माण्डु हाइड्रोपावरको आइपीओ २ अर्ब रुपैयाँ संकलन, माग भन्दा ८.८७ गुणा बढी आवेदन
काठमाडौं । माण्डु हाइड्रोपावर लिमिटेडको आइपीओमा अन्तिम दिन अर्थात भदौ १३ गतेसम्म २ अर्ब २० करोड ३२ लाख ३७ हजार ९८० रुपैयाँ संकलन भएको छ । सिडिएसका अनुसार बुधबार साँझ ५ः०६ बजेसम्म ९ लाख ८० हजार ५३ जनाले १ करोड ६ लाख ९५ हजार ३३० कित्ताका लागि आवेदन दिएका हुन् । जुन माग भन्दा ८.८७ गुणा बढी आवेदन हो ।
कम्पनीले भदौ १० गतेदेखि सर्वसाधारणमा आइपीओ निष्कासन गरेको थियो । कम्पनीले यसअघि आयोजना प्रभावित स्थानीय र वैदेशिक रोजगारीमा रहेका नेपालीमा आइपीओ बिक्री गरी बाँडफाँट समेत गरी सकेको छ । पहिलो चरणमा आयोजना प्रभावित स्थानीयमा विक्री हुन नसकेको ७९ हजार ३० कित्ता आईपीओ समेत जोडेर कम्पनीले सर्वसाधारणमा विक्री गरेको थियो ।
कम्पनीले प्रतिशेयर १०० रूपैयाँ अंकित मूल्यमा प्रिमियम १०६ रूपैयाँ थप गरी प्रतिकित्ता २०६ रूपैयाँमा १६ लाख ३६ हजार ३७० कित्ता आईपीओ विक्री नेपाल धितोपत्र बोर्डबाट अनुमति पाएको थियो । आयोजना प्रभावित स्थानीयमा १ लाख ९३ हजार ७०० कित्ता र वैदेशिक रोजगारीमा रहेका नेपालीमा १ लाख ३६ हजार ३६४ कित्ता आईपीओ बाँडफाँट गरिसकिएको हो । बाँकी रहेको मध्ये २८ हजार ८५३ कित्ता कम्पनीका कर्मचारीहरूका लागि र ७२ हजार १३३ कित्ता सामूहिका लगानीकोषहरूमा समेत बाँडफाँट गरी १२ लाख ५ हजार ३२० कित्ता आईपीओ भने सर्वधारणका लागि जारी गरेको थियो ।
