ब्रेकथ्रु नभएसम्म उद्धार कार्य नरोकिने नेपाली सेनाको घाेषणा, सुरुङभित्र १२१ जनाको खोजी

विपद्ले क्षति पुर्‍याएका जलविद्युत आयोजनाका सुरुङमा सरकारको अर्को निर्णय नभएसम्म खोजी अभियान नरोकिने नेपाली सेनाको स्पष्टोक्ति ।

काठमाडाैँ । भदौ १० गते आएको विनाशकारी बाढीले मुलुकका विभिन्न जलविद्युत आयोजनामा ठूलो धनजनको क्षति पुर्‍यायो। बाढी र लेदोले सुरुङभित्र थुनिएका नागरिकहरूको खोजी कार्य हाल युद्धस्तरमा अघि बढाइएको छ।

खोज तथा उद्धारको जिम्मा पाएको नेपाली सेनाले सुरुङको ‘ब्रेकथ्रु’ नभएसम्म र सरकारबाट आधिकारिक रूपमा अर्को निर्देशन नआएसम्म यो अभियान नरोकिने दृढता व्यक्त गरेको छ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणले काठमाडौंमा आयोजना गरेको पत्रकार सम्मेलनमा सेनाका सहायक रथी सुवाशजंग थापाले उद्धार कार्यको वर्तमान अवस्था र जटिलताकाबारे विस्तृत जानकारी गराएका हुन्।

१८० किमिको गतिमा लेदोको ताण्डव

प्राकृतिक विपद्को हिंस्रक रूप कति भयानक थियो भन्ने अनुमान जलविद्युत आयोजनाका सुरुङमा पुगेको क्षतिको प्रकृतिबाट लगाउन सकिन्छ। सहायक रथी थापाका अनुसार बाढीसँगै बगेर आएको लेदो र बालुवा करिब १८० किलोमिटर प्रतिघण्टाको अकल्पनीय गतिमा सुरुङभित्र प्रवेश गरेको थियो।

यसैले गर्दा सुरुङभित्र रहेका संरचनाहरूमा अत्यधिक क्षति पुगेको छ र खोजी कार्य सोचेजस्तो सहज छैन। तीव्र गतिका कारण सुरुङभित्र थुपारिएको लेदो र अवरोधहरू पन्छाउन निकै कठिन कसरत गरिरहनु परेको सेनाले जनाएको छ।

बाढी प्रभावित विभिन्न जलविद्युत आयोजनाका सुरुङभित्र हालसम्म करिब १२१ जना नागरिकहरू फसेको अनुमान सेनाले गरेको छ। बाहिरी क्षेत्रमा पनि केही प्रभावितहरू रहे पनि सुरुङभित्रै थुनिएकाहरूको अवस्थाका बारेमा विशेष सावधानीपूर्वक खोजी भइरहेको छ।

रसुवागढी जलविद्युत आयोजनामा सेना र आयोजनाको प्रतिनिधि सम्मिलित विशेष टोलीले पावरहाउस र कन्ट्रोल प्वाइन्टसम्मै पुगेर खोजबिन गरेको छ। त्यसैगरी, त्रिशूली–३ ए को पावरहाउस र सुरुङ क्षेत्रमा पनि सेनाको विशेष उद्धार टोली अत्याधुनिक उपकरणसहित निरन्तर खटिएको छ।

अवरोध चिर्दै अघि बढ्दै

विभिन्न हाइड्रोपावर आयोजनाहरूमा उद्धारको शैली र प्रगति पनि भिन्न प्रकारले अघि बढाइएको छ। त्रिशूली–३ बी आयोजनामा अडिट २ बाट सुरुङभित्र प्रवेश गरेको सेनाको फौज अहिले अडिट १ बाट बाहिर निस्किएको छ। अडिट २ सुरुङमार्गबाटै एक्साभेटरजस्ता ठूला हेभी उपकरणहरू भित्र लैजान मिल्ने गरी बाटो निर्माणको काम तीव्र पारिएको छ।

यता, चिलिमे हाइड्रोपावरमा विदेशी विशेषज्ञहरूसहितको संयुक्त टोलीले विशेष उपकरणको सहायताले सुरुङभित्र थुप्रिएको लेदो पन्छाउने काम गरिरहेको छ। माथिल्लो त्रिशूली–१ मा पनि विदेशी विज्ञहरूसहितको टोलीले थप खोजी र प्राविधिक सहयोग पुर्‍याइरहेको छ।

जति नै अप्ठ्यारो परिस्थिति आए पनि सुरुङको मुख नखुल्दासम्म र सबै बेपत्ताहरूको अवस्था यकिन नभएसम्म सेना आफ्नो कर्तव्यबाट पछि नहट्ने स्पष्ट सन्देश दिएको छ।