अन्तर्राष्ट्रिय चेन हाेटल र मलको व्यापार गर्ने स्काइलाइन इन्फ्राको काराेबार ७ गुणा बढ्याे, एकै वर्षमा साढे ८ करोड आम्दानी

काठमाडौं। वीरगञ्जमा व्यावसायिक मल र लक्जरी होटल सञ्चालन गरिरहेको स्काइलाइन इन्फ्रा लिमिटेडको व्यापारमा उल्लेख्य सुधार देखिएको छ। सन् २०२४ को सेप्टेम्बरदेखि अन्तर्राष्ट्रिय होटल चेन ‘सरोवर पोर्टिको’ सञ्चालनमा आएसँगै कम्पनीको कारोबारको आकार सात गुणाभन्दा बढीले बढेको हो।

इन्फोमेरिक्स क्रेडिट रेटिङ नेपालले सार्वजनिक गरेको पछिल्लो रेटिङ रिपोर्टअनुसार आर्थिक वर्ष २०२४ मा १ करोड २० लाख रुपैयाँ मात्र रहेको कम्पनीको कुल सञ्चालन आम्दानी आर्थिक वर्ष २०२५ मा बढेर ८ करोड ५० लाख रुपैयाँ पुगेको छ। कुल आम्दानीमा होटल व्यवसायको हिस्सा ७४ प्रतिशत रहेको छ भने बाँकी आम्दानी व्यावसायिक मलको भाडाबाट प्राप्त भएको छ। चालू आर्थिक वर्ष २०२६ को पहिलो पाँच महिनामा मात्र कम्पनीले ३ करोड ९० लाख रुपैयाँको कारोबार गरिसकेको छ।

पूँजी संरचना र स्वामित्व प्रवर्द्धकहरूले थप पूँजी लगानी गरेपछि कम्पनीको पूँजी संरचना निकै बलियो बनेको छ। सन् २०२४ मा ३.०३ गुणा रहेको ऋण र पूँजीको अनुपात सन् २०२५ को डिसेम्बर मध्यसम्म आइपुग्दा सुधारिएर ०.९० गुणामा झरेको छ। प्रवर्द्धकहरूको इक्विटी इन्फ्युजन र ऋणको नियमित भुक्तानीका कारण कम्पनीको नेटवर्थ बढेर वित्तीय जोखिम कम भएको रिपोर्टमा उल्लेख छ।

कर्जा र रेटिङ कम्पनीले विभिन्न बैंकिङ सुविधाका लागि कुल १ अर्ब ६ करोड २२ लाख ८० हजार रुपैयाँ बराबरको कर्जा सीमा निर्धारण गराएको छ। इन्फोमेरिक्स नेपालले कम्पनीको दीर्घकालीन कर्जाका लागि ‘इन्फोमेरिक्स नेपाल बी प्लस’ र अल्पकालीन कर्जाका लागि ‘इन्फोमेरिक्स नेपाल ए फोर’ रेटिङ प्रदान गरेको छ।

रणनीतिक अवस्थिति र व्यवसाय वीरगञ्जको रणनीतिक स्थानमा रहेको यस परियोजनामा ६० कोठाको ‘सरोवर पोर्टिको’ होटल र व्यापारिक मल सञ्चालनमा छन्। नेपाल-भारत सीमा (रक्सौल नाका) बाट मात्र ४ किलोमिटरको दूरीमा रहेकाले भारतीय पर्यटकहरूको आगमन र भारतको प्रसिद्ध होटल चेन ‘सरोवर होटल्स’ सँगको सहकार्यले कम्पनीको बजार उपस्थितिलाई मजबुत बनाएको छ। मलका सटरहरू दीर्घकालीन सम्झौतामा भाडामा लगाइएकाले कम्पनीलाई स्थिर नगद प्रवाहको सुनिश्चितता छ।

चुनौती र जोखिम व्यापारको आकार बढे पनि होटल सञ्चालनको पहिलो वर्ष भएकाले नाफाको मार्जिनमा भने दबाब देखिएको छ। सन् २०२४ मा ६४.५५ प्रतिशत रहेको सञ्चालन मुनाफा मार्जिन सन् २०२५ मा घटेर ३१.३७ प्रतिशतमा झरेको छ। होटल सञ्चालनको उच्च प्रारम्भिक खर्च, बैंक ब्याज र ह्रासकट्टीका कारण नाफाको प्रतिशत घटेको हो।

यस्तै, होटल उद्योगमा लगानी फिर्ता हुन लाग्ने लामो समय र वीरगञ्ज क्षेत्रमा रहेको तीव्र प्रतिस्पर्धालाई प्रमुख चुनौतीको रूपमा हेरिएको छ। आगामी दिनमा होटलको अकुपेन्सी दरमा सुधार गर्दै नाफा वृद्धि गर्ने र ऋणको दायित्व व्यवस्थापन गर्नु कम्पनीको मुख्य प्राथमिकता रहने देखिएको छ।