कृषि विकास बैंकले २४ अर्बको ‘कृषि ऋणपत्र’ निष्काशन गर्दै, ऋणपत्रको ब्याजदर ४ प्रतिशत
काठमाडौं । कृषि कर्जा प्रवाहमा नेतृत्वदायी भूमिका पाएको कृषि विकास बैंकले ‘कृषि ऋणपत्र’ बिक्री गर्ने भएको छ । बैंकले २४ अर्ब रुपैयाँ बराबरको ऋणपत्र जारी गर्ने भएको हो । बैंकले ऋणपत्र निष्कासन राष्ट्र बैंकले अनुमति दिईसकेको छ । बैंकले २४ अर्ब रुपैयाँबराबरको ऋणपत्र निष्कासनका लागि अनुमति पाएको हो, सो ऋणपत्रलाई ६/६ अर्ब रुपैयाँका दरले ४ चरणमा जारी गरिने बैंकले जनाएको छ । यसका लागि धितोपत्र बोर्डमा आवेदन दिईसकेको छ ।
कृषि विकास बैंकलाई कृषि कर्जाको नेतृत्व गर्न अगुवा बैंकको जिम्मा दिए व्यवस्थाअनुसार बैंकले कृषि ऋणपत्र निष्कासन गर्ने भएको हो । कृषि विकास बैंकले ऋणपत्र अन्य वाणिज्य बैंकलाई बिक्री गर्ने छ । ऋणपत्र किनेका बैंकले सो लगानीलाई आफ्नो कृषि लगानीमा गणना गर्न पाउने छन् ।
बैंकले जारी गर्न लागेको ऋणपत्रको ब्याजदर ४ प्रतिशत प्रस्ताव गरिएको छ । चरणबद्ध रूपमा जारी हुने ऋणपत्रको समयावधि पनि फरकफरक प्रस्ताव गरिएको छ । समग्रमा ऋणपत्र परिपक्वको अवधि ७ देखि १० वर्षसम्मको हुने भए पनि बैंकले हरेक चरणका लागि फरकफरक अवधि तोकेको हो ।
बैंकले २०७३ सालदेखि सरकारले व्यावसायिक कृषि कर्जामा ब्याज अनुदान दिँदै आएको छ । गत भदौसम्म २५ हजार ५ सय ८९ जनाले करिब ५७ अर्ब ४४ करोड रुपैयाँबराबर ब्याज अनुदानको कृषि कर्जा पाएका छन् । यस्तै वाणिज्य बैंकहरूले कुल लगानीको न्यूनतम १० प्रतिशत कृषिमा लगानी गर्नुपर्ने अनिवार्य व्यवस्था छ ।
