चीनमथि ट्रम्पको १०० प्रतिशत कर धम्कीले क्रिप्टो बजारमा ल्यायो १८ अर्ब डलरको गिरावट
काठमाडाैं । चिनियाँ सामानमा थप १०० प्रतिशत कर लगाउने अमेरिकी राष्ट्रपति ट्रम्पकाे घाेषणासँगै क्रिप्टो बजारमा १८ अर्ब डलरकाे गिरावट आएको छ ।
ट्रम्पको धम्कीले शुक्रबार राति क्रिप्टोकरेन्सी बजारमा ठूलो गिरावट ल्याएको र यसले बजारमा जोखिमपूर्ण लिभरेजको अवस्था देखाएको सिएनएनले उल्लेख गरेकाे छ।
यसबाट प्रमुख डिजिटल मुद्रा बिटक्वाइन, एथर र सोलाना जस्ता क्रिप्टोकरेन्सीहरू सबैभन्दा बढी प्रभावित बनेकाे बताइएकाे छ ।
क्वाइनग्लासको डेटा विश्लेषण प्लेटफर्म अनुसार शुक्रबार क्रिप्टोकरेन्सीहरूको कुल तरलिकरण (लिक्विडेशन) १८.२८ अर्ब अमेरिकी डलर पुगेको छ। याे ६ महिनायताकाे सबैभन्दा ठूलाे गिरावट हाे । बिटक्वाइन पाँच दिनमा लगभग १० प्रतिशत घटेको छ ।
पछिल्लो २४ घण्टामा बिटक्वाइनको लगभग ५ अर्ब अमेरिकी डलर, एथरको ४ अर्ब अमेरिकी डलर र सोलानाको २ अर्ब अमेरिकी डलर लिक्विडेशन भएको छ।
शुक्रबार एथरको मूल्य ४,३६५.६३ अमेरिकी डलर थियो भने ट्रम्पकाे उक्त घाेषणाासँगै एथरकाे मूल्यमा १४.२ प्रतिशतले गिरावट आएर ३,७४२.८८ अमेरिकी डलरमा झरेकाे छ ।
सोलाना शुक्रबार २२३.१० अमेरिकी डलरमा कारोबार भइरहेको थियो र अब १७८.७२ अमेरिकी डलरमा अर्थात २० प्रतिशत झरेको छ।
यस वर्ष ट्रम्पको कार्यकालको दौरान क्रिप्टोको बजारले महत्वपूर्ण लाभ उठाएको थियो । हालै ट्रम्पले डिजिटल सम्पत्ति जस्तै क्रिप्टोको 401(k) योजनामा समावेश गर्न अनुमति दिइएको एक कार्यकारी आदेश जारी गरेका थिए। जसले बिटक्वाइनलाई गत हप्ता १२४,००० अमेरिकी डलरको रेकर्ड उच्चमा पुर्याएकाे थियाे।
