पियरसनले सार्वजनिक गर्यो आधिकारिक पीटीई एआई प्राक्टिस, नेपाली विद्यार्थीलाई पनि उपलब्ध
अर्थ पथ
प्रकाशित मिति : ९ भदौ २०८३, मंगलबार १२ : १६ बजे
काठमाडौं। विश्वव्यापी अंग्रेजी भाषा परीक्षण प्रदायक पियरसनले पीटीई परीक्षाको तयारीका लागि आधिकारिक ‘पीटीई एआई प्राक्टिस’ प्लेटफर्म सार्वजनिक गरेको छ। पियरसनका अनुसार नयाँ अनलाइन प्लेटफर्म पीटीई एकेडेमिक र पीटीई कोर दुवै परीक्षाको तयारी गर्ने विद्यार्थीलाई लक्षित गरी तयार गरिएको हो।
प्लेटफर्ममा पियरसनले नै तयार गरेका आधिकारिक अभ्यास प्रश्न, एआईमा आधारित स्कोरिङ तथा प्रतिक्रिया, पूर्ण मोक टेस्ट, सेक्सनअनुसार अभ्यास र व्यक्तिगत अध्ययन सुझाव उपलब्ध हुनेछन्। विद्यार्थीले अभ्यासका क्रममा प्राप्त नतिजा हेरेर आफ्नो प्रगति ट्र्याक गर्न तथा थप सुधार आवश्यक पर्ने विषय पहिचान गर्न सक्नेछन्।
पियरसनका अनुसार प्लेटफर्ममा प्रयोग हुने अभ्यास सामग्री वास्तविक पीटीई परीक्षाको ढाँचा र मूल्याङ्कन मापदण्डसँग मिल्ने गरी तयार गरिएको छ। यसले परीक्षार्थीलाई वास्तविक परीक्षामा कस्तो प्रकारका प्रश्न आउँछन्, उत्तर कसरी मूल्याङ्कन हुन्छ र कुन क्षेत्रमा थप तयारी आवश्यक छ भन्ने बुझ्न सहयोग गर्ने अपेक्षा गरिएको छ।
नयाँ प्रणालीको महत्वपूर्ण पक्ष एआईमा आधारित व्यक्तिगत प्रतिक्रिया हो। विद्यार्थीले अभ्यास गरेपछि प्राप्त नतिजाका आधारमा आफ्नो कमजोर पक्ष पहिचान गर्न र त्यसअनुसार अध्ययनलाई केन्द्रित गर्न सक्नेछन्। पूर्ण मोक टेस्ट र विषयगत अभ्यासमार्फत परीक्षा दिनुअघि आफ्नो तयारीको स्तर परीक्षण गर्ने सुविधा पनि प्लेटफर्ममा समेटिएको छ।
पियरसनले पछिल्लो समय भाषा सिकाइ तथा परीक्षा तयारीमा कृत्रिम बुद्धिमत्ताको प्रयोगलाई प्राथमिकता दिँदै आएको छ। कम्पनीले सार्वजनिक गरेको अर्को अध्ययनअनुसार एआईमा आधारित अनुकूलन अभ्यास प्रयोग गर्ने विद्यार्थीहरू समान अध्ययन समय खर्च गर्ने परम्परागत अभ्यास प्रयोगकर्ताको तुलनामा विषयमा प्रारम्भिक दक्षता हासिल गर्ने सम्भावना ९० प्रतिशत बढी देखिएको थियो।
पीटीई एकेडेमिक कम्प्युटरमा आधारित अंग्रेजी भाषा परीक्षा हो, जसलाई अध्ययन, काम तथा आप्रवासनका विभिन्न प्रयोजनका लागि विश्वका विश्वविद्यालय, कलेज र सरकारी निकायहरूले स्वीकार गर्दै आएका छन्।
नेपालबाट उच्च शिक्षा तथा रोजगारीका लागि विदेश जाने विद्यार्थीको संख्या उल्लेख्य रहेकाले आधिकारिक एआई अभ्यास प्लेटफर्म नेपाली परीक्षार्थीका लागि पनि उपयोगी हुने देखिएको छ। विशेषगरी महँगा तयारी कक्षा वा विभिन्न अनधिकृत अभ्यास सामग्रीमा निर्भर हुनुपर्ने विद्यार्थीले आधिकारिक परीक्षा ढाँचा र मूल्याङ्कन मापदण्डअनुसार अभ्यास गर्ने अवसर पाउनेछन्।
पियरसनले नयाँ प्लेटफर्ममार्फत विद्यार्थीलाई परीक्षाको तयारीलाई थप व्यवस्थित, व्यक्तिगत र परिणाममुखी बनाउन सहयोग गर्ने लक्ष्य राखेको जनाएको छ। यसले पीटीईको तयारी गरिरहेका नेपाली विद्यार्थीलाई आफ्नै गति र आवश्यकता अनुसार अभ्यास गर्दै परीक्षा दिनुअघि आफ्नो तयारीको स्तर मूल्याङ्कन गर्न सहज बनाउने अपेक्षा गरिएको छ।
