आर्थिक सुधार कार्यान्वयन कार्ययोजना स्वीकृत
काठमाडौं । उच्चस्तरीय आर्थिक सुधार सुझाव आयोगको सिफारिस अनुसार तयार पारिएको आर्थिक सुधार कार्यान्वयन कार्ययोजना २०८२ लाई सरकारले स्वीकृति दिएको छ ।
मंगलबार बसेको मन्त्रिपरिषद् बैठकले उक्त कार्ययोजनालाई स्वीकृत गर्ने निर्णय गरेको हो ।
बैठकले अधिकार सम्पन्न बागमती सभ्यता एकीकृत विकास समिति (पाँचौँ संशोधन) आदेश २०८२ लाई पनि स्वीकृति दिएको सरकारका प्रवक्ता तथा सञ्चार तथा सूचना प्रविधि मन्त्री पृथ्वीसुव्वा गुरुङले जानकारी दिएका छन् ।
बैठकमार्फत डा. विश्वनाथ पौडेललाई नेपाल राष्ट्र बैंकको गभर्नर मा नियुक्त गरेको थियो ।
साथै, नेपाली सेनाको सैनिक स्वास्थ्य समूह अन्तर्गत मेडिकल उपसमूहमा कार्यरत एक जना महासेनानीको कार्यकाल थप गर्ने निर्णय गरिएको छ ।
त्यस्तै, सुर्खेत उपत्यका नगर विकास समिति स्वामित्वमा रहेको एक जग्गा कर्णाली प्रदेश सरकारलाई मुख्यमन्त्री तथा मन्त्रिपरिषद् कार्यालयको प्रशासकीय भवन निर्माण प्रयोजनका लागि प्रयोग गर्न दिने स्वीकृति शहरी विकास मन्त्रालयलाई प्रदान गरिएको छ ।
बैठकले जेठ ११ देखि १९ गतेसम्म चीनमा आयोजना हुने एक कार्यक्रममा सहभागी हुन उद्योगमन्त्री दामोदर भण्डारीलाई स्वीकृति दिएको छ ।
