो।

कुल उपभोक्तामध्ये ठूलो हिस्सा अर्थात करिब ५९ लाख घरधुरीले प्रत्यक्ष रूपमा केन्द्रीय प्राधिकरणको वितरण प्रणालीबाट बिजुली पाइरहेका छन् भने बाँकी साढे ४ लाखभन्दा बढी परिवारले ग्रामीण तथा सामुदायिक विद्युतीकरण कार्यक्रममार्फत सेवा लिइरहेका छन्।

पछिल्लो ६ वर्षको समग्र विकासक्रमलाई हेर्ने हो भने नेपालमा विद्युत्को पहुँच र उपभोक्ताको संख्या तीव्र गतिमा उकालो लागेको स्पष्ट हुन्छ। यसअघि ४५ लाखको संख्यामा रहेको ग्राहक आधार अहिले साढे ६३ लाख नजिक पुग्नुले देश ऊर्जा पहुँचको मामिलामा फड्को मार्दै गरेको देखाउँछ।

राष्ट्रिय प्रणालीबाट बिजुलीको उपलब्धता सहज बन्दै जाँदा बजारमा माग पनि सोही अनुपातमा बढेको छ। तथ्यांक अनुसार गत आर्थिक वर्षमा देशको समग्र विद्युत् बिक्री ९.६४ प्रतिशतले बढेर १२ अर्ब ३७ करोड युनिटभन्दा माथि पुगेको छ।

अघिल्लो वर्ष यस्तो बिक्री ११ अर्ब २८ करोड युनिटको वरिपरि थियो। प्राधिकरणका अधिकारीहरूका अनुसार नागरिकहरूको जीवनशैलीमा आएको फेरबदल, उद्योग तथा व्यावसायिक क्षेत्रमा ऊर्जाको बढ्दो प्रयोग र दूरदराजसम्म पुगेको प्रसारण लाइनका कारण समग्र ऊर्जा कारोबारमा यो नयाँ कीर्तिमान कायम भएको हो।