महालक्ष्मी कन्स्ट्रक्सनको क्रेडिट रेटिङ फिर्ता, १ अर्ब ३२ करोडको मूल्याङ्कन खारेज

काठमाडौं । नेपालको प्रतिष्ठित क्रेडिट रेटिङ एजेन्सी, इन्फोमेरिक्स क्रेडिट रेटिङ नेपाल लिमिटेडले महालक्ष्मी कन्स्ट्रक्सन कन्सर्न प्रालीलाई प्रदान गरेको सबै साख मूल्याङ्कन (रेटिङ) तत्काल लागू हुने गरी फिर्ता लिएको छ।

कम्पनीले रेटिङको नियमित अनुगमनका लागि आवश्यक वित्तीय विवरण तथा अन्य महत्वपूर्ण सूचना उपलब्ध नगराएपछि यो कदम चालिएको इन्फोमेरिक्सले जनाएकाे छ। यसअघि कम्पनीलाई इस्युअर नट कोअपरेटिङ श्रेणीमा राखिएको थियो, जसको अर्थ कम्पनीले रेटिङ एजेन्सीसँग पर्याप्त समन्वय नगरेको भन्ने बुझिन्छ।

नेपाल धितोपत्र बोर्डको निर्देशिका बमोजिम यो निर्णय लिइएको इन्फोमेरिक्स नेपालले जनाएको छ। कम्पनीले लामो समयदेखि रेटिङका आधारभूत सूचकहरू र वित्तीय स्वास्थ्यको बारेमा जानकारी दिन अस्वीकार गरेपछि एजेन्सीले ६ महिनाअघि नै ‘रेटिङ फिर्ता’ हुनसक्ने पूर्व सूचना जारी गरेको थियो।

सो अवधिमा पनि कम्पनीले कुनै पनि तथ्याङ्क उपलब्ध नगराएपछि र पटक-पटकको ताकेतालाई बेवास्ता गरेपछि कुल १ अर्ब ३२ करोड ५० लाख रुपैयाँ बराबरको बैंक सुविधाहरूको रेटिङ औपचारिक रूपमा खारेज गरिएको हो।

फिर्ता लिइएका सुविधाहरूमा ७ लाख रुपैयाँको दीर्घकालीन बैंक सुविधा, १९ करोड ३० लाख रुपैयाँको अल्पकालीन बैंक सुविधा र १ अर्ब ३० करोड ५० लाख रुपैयाँ बराबरको मिश्रित (लामो तथा अल्पकालीन) बैंक सुविधाहरू रहेका छन्।

पर्याप्त सूचनाको अभावमा कम्पनीको वर्तमान वित्तीय अवस्था, ऋण तिर्ने क्षमता र अन्य व्यावसायिक जोखिमहरूको विश्लेषण गर्न असम्भव भएकाले लगानीकर्ता र सरोकारवालाहरूको सुरक्षाका लागि रेटिङ फिर्ता लिनु परेको एजेन्सीको तर्क छ।

सन् १९७६ मा एउटा फर्मको रूपमा स्थापना भई सन् १९८५ मा प्राइभेट लिमिटेडमा परिणत भएको महालक्ष्मी कन्स्ट्रक्सन नेपालको एक ‘क’ वर्गको निर्माण कम्पनी हो। काठमाडौंको बालाजुमा दर्ता कार्यालय रहेको यस कम्पनीको नेतृत्व तीन जना व्यक्तिगत शेयरधनीहरूले गर्दै आएका छन्।

नेपालको तेस्रो क्रेडिट रेटिङ एजेन्सीको रूपमा सक्रिय इन्फोमेरिक्स नेपालले यस्ता रेटिङहरू मार्फत वित्तीय बजारमा पारदर्शिता कायम राख्न सहयोग पुर्‍याउँदै आएको छ। यद्यपि, कम्पनीले सूचना लुकाउँदा वा समन्वय नगर्दा बजारमा नकारात्मक सन्देश जाने जोखिम रहने गर्दछ।