प्रधानमन्त्री शाह आज प्रतिनिधि सभाको बैठकमा सम्बोधन गर्दै
अर्थ पथ
प्रकाशित मिति : १७ भदौ २०८३, बुधबार १२ : ३७ बजे
काठमाडौँ। प्रधानमन्त्री बालेन शाहले आज बस्ने प्रतिनिधि सभाको बैठकलाई सम्बोधन गर्ने भएका छन्। संघीय संसद सचिवालयका अनुसार बैठक दिउँसो १ बजे सुरु हुनेछ र सोही बैठकमा प्रधानमन्त्री शाहले आफ्नो धारणा राख्ने कार्यक्रम तय गरिएको छ।
भदौ १० गते भोटेकोशी–त्रिशूली क्षेत्रमा आएको भीषण बाढीले ठूलो जनधनको क्षति पुर्याएको थियो। बाढी प्रभावित क्षेत्रमा अहिले पनि बेपत्ता व्यक्तिको खोजी, उद्धार, राहत वितरण तथा पुनर्स्थापनाका कार्यहरू सञ्चालन भइरहेका छन्।
उपलब्ध पछिल्लो तथ्यांकअनुसार बाढीपछि १ हजार ११३ जनाको शव फेला परिसकेको छ भने ४ हजार ८५८ जना अझै सम्पर्कमा आउन सकेका छैनन्।
बाढीपछि प्रधानमन्त्री शाहले अहिलेसम्म राष्ट्रका नाममा औपचारिक सम्बोधन गरेका छैनन्। तर, उनले सामाजिक सञ्जाल फेसबुकमार्फत नियमित रूपमा प्रभावित क्षेत्रमा भइरहेको खोज तथा उद्धार, राहत र पुनर्निर्माणका गतिविधिबारे जानकारी दिँदै आएका छन्।
यसैबीच, आजको प्रतिनिधि सभा बैठकको सम्भावित कार्यसूचीमा सभामुखबाट भोटेकोशी बाढी तथा त्यसबाट भएको क्षतिसम्बन्धी विशेष प्रस्ताव प्रस्तुत गर्ने विषय पनि समावेश छ।
प्रधानमन्त्री शाहको सम्बोधनमा बाढीपछिको उद्धार तथा राहत व्यवस्थापन, प्रभावितको पुनर्स्थापना, क्षतिग्रस्त पूर्वाधारको पुनर्निर्माण र सरकारले आगामी दिनमा अघि बढाउने योजनाबारे जानकारी आउने अपेक्षा गरिएको छ।
