काठमाडौँ । पूर्व मन्त्री एवम् नेकपा एमालेका नेता महेश बस्नेतले ‘नेपो बेबी’भन्दै आफ्ना सन्तान र परिवारलाई आतंकित पारिएको भन्दै सरकारसँग न्याय मागेका छन् । आफ्नो घर जलाउने, आफ्ना बृद्ध मातापिता र श्रीमतिको हत्या गर्न खोज्ने, सन्तानको सार्वजनिक बेइज्जत गर्ने काम गरेको भन्दै उनले जेनजी आन्दोलनका ‘हाइज्याकर’हरुलाई चुनौती दिएको भनेका छन् ।

निवर्तमान प्रधानमन्त्री केपी शर्मा ओलीलाई पक्राउ गर्ने तयारीमा सरकार अघि सरेपछि बस्नेतले सशक्त प्रतिरोध गर्ने ढंगले पत्रकार सम्मेलन आयोजना गरेका थिए । एमाले र कांग्रेसका नेताहरु सार्वजनिक मञ्चमा देखा पर्नै छाडेको र उनीहरुको आवाज दबिएको देखेपछि सरकारले तत्कालिन प्रधानमन्त्री र गृहमन्त्री रमेश लेखकलाई पक्राउ गर्ने तयारी थालेको थियो ।

जेनजी आन्दोलनको बलमा गठन भएको सरकारका गृहमन्त्री ओमप्रकाश अर्यालले जसरी पनि ओली र लेखकलाई पक्राउ गर्ने भन्दै सुरक्षा निकायका प्रमुखहरुलाई निर्देशन दिने, मध्येरातसम्म बालुवाटारमा बैठक राख्ने जस्ता गतिविधी गर्न थालेपछि एमाले नेता बस्नेत आक्रामक शैलीमा देखिएका हुन् ।

कुनै बेला माओबादीको अर्धसैन्य संगठन भनिने वाईसीएललाई ‘तह लगाउन’भन्दै केपी ओलीकै अग्रसरतामा गठन गरिएको ‘युवासंघ’ बस्नेतले नेतृत्व गरेका थिए । उक्त संगठनको प्रतिकारपछि वाईसीएलको नाममा हुने विभिन्न आपराधिक गतिविधी रोकिएको थियो ।

अहिले फेरि जेनजीको नाममा कतै जलविद्युत् कम्पनीले नि:शुल्क १० प्रतिशत सेयर दिनुपर्ने माग राख्ने त यस्ता अनुचित मागहरु तेर्साउने क्रम बढेपछि बस्नेत जुरमुराएका हुन् । उनले दशैँको बेलामा आफ्नो र कयौँ राजनीतिकर्मीको परिवारमाथि धावा बोलिएको घटनाप्रति पनि रुष्ट भएर प्रतिक्रिया दिएका छन् ।

‘गृहमन्त्रीले पीडितलाई क्षतिपूर्ति नदिने र दोषिलाई कारबाही नगर्ने हो भने हामीले नै कारबाही गर्नुपर्ने हो ? मुलुकलाई द्वन्द्वमा लान खोजेको हो ?’, उनले पत्रकार सम्मेलनमार्फत् प्रश्न गरेका छन् । उनले थपे, ‘हामी नै पीडित हुनुपर्ने, हामीमाथि हजारौँ धम्की आउने, हामीमाथि अनेक मिडिया ट्रायल हुने, हामीलाई गिरफ्तार गर्ने भन्ने, दशैँको बेलामा हाम्रा घरमा आतंक सिर्जना गर्ने । यही हो त राज्य ? यही हो त लोकतन्त्र र लोककल्याणकारी राज्य ?’

उनले वर्तमान सरकारलाई प्रश्न मात्रै गरेनन्, सरकार यदि न्याय दिन समक्षम छैन भने आफूहरुमाथि भएको अन्यायको प्रतिशोध लिन र अपराधीहरुलाई कारबाही गर्न आफैँ सक्षम भएको भनेर राज्यमाथि दबाब पनि सिर्जना गरेका छन् । उनले भने, ‘यो विषयमा मैले न्याय पाउँदिन भने चुन चुन के हिसाब गर्छु । यति भन्न पाउँदिन मैले ?’

उनले निवर्तमान प्रधानमन्त्री केपी शर्मा ओलीको प्रतिरक्षा गर्दै सुधन गुरुङ सहितको टोली र गृहमन्त्री अर्याललाई समेत चुनौती दिएका छन् । ‘तिम्रा बाऊको हिम्मत छ भने केपी ओलीलाई गिरफ्तार गरेर देखाउ ।’ उनले पत्रकारहरुमाझ आफ्नो उक्त भाषालाई थप व्याख्या गर्दै भने, ‘छोराको हिम्मत छैन । बाऊको हिम्मत छ भने समातेर देखाउ । यति त भन्न पाइयो नि त ।’