ग्लोबल फिनटेक अवार्ड्स २०२६: नेपालका पाँच फिनटेक कम्पनी अन्तर्राष्ट्रिय प्रतिस्पर्धामा

काठमाडौं। नेपालको तीव्र रूपमा विकसित हुँदै गएको फिनटेक क्षेत्रले अन्तर्राष्ट्रिय मञ्चमा थप महत्वपूर्ण पहिचान हासिल गरेको छ।

‘ग्लोबल फिनटेक अवार्ड्स (जीएफए) २०२६’ अन्तर्गत “रिजनल फिनटेक एक्सेलेन्स – बेस्ट फिनटेक फ्रम नेपाल” विधाका लागि नेपालका पाँच प्रविधि कम्पनीहरू सर्टलिस्ट (नामांकन) मा परेका छन्।

नामांकनमा पर्न सफल नेपाली कम्पनीहरूमा सिटिटेक ग्रुप प्राइभेट लिमिटेड, ईसेवा लिमिटेड, आईएमई खल्टी लिमिटेड, आइमार्क प्राइभेट लिमिटेड र फोनपे पेमेन्ट सर्भिस लिमिटेड रहेका छन्। अन्तर्राष्ट्रिय प्रतिस्पर्धामा नेपाली कम्पनीहरूको यो उल्लेखनीय सहभागिताले नेपालको डिजिटल वित्तीय क्षेत्रले हासिल गरेको प्रगति, नवप्रवर्तन र विश्वस्तरीय प्रतिस्पर्धात्मक क्षमतालाई उजागर गरेको छ।

अन्तर्राष्ट्रिय प्रतिस्पर्धामा नामांकित नेपाली फिनटेक कम्पनीहरू

सिटिटेक ग्रुप प्राइभेट लिमिटेड: नेपालमा डिजिटल भुक्तानी तथा फिनटेक पूर्वाधार निर्माणमा सक्रिय प्रविधि कम्पनीका रूपमा परिचित छ। यसको ‘फिनपोस’ लगायतका भुक्तानी तथा मर्चेन्ट प्रविधि समाधानहरूले बैंक, वित्तीय संस्था र व्यवसायहरूलाई डिजिटल भुक्तानी प्रणालीसँग जोड्न महत्वपूर्ण भूमिका खेल्दै आएका छन्।

ईसेवा लिमिटेड: नेपालको डिजिटल वालेट तथा डिजिटल भुक्तानी क्षेत्रमा अग्रणी कम्पनीमध्ये एक हो। डिजिटल वालेट, बिल भुक्तानी, डिजिटल कारोबार तथा विभिन्न वित्तीय सेवामार्फत ईसेवाले नेपालमा डिजिटल वित्तीय पहुँच विस्तारमा महत्वपूर्ण योगदान पुऱ्याउँदै आएको छ।

आईएमई खल्टी लिमिटेड: डिजिटल वालेट, भुक्तानी तथा वित्तीय प्रविधिका क्षेत्रमा आफ्नो उपस्थिति विस्तार गर्दै डिजिटल कारोबारलाई थप सहज, सुरक्षित र पहुँचयोग्य बनाउन योगदान दिँदै आएको छ।

आइमार्क प्राइभेट लिमिटेड: वित्तीय प्रविधि तथा डिजिटल समाधानमार्फत नेपालको फिनटेक इकोसिस्टममा आफ्नो उपस्थिति विस्तार गर्दै आएको छ। यसको अन्तर्राष्ट्रिय स्तरको नामांकनले नेपाली प्रविधि तथा फिनटेक कम्पनीहरूको विविधता र नवप्रवर्तन क्षमतालाई प्रतिनिधित्व गर्दछ।

फोनपे पेमेन्ट सर्भिस लिमिटेड: नेपालको डिजिटल भुक्तानी पूर्वाधार र ‘इन्टरओपरेबल पेमेन्ट नेटवर्क’ विकासमा महत्वपूर्ण भूमिका खेल्दै आएको कम्पनी हो। यसको नामांकनले नेपालमा डिजिटल भुक्तानीको विस्तार र वित्तीय प्रणालीको डिजिटल रूपान्तरणमा भएको प्रगतिलाई अन्तर्राष्ट्रिय मञ्चमा प्रस्तुत गरेको छ।

‘ग्लोबल फिनटेक फेस्ट २०२६’ आगामी ८ देखि ११ सेप्टेम्बर २०२६ सम्म भारतको मुम्बईस्थित जिओ वर्ल्ड सेन्टर / ट्राइडेन्ट बीकेसीमा आयोजना हुँदैछ।

आयोजकका अनुसार ‘ग्लोबल फिनटेक अवार्ड्स नाइट २०२६’ भने १० सेप्टेम्बर २०२६ को साँझ ६:०० बजेदेखि आयोजना हुनेछ। सोही विशेष समारोहका बीच विभिन्न विधाका विजेताहरूको घोषणा गरिनेछ।

नेपालका पाँच फिनटेक कम्पनीहरू एउटै अन्तर्राष्ट्रिय अवार्ड कार्यक्रमअन्तर्गत नामांकित हुनु नेपालको फिनटेक इकोसिस्टमका लागि ठूलो उपलब्धि हो। यसले नेपाली फिनटेक कम्पनीहरू घरेलु बजारमा मात्र सीमित नभई क्षेत्रीय तथा अन्तर्राष्ट्रिय स्तरमा समेत प्रतिस्पर्धा गर्न सक्षम हुँदै गएको स्पष्ट संकेत गर्दछ।

यस उपलब्धिले नेपालको डिजिटल वित्तीय रूपान्तरणमा निजी क्षेत्र, बैंक तथा वित्तीय संस्था, प्रविधि कम्पनी, भुक्तानी सेवा प्रदायक तथा नियामक निकायबीच भइरहेको सहकार्य र नवप्रवर्तनको प्रभावलाई प्रतिबिम्बित गर्दछ।

सिटिटेक ग्रुप, ईसेवा, आईएमई खल्टी, आइमार्क र फोनपेको यस सहभागितालाई नेपाली फिनटेक उद्योगको सामूहिक उपलब्धिका रूपमा हेरिएको छ। पछिल्ला वर्षहरूमा डिजिटल भुक्तानी, वित्तीय समावेशिता, मर्चेन्ट डिजिटाइजेसन तथा प्रविधिमा आधारित नयाँ वित्तीय समाधानमा भएको विस्तारले नेपालको फिनटेक क्षेत्रलाई विश्वव्यापी मञ्चमा अझ बलियो रूपमा स्थापित गर्न मद्दत पुग्ने अपेक्षा गरिएको छ।