काठमाडौं । पछिल्लो समय लघुबीमा व्यवसाय बढ्न थालेको छ । नयाँ लघुबीमा कम्पनी स्थापना हुन थालेपछि ठुला कम्पनीहरु व्यवसाय बढाउन ताएिका हुन् ।

चालु आर्थिक वर्ष २०७९/८० को मंसिर महिनासम्ममा कम्पनीहरुको लघुबीमा बीमा शुल्क आर्जन ४१२.२४ प्रतिशतले वृद्धि भएको छ । नेपाल बीमा प्राधिकरणको तथ्याङ्कका अनुसार गत साउनको महिनाको तुलनामा लघुबीमा व्यवसाय बढेको देखिएको हो ।

चालु आवको पाँच महिनामा जीवन तथा निर्जीवन लघुबीमा व्यवसायबाट कुल ९८ करोड ४३ लाख ९८ हजार रुपैयाँ बीमा शुल्क संकलन गरेका छन् । तर, चालु आवको पहिलो साउन महिनामा १९ करोड २१ लाख ७४ हजार रुपैयाँ बीमा शुल्क आर्जन गरेका थिए ।

प्राधिकरणको तथ्याङ्क अनुसार पुराना ठुला कम्पनीहरुले लघुबीमा व्यवसाय आक्रामक बनाएको देखिन्छ । नेपालमा लघुबीमा संचालनका लागि प्राधिकरणले छुट्टै कम्पनीहरुले स्थापना गर्न लाईसेन्स दिन लागेको छ । नयाँ लघुबीमा कम्पनीहरुले आउने भएपछि व्यवसाय बढाएको विज्ञहरुले जनाएका छन् । यसअघि लघुबीमा बीमामा खास राम्रो काम हुन सकिरहेको थिएन । प्राधिकरणले हालै मात्र ७ वटा लघुबीमा कम्पनीलाई लघुबीमा व्यवसाय गर्न कम्पनीहरु छनोट गरेको छ ।

जीवन लघुबीमा व्यवसाय ५२४ प्रतिशतले बढ्यो, साढे ४३ लाख बीमा पोलेसी सक्रिय

जीवन बीमा कम्पनीहरुको लघुबीमा व्यवसाय उल्लेख्य मात्रामा वृछि भएको छ । जीवन बीमा कम्पनीहरुले लघुबीमाबाट चालु आर्थिक वर्ष २०७९/८० को पाँच महिनामै झण्डै १ अर्ब बीमा शुल्क संकलन गरेका छन् ।

नेपाल बीमा प्राधिकरणले हालै प्रकाशित गरेको तथ्याङ्कले यस्तो देखाएको हो । कम्पनीहरुले लघुबीमा व्यवसायबाट चालु आवको मंसिर महिनासम्म ९५ करोड ३१ लाख १९ हजार रुपैयाँ बीमा शुल्क आर्जन गरेका हुन् । जुन गत साउन महिनाको तुलनामा ५२४.२८ प्रतिशतले बढी हो । चालु आवको पहिलो महिना अर्थात साउनमा भने कम्पनीहरुले यो व्यवसायबाट ३८ करोड ९६ लाख ४१ हजार रुपैयाँ मात्र बीमा शुल्क आर्जन गरेका थिए ।

प्राधिकरणका अनुसार चालु आवको मंसिर महिनासम्ममा लघुबीमा तर्फ कुल ४३ लाख ५७ हजार ८६ बीमालेख सक्रिय देखिएका छन् । गत साउन महिनामा भने लघु जीवन बीमा तर्फ ३६ लाख ४७ हजार २०७ बीमालेख सक्रिय रहेको थियो ।
प्राधिकरणका अनुसार लघु जीवन बीमाबाट भदौ महिनामा ३८ करोड ९६ लाख ४१ हजार रुपैयाँ, असोजमा ५७ करोड ८३ लाख ८१ हजार र कात्तिक ७७ करोड ५ लाख ४१ हजार रुपैयाँ बीमा शुल्क आर्जन गरेका थिए ।

