एनआईसी एशिया क्यापिटलद्धारा मुद्रा बजार तथा पूँजी बजार साक्षरता सम्बन्धी कार्यक्रम सम्पन्न

काठमाडौँ। “विश्व लगानीकर्ता सप्ताह, २०२६” को अवसरमा एन आई सी एशिया क्यापिटलले मुद्रा बजार तथा पूँजी बजार साक्षरता सम्बन्धी कार्यक्रम त्रिवेणी इन्टरनेशनल कलेज, पोखरामा सम्पन्न गरेको छ।

एनआईसी एशिया क्यापिटल लिमिटेडले आफ्नो स्थापनाकालदेखि नै संस्थागत सामाजिक उत्तरदायित्व अन्तर्गत विभिन्न कार्यक्रमहरु संचालन गर्दै आइरहेको छ। सोही कार्यलाई निरन्तरता दिने क्रममा “विश्व लगानीकर्ता सप्ताह, २०२६” को अवसरमा त्रिवेणी इन्टरनेशनल कलेज, पोखरा–३०, तालचोक, कास्कीमा मुद्रा बजार तथा पूँजी बजार साक्षरता तथा अन्तरकृया कार्यक्रम मिति २०८३ साल आश्विन २३ गते शुक्रबारको दिन सम्पन्न गरेको छ ।

उक्त कार्यक्रममा क्यापिटलका प्रमुख मर्चेण्ट बैंकिङ्ग अधिकृत दामोदर रायमाझीले वर्ल्ड इन्भेस्टर विक, २०२६ को प्राइमरी थिम्स “इन्भेस्टर रिजिलियन्स, डिजिटल डिसेप्सन एन्ड स्क्याम अलर्ट” र कम्प्लिमेन्टरी थिम्स “बेसिस अफ इन्भेस्टिङ एन्ड यङ इन्भेस्टर एन्ड नेक्स्ट जेनेरेसन” मा आधारित भएर “इन्भेस्ट इन योर फ्युचर, प्रोटेक्ट इट टुडे।” नारा सहित विद्यार्थी जिवनकालमा समेत पैसा के कसरी बचत गर्न सकिन्छ र उक्त बचत गरेको स–सानो रकम कहाँ कसरी सरल रुपमा लगानी गर्न सकिन्छ भन्ने सम्बन्धमा विस्तृत जानकारी गराएका थिए।

साथै उनले धितोपत्रको प्राथमिक तथा दोश्रो बजार, मुद्रा बजार उपकरणहरु, सामूहिक लगानी कोष, एसइपी आदिमा लगानी गर्ने प्रकृयाका सहित दोश्रो बजारमा सूचिकृत कम्पनीहरुमा लगानी गर्ने सम्बन्धी निर्णय लिँदा विशेष ध्यान दिनुपर्ने कुराहरु लगायत समग्र पूँजी बजारको पछिल्लो अवस्थाको सम्बन्धमा विस्तृत जानकारी गराईएको थियो।

उक्त कार्यक्रमको अन्त्यमा सहभागि विद्यार्थीहरु तथा प्रध्यापकहरुको सहभागितामा मुद्रा बजार उपकरण तथा पूँजी बजारको पछिल्लो अवस्था र लगानी गर्दा ध्यान दिनुपर्ने कुराहरुको सम्बन्धमा विस्तृत छलफल तथा अन्तरकृया गरिएको थियो। उक्त कार्यक्रममा १०० जना भन्दा बढी युवा विद्यार्थी, प्रध्यापकहरु लगायत अन्य क्याम्पसमा कार्यरत कर्मचारीहरुको समेत सहभागिता रहेको थियो।