रियरह्वील ड्राइभ र फ्रन्ट ट्रंकसहित आयो बीवाईडी सिगलको नयाँ संस्करण

ब्याट्री र मोटरमा ठूलो फेरबदल गर्दै चिनियाँ बजारमा सार्वजनिक भयो दोस्रो पुस्ताको बीवाईडी सिगल।

काठमाडाैँ । मोडेलमा व्यापक फेरबदल गरिएको बीवाईडी सिगल (जसलाई ग्रेट सिगल पनि भनिन्छ) को दोस्रो पुस्ता हालै चीनमा सार्वजनिक गरिएको छ। नयाँ विद्युतीय ह्याचब्याकमा यसअघिको तुलनामा प्राविधिक रूपमा ठूलो परिवर्तन गरिएको छ।

गाडीको मोटरलाई अगाडिको साटो पछाडिको आक्सलमा सारिएको छ, जसले गर्दा यो गाडी फ्रन्ट-ह्विल ड्राइभबाट रियर-ह्विल ड्राइभमा परिणत भएको छ। नयाँ बनावटका कारण अगाडिको भागमा सामान राख्न मिल्ने गरी फ्रन्ट ट्रंक (फ्रंक) को समेत सुविधा थपिएको छ।

चिनियाँ सञ्चारमाध्यम अटोहोमले पहिलोपटक बाहिर ल्याएको यो जानकारी चीनको उद्योग तथा सूचना प्रविधि मन्त्रालय (एमआईआईटी) मा दर्ता भएका विवरण र यसअघि सार्वजनिक बाहिरी बनावटका स्केचहरूमा आधारित छ।

यसअघि बाहिर आएका क्याबिनसम्बन्धी स्केचहरूले यो पाँच सिट क्षमताको गाडीमा परम्परागत इन्स्ट्रुमेन्ट क्लस्टर हटाइएको देखाएका थिए। नयाँ सार्वजनिक गरिएको कारले यसको परिमार्जित चेसिस, ड्राइभट्रेन र भित्री उपकरणहरूबारे थप स्पष्ट पारेको छ।

प्रचारप्रसारका लागि गरिएको फोटोसुटमा देखिएका हालैका तस्बिरहरूले यसको उच्च संस्करणमा बीवाईडीको दोस्रो पुस्ताको ब्लेड ब्याट्री र फ्ल्यास चार्जिङको सुविधा हुन सक्ने अनुमानलाई बल पुर्याएका छन्। यद्यपि, बीवाईडीले आधिकारिक रूपमा चार्जिङको गति र समयबारे अहिलेसम्म कुनै जानकारी सार्वजनिक गरेको छैन।

रियर-ड्राइभ पावरट्रेन र इन्डिपेन्डेन्ट सस्पेन्शन

पहिलो पुस्ताको सिगलमा अगाडि ५५ किलोवाटको मोटर जडान गरिएको थियो जसले अगाडिका चक्काहरूलाई घुमाउँथ्यो। दोस्रो पुस्ताका लागि भने ड्राइभ युनिटलाई पछाडिको आक्सलमा सारिएको अटोहोमले जनाएको छ। एमआईआईटीको नियमन डेटाले यसको मोटर मोडल TZ164XYB रहेको देखाएको छ, जसलाई झेङझाउ बीवाईडी अटो कम्पनी लिमिटेडले निर्माण गरेको हो।

यसको क्षमता ९५ किलोवाट (१२७ हर्सपावर) रहेको छ। बढेको पावर क्षमताका कारण अब सिगलको अधिकतम गति प्रतिघण्टा १५० किलोमिटर पुगेको छ।

गाडीको चेसिसमा पनि परिवर्तन गरिएको छ। यसअघिको पछाडिको टर्जन बीम सस्पेन्शनलाई हटाएर इन्डिपेन्डेन्ट मल्टि-लिंक सस्पेन्शन राखिएको छ। पुरानो मोडेलमा प्रयोग भएका १६५ मिलिमिटर र १७५ मिलिमिटरका टायरहरूको सट्टा अब नयाँ गाडीमा १६ इन्चका डुअल फोर-स्पोक एलोय ह्विल्ससहितका फराकिला २०५/६० आर१६ टायरहरू अपनाइएका छन्।

फ्रन्ट ट्रंक र क्याबिन

ड्राइभ प्रणालीलाई पछाडि सारिएपछि अगाडिको भागमा फ्रन्ट ट्रंक (सामान राख्ने ठाउँ) का लागि पर्याप्त खाली ठाउँ बचेको छ। चीनको एक लाख युनियन (१४,८९५ अमेरिकी डलर) भन्दा कम मूल्य पर्ने सानो विद्युतीय सवारी साधनको सेग्मेन्टमा फ्रन्ट ट्रंकको चलन अझै पनि कमै मात्र देख्न पाइन्छ। यद्यपि, बीवाईडीले यस खण्डको आधिकारिक क्षमता कति लिटर हो भन्ने खुलाएको छैन।

भित्री भागमा सिगलमा फ्ल्याट-बटम आकारको दुई स्पोक भएको मल्टिथिएक्शन स्टेयरिङ ह्विलका साथै फ्लोटिङ सेन्ट्रल टचस्क्रिन राखिएको छ। नयाँ डिजाइन गरिएको कन्सोलमा एयर भेन्ट्स मुनि फिजिकल टगल स्विचेस, वायरलेस फोन चार्जर र ठाडो रूपमा राखिएका दुईवटा कप होल्डरहरू रहेका छन्।

बाहिरतर्फ, गाडीमा बाहिर निस्कने ह्यान्डिलहरूको सट्टा अर्ध-लुकेका मेकानिकल ढोकाका ह्यान्डिलहरू राखिएका छन्। यसैगरी पछाडि ठूलो रूफ स्पोइलरमुनि स्पिल टेललाइटहरू र एकीकृत तल्लो डिफ्रुजर राखिएको छ। चीनमै देखिएका इन्जिनियरिङ टेस्ट म्युलहरूमा देखिएझैं, यसको ऐच्छिक रूफ-माउन्टेड लाडार पोडले बीवाईडीको डिपाइलट ३०० (गोड्स आई बी) लेभल २ ड्राइभिङ-एसिस्टेन्स प्याकेजलाई सहयोग गर्छ।

जिली ‘इएक्स २’ सँग नयाँ सिगलको तुलना

यस नयाँ डिजाइनले सिगललाई जिली इएक्स २ (चीनमा सिङयुआन नामले बिक्री हुने) सँग धेरै कुरामा मिल्दोजुल्दो बनाएको छ। दुवै मोडेलमा रियर-ह्विल ड्राइभ, इन्डिपेन्डेन्ट रियर सस्पेन्शन, फ्रन्ट ट्रंक र समान २,६५० मिलिमिटरको ह्वीलबेस रहेका छन्, भने ४,२०५ मिलिमिटर लामो सिगल समग्रमा ७० मिलिमिटर लामो छ।

चीनको सानो विद्युतीय सवारी साधन बजारमा प्रतिस्पर्धा तीव्र बन्दै गएको बेला यी परिवर्तनहरू आएका छन्।

चीन इभी डाटाट्र्याकरका अनुसार गत अगस्टमा पुरानो सिगलको घरेलु खुद्रा दर्ता १०,१०३ युनिट पुगेको थियो भने जिली सिङयुआनले ३९,६५१ खुद्रा दर्ता र ६०,९५५ होलसेल डेलिभरी रेकर्ड गरेको थियो। नयाँ सिगलको आधिकारिक मूल्य र बजारमा आउने समयबारे भने हालसम्म कुनै घोषणा गरिएको छैन।