गोयन्का स्टिलको व्यापार ४७ प्रतिशतले वृद्धि, एक वर्षमा १ अर्ब १७ करोडकाे कारोबार
काठमाडौं । गोयन्का स्टील्स प्रालिले आर्थिक वर्ष २०२५ मा १ अर्ब १७ करोड २० लाख रुपैयाँको व्यापार गरेको छ । यो अघिल्लो वर्षको तुलनामा ४७ प्रतिशतले बढी हो । २०२४ मा कम्पनीले ७९ करोड ७० लाख रुपैयाँ बराबरको व्यापार गरेको थियो ।
आर्थिक वर्ष २०२१ मा २ अर्ब ६६ करोड २० लाख रुपैयाँको व्यापार गरेको कम्पनीले आर्थिक वर्ष २०२२ मा आफ्नो व्यापार बढाएर ३ अर्ब ४३ करोड ४० लाख रुपैयाँ पुर्याएको थियो ।
तर कम्पनीको व्यापार त्यसपछिका वर्षहरूमा निकै कमजोर देखिएकाे । आर्थिक वर्ष २०२३ मा व्यापार घटेर २ अर्ब २६ करोड ४० लाखमा सीमित भयो भने आर्थिक वर्ष २०२४ मा यो अझै घटेर जम्मा ७९ करोड ७० लाख रुपैयाँमा झर्यो ।
व्यापारमा आएको गिरावसँगै कम्पनीको नाफा र वित्तीय अवस्था पनि निकै कमजोर बनेको छ । आर्थिक वर्ष २०२१ मा ६.३% नाफा मार्जिन रहेकोमा पछिल्ला तीन वर्षदेखि कम्पनी लगातार सञ्चालन घाटामा रहेको छ । आर्थिक वर्ष २०२४ मा -७.३% र २०२५ मा -१.६% सञ्चालन नाफा मार्जिन देखिएको छ । लगातारको घाटाका कारण कम्पनीको नेट वर्थ ऋणात्मक बनेको छ र ब्याज तिर्ने क्षमता पनि सन् २०२५ मा -०.२ गुणामा झरेको छ ।
कम्पनीको तरलता स्थिति निकै गम्भीर देखिएको छ, जहाँ आफ्नो कार्यपुँजी चलाउन बैंक ऋणमा अत्यधिक निर्भर हुनुपर्ने बाध्यता छ । आर्थिक वर्ष २०२५ मा कम्पनीले बैंकले तोकेको सीमा भन्दा २६३ प्रतिशतसम्म बढी ऋण उपयोग गरेको पाइएको छ । यो वित्तीय संकट टार्न प्रवर्द्धकहरूले विगत दुई वर्षमा थप पुँजी लगानी गरे पनि तरलताको दबाब अझै केही समय कायमै रहने देखिन्छ ।
यही कमजोर वित्तीय स्थिति र व्यापारमा आएको ह्रासका कारण इक्रा नेपालले कम्पनीको ५१ करोड ४० लाख रुपैयाँ बराबरको दीर्घकालीन कर्जा रेटिङलाई एलबीबाट घटाएर एलबी माइनस कायम गरेको छ । यस्तै, १ अर्ब ७१ करोड रुपैयाँ बराबरको अल्पकालीन कर्जा रेटिङ भने एफाेर यथावत राखिएको छ ।
अन्त्यमा, कम्पनीका सामु उत्पादनमा विविधीकरणको अभाव र बजारको तीव्र प्रतिस्पर्धा मुख्य चुनौतीका रूपमा रहेका छन् । कम्पनीको ८१% व्यापार टीएमटी छडमा मात्र आधारित हुनु, कच्चा पदार्थको मूल्यमा हुने उतारचढाव, र डलरको विनिमय दरमा हुने जोखिमले कम्पनीलाई थप दबाबमा पारेको छ । यद्यपि, प्रवर्द्धकहरूको ४ दशक लामो अनुभव र सरकारले स्वदेशी उद्योगलाई दिएको संरक्षणले केही राहत प्रदान गर्ने अपेक्षा गरिएको छ ।
