हुन्डाई प्यालिसेड बन्यो ‘२०२६ नर्थ अमेरिकन युटिलिटी भेहिकल अफ द इयर’

काठमाडाैं । हुण्डाईको अत्याधुनिक प्यालिसेडले ‘नर्थ अमेरिकन कार, युटिलिटी एण्ड ट्रक अफ द इयर’ को निर्णायक मण्डलद्वारा ‘२०२६ नर्थ अमेरिकन युटिलिटी भेहिकल अफ द इयर’ को उपाधि जितेको छ। यो पुरस्कार अटोमोबाइल क्षेत्रको सबैभन्दा सम्मानित र स्वतन्त्र सम्मानहरू मध्ये एक मानिन्छ।

हुण्डाईको यो मुख्य तीन-पङ्क्ति भएको एसयूभीलाई यसको हाइब्रिड र पेट्रोल इन्जिन विकल्पहरू, उत्कृष्ट भित्री स्थान, र उन्नत सुरक्षा तथा सुविधा प्रविधिहरूका लागि प्रशंसा गरिएको छ। अमेरिका र क्यानडाका ५० जना प्रमुख अटो पत्रकारहरूले लामो समयको परीक्षण र मूल्याङ्कनपछि यो निर्णय गरेका हुन्।

सियोल र डेट्रोइटबाट सन् २०२६ जनवरी १४ मा जारी समाचार अनुसार, प्यालिसेडको यो जितले परिवार-केन्द्रित एसयूभी उत्पादनमा हुण्डाईको नेतृत्वलाई पुनः पुष्टि गरेको छ। यस गाडीलाई उत्कृष्ट गुणस्तर, अत्याधुनिक प्रविधि र दैनिक उपयोगिताका लागि विशेष मानिएको छ।

न्याक्टोयका निर्णायकहरूले प्रिन्ट, डिजिटल, टेलिभिजन र रेडियो जस्ता विभिन्न सञ्चार माध्यमको प्रतिनिधित्व गर्छन्। उनीहरूले गाडीको डिजाइन, कार्यक्षमता, नवीनता, सुरक्षा र मूल्यको विस्तृत रूपमा परीक्षण गरेर मात्र विजेता चयन गर्ने गर्दछन्।

हुण्डाई मोटर कम्पनीका अध्यक्ष तथा सीईओ जोसे मुनोजले यो उपलब्धिप्रति खुसी व्यक्त गर्दै भन्नुभयो, “प्यालिसेडले हुण्डाईले दिन खोजेको सुन्दर डिजाइन, उन्नत प्रविधि र सुरक्षाको प्रतिनिधित्व गर्दछ। उत्तर अमेरिकाका ५० प्रतिष्ठित पत्रकारहरूबाट वर्षको उत्कृष्ट सवारी साधनको रूपमा मान्यता पाउनु ठूलो सम्मानको कुरा हो।”

यो गाडीको सफलताको एउटा मुख्य कारण यसको विविधता पनि हो। यसमा नयाँ पुस्ताको हाइब्रिड प्रणाली उपलब्ध छ, जसले प्रति ग्यालन ३४ माइलको माइलेज र ६०० माइल भन्दा बढीको रेन्ज प्रदान गर्दछ। साथै, साहसिक यात्रा मन पराउनेहरूका लागि यसको ‘XRT PRO’ अफ-रोड मोडल पनि उपलब्ध छ।

सन् २०२५ मा प्यालिसेडले अमेरिकामा बिक्रीको नयाँ कीर्तिमान कायम गरेको थियो, जहाँ यसको खुद्रा बिक्री १७ प्रतिशतले बढेको थियो। आधुनिक परिवारहरूको माग अनुसार प्रविधि र सुविधालाई संयोजन गर्न सफल भएकाले नै यो गाडी बजारमा लोकप्रिय भएको हो।

न्याक्टोयका अध्यक्ष जेफ गिल्बर्टका अनुसार, हुण्डाई प्यालिसेडले २१ औं शताब्दीको पारिवारिक सवारी साधनलाई परिभाषित गरेको छ। यो चलाउन रमाइलो हुनुका साथै प्रशस्त ठाउँ र प्रविधिले भरिपूर्ण रहेको उहाँको भनाइ छ। सन् १९९४ मा स्थापित न्याक्टोयअवार्ड्स विश्वकै विश्वसनीय अटोमोबाइल पुरस्कारहरू मध्ये एक मानिन्छ।