नबिल बैंकको डेपुटी सीईओमा गणेशप्रसाद अवस्थी बढुवा

काठमाडौं। नबिल बैंकको नायब प्रमुख कार्यकारी अधिकृत (डेपुटी सीईओ) पदमा गणेशप्रसाद अवस्थी बढुवा भएका छन्।

बैंक सञ्चालक समितिको सोमबार बसेको बैठकले नायब महाप्रबन्धक पदमा कार्यरत अवस्थीलाई डेपुटी सीईओमा पदोन्नति गर्ने निर्णय गरेको हो।

बैंकिङ क्षेत्रमा साढे दुई दशक भन्दा लामो अनुभवी यात्रा तय गरिसकेका अवस्थी ६ वर्षअघि ग्लोबल आइएमई बैंकबाट सहायक महाप्रबन्धकका रूपमा नबिल बैंक प्रवेश गरेका थिए।

नबिलमा छोटो समयमै नायब महाप्रबन्धक बन्न सफल उनी विशेषगरी अपरेसन, जोखिम व्यवस्थापन र कर्जा शाखा सञ्चालनमा निकै कुशल मानिन्छन्।

शैक्षिक रूपमा समेत अब्बल रहेका अवस्थीले त्रिभुवन विश्वविद्यालयबाट व्यवस्थापन र अर्थशास्त्रमा स्नातकोत्तर गरेका छन्। साथै, उनले प्रतिष्ठित हार्वर्ड बिजनेस स्कुलबाट रणनीतिक व्यवस्थापन सम्बन्धी उच्चस्तरीय अध्ययन पूरा गरेका छन्।