नेपाल टेक रोडशो अस्ट्रेलिया २०२५: नेपाली र अस्ट्रेलियाली प्रविधि इकोसिस्टमलाई जोड्न सफल

काठमाडौं । नेपाल एसोसिएशन फर सफ्टवेयर एण्ड आईटी सर्भिस कम्पनीज (नास आईटी) ले आयोजना गरेको ‘नेपाल टेक रोडशो अस्ट्रेलिया २०२५’ सिड्नीस्थित राइड्जेस वर्ल्ड स्क्वायरमा भव्यताका साथ सम्पन्न भएको छ।

यस रोडशोले नेपाल र अस्ट्रेलियाका प्रविधि क्षेत्रका अगुवा, आविष्कारक, उद्यमी र लगानीकर्ताहरूलाई एकै ठाउँमा भेला गरायो। कार्यक्रमको मुख्य उद्देश्य नेपालको बढ्दो आईटी र सफ्टवेयर क्षमतालाई अन्तर्राष्ट्रियस्तरमा प्रस्तुत गर्दै दुई देशबीच सहकार्य र लगानीका नयाँ अवसरहरू सिर्जना गर्नु थियो।

कार्यक्रमको सुरुवात अतिथिहरूको दर्ता र परिचय सत्रबाट भएको थियो। क्विकफक्स कन्सल्टिङ प्रालिकी प्रमुख व्यवसाय अधिकृत (CBO) तथा NAS-IT सदस्य, सुश्री सोणा सिंहले कार्यक्रम सञ्चालन गरेकी थिइन्। उद्घाटन मन्तव्य टेकक्राफ्ट इंक प्रालिका सह-संस्थापक तथा NAS-IT सदस्य, अनिश श्रेष्ठले दिएका थिए।

त्यसपछि, ईके सोलुसन्स प्रालिका प्रमुख कार्यकारी अधिकृत र नास आईटीका अध्यक्ष, गौरव पाण्डेले नेपालको विकासशील प्रविधि इकोसिस्टमबारे एक विस्तृत प्रस्तुति दिएका थिए।

कार्यक्रमको अर्को महत्त्वपूर्ण हिस्सा “अस्ट्रेलियाली र नेपाली प्रविधि इकोसिस्टमबीच सहकार्य र लगानीका अवसरहरू” विषयमा गरिएको प्यानल छलफल थियो। यस छलफलमा दुवै देशका उद्योग अगुवाहरूले चुनौती, सम्भावना र सहकार्यका लागि आवश्यक व्यावहारिक कदमहरूबारे गम्भीर बहस गरे।

एमिनेंस वेजका प्रबन्ध निर्देशक तथा नास आईटीका कार्यकारी सदस्य, नारायण कोइरालाले सञ्चालन गरेको यस सत्रले नेपाली र अस्ट्रेलियाली कम्पनीहरूबीचको सहकार्य र लगानीका लागि गहिरो अन्तरदृष्टि प्रदान गर्‍यो। सहभागीहरूले दुई देशबीच साझेदारीका लागि आवश्यक ठोस कदमहरूबारे अन्तरक्रियात्मक सत्रमा पनि छलफल गरे।

प्यानलमा डाटा विश्लेषण, मेसिन लर्निङ र सूचना सुरक्षामा विशेषज्ञता भएका रारा ल्याब्सका सह-संस्थापक तथा प्रमुख कार्यकारी अधिकृत मनोज घिमिरे, डिजिटल रचनात्मकता र प्रयोगकर्ता अनुभव डिजाइनमा अनुभवी ईबी पर्लका क्रिएटिभ डाइरेक्टर माइकल सिग्नल, एसिया-प्रशान्त क्षेत्रमा डिजिटल रूपान्तरणका पहलहरूको नेतृत्व गरिरहेका MTX APAC। का प्रमुख कार्यकारी अधिकृत तथा सह-संस्थापक सुदीप आचार्य सहभागी थिए ।

कार्यक्रमको समापन रात्रिभोजसहितको अनौपचारिक नेटवर्किङ सत्रबाट भएको थियो, जहाँ सहभागीहरूले विचार आदानप्रदान गर्न तथा सम्बन्ध विस्तार गर्न अवसर पाए।

यस कार्यक्रमले सहभागीहरूलाई नेपालको तीव्र गतिमा विकास भइरहेको प्रविधि परिदृश्य, नेपाली स्टार्टअपहरूले प्रस्तुत गरेका नविन समाधानहरू, र अस्ट्रेलियामा सहकार्य तथा लगानीका सम्भावनाहरूबारे गहिरो जानकारी प्राप्त गर्न मद्दत पुर्‍यायो। यसले नेपाली आईटी कम्पनीहरूको उपलब्धिहरूलाई पनि उजागर गर्दै विश्वव्यापी प्रविधि र आविष्कारमा उनीहरूको योगदानलाई जोड दियो।

यो कार्यक्रम एनसेलबिजनेशको सहयोगमा सम्पन्न भएको थियो, जसको समर्थनले नेपालको जीवन्त आईटी उद्योगलाई अन्तर्राष्ट्रिय दर्शकमाझ पुर्‍याउन महत्त्वपूर्ण भूमिका खेलेको छ।

नास आईटीले भविष्यमा पनि यस्ता कार्यक्रमहरूलाई निरन्तरता दिँदै नेपालको विश्वव्यापी प्रविधि उपस्थितिलाई थप बलियो बनाउने र सहकार्य, आविष्कार तथा विकासका थप अवसरहरू सिर्जना गर्ने अपेक्षा राखेको छ।