पुँजीगत लाभ करसम्बन्धी नयाँ व्यवस्था राजपत्रमा प्रकाशित, आजैदेखि कार्यान्वयन
अर्थ पथ
प्रकाशित मिति : ६ आश्विन २०८३, मंगलबार ०७ : ४६ बजे
काठमाडौँ । सरकारले सेयर बजारका लगानीकर्तालाई लक्षित गर्दै पुँजीगत लाभ करमा महत्त्वपूर्ण कटौती गरेको व्यवस्था आजैदेखि कार्यान्वयनमा आउने भएको छ ।
यससम्बन्धी नयाँ व्यवस्था आधिकारिक रूपमा नेपाल राजपत्रमा प्रकाशित भइसकेको छ र आज मंगलबारदेखि नै कार्यान्वयनमा आउने अर्थ मन्त्रालयले जनाएको छ । लामो समयदेखि करको दरमा पुनरावलोकनको माग गर्दै आएका लगानीकर्ताका लागि यो निर्णयले ठूलै राहत दिने अपेक्षा गरिएको छ ।
परिमार्जित नयाँ व्यवस्थाअनुसार नेपाल धितोपत्र बोर्डमा सूचीकृत कम्पनी वा संस्थाहरूको सेयर तथा अन्य हितबाट प्राप्त हुने लाभमा प्राकृतिक व्यक्तिले तिर्नुपर्ने करको दर अब सेयर स्वामित्वमा राखिएको समयावधिको आधारमा तय गरिनेछ । जस अनुसार लगानीकर्ताले सेयर होल्ड गरेको समयावधिलाई दुईवटा श्रेणीमा विभाजन गरिएको छ ।
नयाँ नियमअनुसार यदि कुनै पनि लगानीकर्ताले ३६५ दिन वा एक वर्षभन्दा बढी समयसम्म सेयर आफ्नो स्वामित्वमा राखेर बिक्री गर्दा प्राप्त हुने लाभमा अब ३.७५ प्रतिशत मात्र पुँजीगत लाभ कर तिरे पुग्नेछ । यसअघि दीर्घकालीन लगानीका रूपमा मानिने यस किसिमको कारोबारमा करको दर केही बढी थियो ।
त्यसैगरी, ३६५ दिन वा सोभन्दा कम अर्थात् एक वर्षभन्दा कम अवधिमै सेयर किनबेच गर्ने अल्पकालीन लगानीकर्ताका लागि भने करको दर पाँच प्रतिशत कायम गरिएको छ । यसअघिको तुलनामा यी दुवै श्रेणीका करका दरहरू घटाइएकाले यसले बजारमा कारोबारको तरलता बढाउन सहयोग पुग्ने विश्वास गरिएको छ ।
आर्थिक ऐन, २०८३ को दफा १८ को उपदफा १ ले प्रदान गरेको अधिकार प्रयोग गर्दै मन्त्रिपरिषद्बाट भएको निर्णयका आधारमा अर्थ मन्त्रालयले करका यी नयाँ दरहरू औपचारिक रूपमा सार्वजनिक गरेको हो । बजारलाई अझ चलायमान बनाउन र लगानीमैत्री वातावरण सिर्जना गर्ने उद्देश्यले ल्याइएको यो नयाँ कर प्रणाली आजैदेखि देशभर लागू भइसकेको छ ।
यस्तो छ राजपत्रको सूचना :
