मंगलबारदेखि प्रतिकित्ता १ सय रुपैयाँमा साढे ९ लाख कित्ता शेयर बिक्रीमा, कुन-कुन ठाउँबाट आवेदन मिल्छ ?
काठमाडौं । समृद्धि फाइनान्स लिमिटेडले चैत २९ गते, मंगलबारदेखि अवितरित हकप्रद शेयर बिक्री गर्ने भएको छ । फाइनान्स कम्पनीले संस्थापक समूहको ८ लाख ६७ हजार ३३६ कित्ता र सर्वसाधारण समूहको ७३ हजार १ सय कित्ता शेयर गरी कूल ९ लाख ४० हजार ४६६ कित्ता अवितरित हकप्रद शेयर बिक्री गर्ने भएको हो ।
कम्पनीले धितोपत्र दर्ता तथा निष्काशन नियमावली २०७३ मा भएको व्यवस्था अनुसार लिलाम बढाबढ माध्यमबाट उक्त बिक्री गर्न लागेको हो ।
फाइनान्सको उक्त शेयरमा लगानीकर्ताले न्यूनतम प्रतिकित्ता १०० रुपैयाँ तोकिएको हुँदा उक्त मूल्यभन्दा बढी मूल्य तोकेर प्रतिस्पर्धात्मक बोलपत्रमा सहभागी हुनुपर्नेछ । न्यूनतम १ सय कित्तादेखि अधिकतम सबै कित्ताका लागि आवेदन दिन सक्नेछन् ।
उक्त शेयरमा आवेदन दिने समय वैशाख ७ गतेसम्म रहेको छ । फाइनान्सको उक्त शेयरमा बिओके क्यापिटल मार्केट नारायाणचौर, नक्साल काठमाडौं, बैंक अफ काठमाण्डूको शाखा कार्यालयहरु मेनरोड विराटनगर, आदर्शनगर विरगञ्ज, न्यूरोड पोखरा, टाफिक चोक बुटवल, सुर्खेत रोड नेपालगञ्ज, विरेन्द्र चौक विरेन्द्रनगर, सुर्खेत मेनरोड, चौराह धनगढी र समृद्धि फाइनान्स कम्पनीको केन्द्रिय कार्यालय हेटौडा मकवानपुर, शाखा कार्यालय पुतलिसडक काठमाडौं, नारायणगढ चितवन, पोखरा कास्की, बुटवल रुपन्देहीमा गएर आवेदन दिन सकिन्छ ।
यसअघि कम्पनीले फागुन ८ गतेदेखि फागुन २९ गतेसम्म २७ लाख २९ हजार ७०५ कित्ता हकप्रद शेयर बिक्री खुला गरेको थियो । सो समयमा बिक्री नभएको बाँकी शेयर बैंकले लिलाम बढाबढ प्रक्रियाका माध्यमबाट बिक्री गर्न लागेको हो । फाइनान्सको शेयर बिक्री प्रबन्धकमा बीओके क्यापिटल रहेको छ ।
