बाढीपीडितकाे उद्धार र राहतका लागि यूएईद्वारा १ करोड डलर सहायता घोषणा

काठमाडाैँ । नेपालमा हालै आएको विनासकारी बाढीले पुर्‍याएको अपूरणीय क्षतिक बीच अन्तर्राष्ट्रिय सहयोगको क्रम सुरु भएको छ।

यसैक्रममा संयुक्त अरब इमिरेट्स (यूएई) ले नेपाली बाढीपीडितका लागि १ करोड अमेरिकी डलर बराबरको आपत्कालीन मानवीय सहायताको घोषणा गरेको छ।

यूएईका राष्ट्रपति शेख मोहम्मद बिन जायेद अल नाह्यानको विशेष निर्देशनमा उक्त आर्थिक सहयोग जुटाइएको हो।

प्राकृतिक प्रकोपको यो घडीमा नेपाली जनजीवन अस्तव्यस्त बनेको र ठूलो संख्यामा मानवीय क्षति भएको भन्दै यूएई सरकारले गहिरो शोक व्यक्त गरेको छ। सरकारका तर्फबाट उपलब्ध गराइएको यो सहायताले तत्कालका लागि राहत वितरण र उद्धार कार्यलाई तीव्रता दिन ठूलो टेवा पुग्ने विश्वास लिइएको छ।

उद्धार र राहतमा प्रत्यक्ष परिचालन

घोषणा गरिएको उक्त राहत रकम यूएई एड एजेन्सीमार्फत पीडित बस्तीसम्म पुर्‍याइनेछ। एजेन्सीका प्रतिनिधिहरूले स्थानीय प्रशासनिक निकाय र अन्तर्राष्ट्रिय मानवीय संघसंस्थाहरूसँगको सहकार्यमा जमिन तलामा खटेर काम गर्नेछन्। विपद्को चपेटामा परेका अतिप्रभावित क्षेत्रलाई पहिलो प्राथमिकतामा राखेर खाद्य सामग्री, औषधोपचार र अस्थायी बासको व्यवस्था मिलाउने गरी तयारी थालिएको छ।

बुधबार आएको यो विनासकारी बाढीले देशका धेरै भूभागलाई प्रभावित बनाएको छ। प्राप्त सरकारी तथ्यांकअनुसार बाढीका कारण झण्डै पाँच सय नागरिकले ज्यान गुमाइसकेका छन् भने अझै करिब एक हजार मानिस सम्पर्कविहीन छन्।

घरबारविहीन भएका हजारौं नागरिक खुला आकाशमुनि वा राहत शिविरमा आश्रय लिन बाध्य छन्। बेपत्ताहरूको खोजी कार्य जारी रहे पनि भौगोलिक कठिनाइ र बिग्रिएको मौसमका कारण उद्धार टोलीलाई समेत चुनौती थपिएको छ।

यसअघि पनि छिमेकी तथा मित्रराष्ट्रहरूले नेपालको बाढी प्रभावित क्षेत्रका लागि विभिन्न किसिमका सहयोगको घोषणा गरेका छन्। लगातारको प्राकृतिक विपत्तिले थलिएको नेपाली अर्थतन्त्र र भग्नावशेषमा परिणत भएका भौतिक संरचनाको पुनःनिर्माणमा यी अन्तर्राष्ट्रिय सहयोगले दीर्घकालीन रूपमा महत्त्वपूर्ण भूमिका खेल्ने अपेक्षा गरिएको छ।

नेपाल सरकारले संकटको यो बेला साथ दिने सबै मित्रराष्ट्र तथा दातृ निकायहरूप्रति आभार व्यक्त गर्दै उद्धार र पुनःस्थापनाको कार्यलाई अब युद्धस्तरमा अघि बढाइने जनाएको छ।