गल्छी-त्रिशूली खण्ड ठप्प भएपछि नयाँ रुटबाट खुल्यो यातायात, रसुवा-धादिङ जोड्ने वैकल्पिक सडक तयार

बाढीले तहसनहस बनाएका त्रिशूली करिडोरका सडक सञ्जालमा वैकल्पिक मार्गको जाल बिछ्याएर यातायात सुचारु गरिएको छ।

काठमाडाैँ । त्रिशूली नदीमा आएको विपद्जन्य भेलबाढीले गल्छी-त्रिशूली राजमार्ग र यस क्षेत्रका पुलहरूमा ठूलो क्षति पुर्‍याएपछि ठप्प बनेको यातायात अब भने वैकल्पिक सडक सञ्जालमार्फत सामान्य बन्दै गएको छ।

बाढीले मुख्य धमनीहरू अवरुद्ध गरेपछि सिर्जना भएको चरम संकटलाई चिर्न सडक डिभिजन कार्यालय नुवाकोटले युद्धस्तरमा नयाँ रुटहरू निर्माण, मर्मत र स्तरोन्नति गरेर यातायातका साधनहरू सुचारु गराएको हो।

भौगोलिक कठिनाइ र प्रतिकूल मौसमका बाबजुद वैकल्पिक मार्गहरू तयार पारिएपछि धादिङ र रसुवा जिल्लाका विभिन्न भागमा देखिएको यातायात विच्छेदको समस्या टरेको छ।

मुख्य राजमार्गको विकल्पमा पृथ्वी राजमार्गको मास्टारदेखि त्रिशूली पुल पार गरेर केउरिनीटार, बेलिनटार, आदमटार, पिपलटार, गजुरीटार, नेपालटार र परेवाटार हुँदै धादिङबेसीसम्मको १५ किलोमिटर सडकखण्डलाई यातायात योग्य बनाइएको छ। यस वैकल्पिक मार्गले विशेषगरी धादिङको गल्छी र सिद्धलेक क्षेत्रका बासिन्दालाई राहत दिएको छ।

त्यस्तै, त्रिशूली नदी पारतर्फको भूभागलाई मुख्य बजारसँग जोड्न गल्छीबाट दायाँ किनारैकिनार कल्लेरीटार, कोशीखोला, पिमलटार, दर्शनटार, छत्रेखोला र गौरीबेसी हुँदै त्रिशूली बजार र किस्पाङ गाउँपालिकाको सीमासम्म करिब ४० किलोमिटर लामो अर्को वैकल्पिक मार्ग सञ्चालनमा ल्याइएको छ।

यसले धादिङको सिद्धलेक तथा नुवाकोटतर्फका तारकेश्वर, विदुर र मेघाङका बासिन्दालाई यात्रामा ठूलो सहजीकरण गरेको छ।

यता, देवीघाटस्थित क्षतिग्रस्त तादी खोला पुलको विकल्पमा पनि यातायातको सहजताका लागि नयाँ मार्ग प्रयोगमा ल्याइएको छ। पिपलटारबाट धमले, निरञ्जना, बाघखोर, हर्रे, देउराली हुँदै कोल्पुटारसम्मको ३५ किलोमिटर सडकमार्फत चार पाङ्ग्रे सवारीसाधनहरू सुचारु गराइएको छ, जसबाट नुवाकोटको विदुर र बेलकोटगढी क्षेत्र प्रत्यक्ष लाभान्वित भएका छन्।

यसैगरी, त्रिशूलीदेखि बेत्रावतीसम्मको मुख्य राजमार्ग बाढीले बगाएपछि रसुवा आवतजावत गर्ने यात्रुहरूको बिचल्ली हुन नदिन वैकल्पिक रुट तयार पारिएको छ।

मध्यपहाडी राजमार्गको ढिकुरेबाट फेदी बेसीचोक, हिरामुनिटार, चोगते, बोरेभञ्ज्याङ, सानो खोला, धनस्वारा, भोर्ले, जिबजिबे हुँदै बोगटीटारसम्मको १२ किलोमिटर नुवाकोट खण्डमा यातायात सञ्चालन गरिएको छ भने रसुवा खण्डमा पनि सडक सुचारु गर्ने काम तीव्र गतिमा अघि बढिरहेको छ।

आपतकालीन अवस्थाको यो घडीमा सडक डिभिजन नुवाकोटले भारी उपकरणहरूको सहायताले भग्नावशेष पन्छाउने, पहिरो हटाउने, नयाँ कल्भर्ट निर्माण गर्ने र हिलाम्मे सडकमा ग्राभेलिङ गरेर सतह सुधार गर्ने कामलाई एकसाथ अगाडि बढाएको छ।

बाढीले पुर्‍याएको भौतिक क्षतिको घाउ आलै भए पनि वैकल्पिक मार्गहरूको सफल सञ्चालनले राजधानीसँग जोड्ने यी उत्तरी क्षेत्रका नागरिकहरूको जनजीवनलाई फेरी लयमा फर्काउन ठूलो टेवा पुगेको छ।