महाधिवेशनअघि कांग्रेसमा एकताको कसरत, देउवा टिमलाई केन्द्रीय समितिमा ल्याउन विशेष निर्णय

आगामी असोजमा तय भएको १५औं महाधिवेशनअघि नेपाली कांग्रेसले पार्टीभित्रको आन्तरिक दूरी मेट्न पूर्वसभापति शेरबहादुर देउवापक्षीय नेताहरूलाई केन्द्रीय समितिमा जोड्ने औपचारिक निर्णय गरेको छ।

काठमाडाैँ । आगामी असोज १६ देखि १९ गतेसम्म तय भएको नेपाली कांग्रेसको १५औं महाधिवेशन नजिकिँदै गर्दा पार्टी सभापति शेरबहादुर देउवाको नेतृत्वमा रहेको अघिल्लो कार्यसमितिमा सक्रिय रहेका तर हालको नयाँ संरचनामा नसमेटिएका नेताहरूका लागि केन्द्रीय समितिमा प्रवेश गर्ने बाटो खुल्ला भएको छ।

गएको आइतबार सम्पन्न पार्टीको कार्यसम्पादन समितिको बैठकले पार्टीभित्र देखिएको शक्ति सन्तुलन र मनमुटावलाई चिर्दै यस्तो महत्वपूर्ण निर्णय लिएको हो। पछिल्लो विशेष महाधिवेशनपछि बनेको नयाँ समितिमा स्थान नपाएका पुराना पदाधिकारी तथा सदस्यहरूलाई पनि आगामी महाधिवेशनको आयोजक समितिको रूपमा केन्द्रीय तहमा नै राख्नेगरी पार्टीले निर्णय गरेको छ।

यस कदमलाई कांग्रेसको संस्थापन पक्षले महाधिवेशनअघि पार्टीभित्रको आन्तरिक एकता बलियो बनाउने रणनीतिक प्रयासको रूपमा अर्थ्याएको छ।

बैठकले आगामी महाधिवेशनको कार्यतालिकालाई समेत स्पष्ट पार्दै तल्लो तहदेखिको अधिवेशनको प्रक्रिया सुरु गर्ने निर्णय गरेको छ। कांग्रेसले निर्धारित तालिकाअनुसार आगामी असोज ३ र ४ गते नै वडा तहको अधिवेशन सम्पन्न गर्ने मिति तय गरेको छ। महाधिवेशनको सरगर्मी बढेसँगै सदस्यता वितरण र नवीकरणलाई लिएर देखिएका विवादहरूलाई पनि पार्टी नेतृत्वले किनारा लगाउने कोसिस गरेको छ।

यसै सन्दर्भमा कांग्रेस संस्थापन पक्षले गएको पुस मसान्तभित्र नवीकरण भइसकेका सम्पूर्ण क्रियाशील सदस्यतालाई आधिकारिक मान्यता प्रदान गर्ने निर्णय गरेको छ। यस निर्णयले महाधिवेशनमा भाग लिन चाहने तर प्रक्रियागत अल्झनमा परेका कार्यकर्ताहरूलाई राहत मिल्ने र महाधिवेशनकोउत्साह अझ बढ्ने विश्वास पार्टी पंक्तिले लिएको छ।