लघु जीवन बीमाबाट मंसिर महिनासम्ममा सबैभन्दा धेरै बीमा शुल्क बागमती प्रदेशमा संकलन भएको छ । सो अवधिमा बागमतीमा मात्रै ६७ करोड १० लाख ९२ हजार रुपैयाँ बीमा शुल्क संकलन भएको हो । सो प्रदेशमा कुल ३३ लाख ५६ हजार ६४५ बीमालेख सक्रिय रहेका छन् ।

दोस्रो स्थानमा रहेको प्रदेश १ बाट ८ करोड ३८ लाख १३ हजार रुपैयाँ बीमा शुल्क संकलन भएको छ । सो प्रदेशमा लघु जीवन बीमा तर्फ कुल २ लाख ५७ हजार ३८३ बीमालेख सक्रिय रहेका छन् । तेस्रो स्थानमा रहेको लुम्बिनी प्रदेशबाट भने ८ करोड ७ लाख ७९ हजार रुपैयाँ बीमा शुल्क आर्जन गरेको हो । लुम्बिनीमा लघु जीवन बीमा तर्फ कुल २ लाख ८५ हजार ५३१ बीमालेख सक्रिय देखिएको छ ।

यस्तै, गण्डकी प्रदेशमा ६ कारेड १८ लाख ७१ हजार रुपैयाँ, सुदुरपश्चिममा ३ करोड ३५ लाख ३१ हजार, मधेशमा १ करोड १२ लाख ९४ हजार र कर्णाली प्रदेशमा १ करोड ७ लाख ३९ हजार रुपैयाँ बीमा शुल्क आर्जन भएको छ । सो अवधिमा यी प्रदेशमा क्रमशः २ लाख ६७ हजार ५८४, १ लाख ४२ हजार ९१५,२७ हजार ८५३ र १९ हजार १७५ बीमालेख सक्रिय देखिएका छन् ।

पाँच महिनामा निर्जीवन लघुबीमा व्यवासय ४०० प्रतिशतले वृद्धि

चालु आवको पाँच महिनामा निर्जीवन लघु बीमा व्यवसाय झण्डै ४ सय प्रतिशतले वृद्धि भएको छ । मंसिर मसान्तसम्म निर्जीवन लघुबीमा व्यवसाय ३९६.२५ प्रतिशतले बढेको हो ।

प्राधिकरणका अनुसार सो अवधिमा कम्पनीहरुले निर्जीवन लघुबीमाबाट ३ करोड १२ लाख ७९ हजार रुपैयाँ बीमा शुल्क आर्जन गरेका हुन् । सो अवधिमा देशभर कुल १५ हजार ८५ लघुबीमा बीमालेख बिक्री भएका प्राधिकरणले जनाएको छ ।

प्राधिकरणका अनुसार निर्जीवन लघुबीमा व्यवसायबाट भदौ महिनामा १ करोड ३७ लाख ४९ हजार रुपैयाँ, असोजमा २ करोड ८ लाख ९१ हजार र कात्तिक महिनामा २ करोड ६३ लाख २६ हजार रुपैयाँ बीमा शुल्क आर्जन गरेका थिए ।

प्रदेशगत विवरणअनुसार सो अवधिमा सबैभन्दा धेरै बीमा शुल्क बागमती प्रदेशबाट संकलन भएको छ । मंसिर मसान्तसम्ममा बागमतीबाट ९२ लाख ८३ हजार रुपैयाँ बीमा शुल्क आर्जन गरेका छन् । दोस्रो स्थानमा रहेको गण्डकी प्रदेशबाट निर्जीवन बीमा व्यवसाय मार्फत ९२ लाख ६४ हजार रुपैयाँ बीमा शुल्क संकलन भएको हो ।

यस्तै, सो अवधिमा प्रदेश १ बाट भने ५१ लाख ६८ हजार, लुम्बिनी प्रदेशबाट ४३ लाख ९२ हजार रुपैयाँ बीमा शुल्क संकलन भएको छ । त्यसैगरि सुदुरपश्चिम प्रदेशबाट २० लाख ३० हजार रुपैयाँ, कर्णालीबाट ७ लाख ३८ हजार र मधेश प्रदेशबाट ४ लाख ४ हजार रुपैयाँ निर्जीवन लघुबीमा बीमा शुल्क संकलन भएको छ ।